முகமுடி அணிந்த பூஜா!

முகமுடி அணிந்த பூஜா!



எத்தனை புத்தம்புது முகங்கள் வந்து கொண்டே இருந்தாலும், வந்தவேகத்தில் ரசிகர்களை வசிகரித்து விடுவார்கள் சிலர். இதை மோப்பம் பிடித்து விடும் தயாரிப்பாளர்கள், அறிமுகப் படம் படப்பிடிப்பில் இருக்கும்போதே, தங்கள் படத்துக்கு அவரை ஒப்பந்தம் செய்யத் துடிப்பார்கள். தற்போது கோடம்பாக்கத்தில் தயாரிப்பாளர்களின் முற்றுகையில் சிக்கி இருக்கிறார் பூஜா ஹெக்டே. ‘யுத்தம் செய்’ படத்தை தொடர்ந்து மிஷ்கின் இயக்கும் ‘முகமுடி’ படத்தின் நாயகியாக அறிமுகமாகிறார் இவர்.

மும்பை பாந்திராவில் அக்டோபர் 13-ஆம் தேதி பிறந்தவர் பூஜா ஹெக்டே. மிஸ் யுனிவர்ஸ் இந்தியா 2010 அழகிப் போட்டியில் இரண்டாவது இடத்தையும், அழகிய கூந்தலுக்கான அழகி பட்டத்தையும் அள்ளியவராம்.

முகமுடி படத்தில் பத்திரிகை நிருபராக நடிக்கும் பூஜாவின் கதாபாத்திரத்தைச் சுற்றித்தான் மொத்தப் படத்தின் திரைக்கதை நகர்கிறதாம்! பூஜாவைக் காதலிக்கும் கதாநாயகன் ஜீவாவை அவரது காதலியை வைத்தே எப்படி தீர்த்துக் கட்ட நரேன் திட்டமிடுகிறார் என்பதுதான் திரைக்கதையில் விறுவிறுப்பான அம்சம் என்று கூறப்படுகிறது. ஒரு அழகு தேவதை ஆபத்தான முகமுடி அணிந்திருப்பது தெரியாமல், அவரிடம் சிக்கிக் கொண்டு மீளும் நாயகனின் கதை என்கிறார்கள் இயக்குனர் வட்டாரத்தில். அப்படியென்றால் இந்த அழகுதேவதை முகமுடியின் வில்லியா? என்றால் அது சஸ்பென்ஸ் என்கிறது இயக்குனர் வட்டாரம்.

"முகமூடி' வெளியாகும்வரை வேறு படங்களில் ஒப்பந்தமாகக்கூடாது என்று இயக்குநர் மிஷ்கின் நிபந்தனை விதித்திருக்கிறார் என்று கேள்வி. இதனால், தனக்குக் குவியும் எல்லா வாய்ப்புகளையும் ஏக்கப் பெருமூச்சுடன் நிராகரித்துக் கொண்டிருக்கிறாராம் பூஜா!


தகவல் பகிர்வு - http://www.tamilleader.in/cine/1181-2012-01-07-05-27-06.html