இத்தாலியில் கோர விபத்து: படகு தீப்பிடித்து கடலில் மூழ்கியது; 100 பேர் பலி 300 பேர் கதி என்ன?

 இத்தாலியில் கோர விபத்து: படகு தீப்பிடித்து கடலில் மூழ்கியது; 100 பேர் பலி 300 பேர் கதி என்ன?

ரோம்

இத்தாலியில் படகு தீப்பிடித்து கடலில் மூழ்கியதில் 100 பேர் உயிரிழந்தனர். 300 பேர் கதி என்ன என்பது தெரியவில்லை.

பிழைப்பு தேடி பயணம்

இத்தாலி நாட்டில், துனிசியா–சிசிலி இடையே லாம்பிதுசா என்ற தீவு உள்ளது. ஐரோப்பிய நாடுகளில் அடைக்கலம் தேடி செல்கிறவர்களுக்கு இந்த லாம்பிதுசா தீவு நுழைவு வாயில் போல அமைந்துள்ளது. இந்த நிலையில், கிழக்கு ஆப்பிரிக்க நாடான சோமாலியாவில் இருந்து பிழைப்பு தேடி 500–க்கும் மேற்பட்டோர் நேற்று ஒரு படகில் பயணம் செய்தனர்.

இந்தப் படகு இந்திய நேரப்படி காலை 10.50 மணிக்கு சிசிலி தீவுப்பகுதியில் கடலில் சென்று கொண்டிருந்தது. அப்போது எதிர்பாராத விதமாக படகு தீ விபத்தில் சிக்கியது. சற்று நேரத்தில் தீ மளமளவென பரவியது. படகும் கடலில் மூழ்கியது. படகில் இருந்தவர்கள் மரண ஓலமிட்டனர்.

100 பேர் பலி

இந்த கோர விபத்து குறித்து அறிந்ததும் அந்தப் பகுதியில் இருந்த கடலோரக் காவல் படையினர், போலீசார் மின்னல் வேகத்தில் விரைந்து சென்று மீட்புப்பணிகளில் ஈடுபட்டு வருகின்றனர்.

இந்தக் கோர விபத்தில் 100 பேர் கடலில் மூழ்கி பலியாகி விட்டனர். அவர்களது உடல்கள் மீட்கப்பட்டு விட்டன. 120 பேர் பத்திரமாக மீட்கப்பட்டு விட்டனர். மீட்புப்பணிகள் தொடர்ந்து நடந்து வருகிறது.

நடந்தது என்ன?

இந்தக் கோர சம்பவம் தொடர்பாக லாம்பிதுசா மேயர் நிக்கோலினி கூறியதாவது:–

படகு விபத்தில் கடலில் மூழ்கியவர்களில் 120 பேர் மீட்கப்பட்டனர். 100 பேர் கடலில் மூழ்கி உயிரிழந்தனர். மீட்கப்பட்டவர்கள் இன்னும் அதிர்ச்சியில் இருந்து மீளவில்லை. கடற்கரையிலிருந்து ஒரு மைல் தொலைவில் வந்தபோது, தங்கள் படகில் தொழில் நுட்ப கோளாறு ஒன்று ஏற்பட்டதாகவும், அப்போது கடலோர பாதுகாப்பு படையினரின் கவனத்தை ஈர்ப்பதற்காக படகில் லேசாக தீ வைத்ததாகவும், அந்தத் தீ சற்றும் எதிர்பாராத வகையில் வேகமாக பரவியதில், பயணிகள் இடையே பதற்றம் ஏற்பட்டு அங்குமிங்கும் ஓடியபோது, படகு கவிழ்ந்து விட்டதாக அதில் வந்தவர்கள் தெரிவித்தனர்.

இவ்வாறு அவர் கூறினார்.

300 பேர் கதி?

இந்தப் படகு விபத்தில் சிக்கிய சுமார் 300 பேர் கதி என்ன என்பது தெரியவில்லை. அவர்களில் பெரும்பாலானோர் கடலில் மூழ்கி பலியாகி இருக்கலாம் என கூறப்படுகிறது. எனவே சாவு எண்ணிக்கை உயரக்கூடும் என்ற அச்சம் நிலவுகிறது.

நன்றி
தினத் தந்தி

போப்ஷன்  

விபத்தில் உயிரிழந்த அனைவருக்கும் அழந்த அனுதாபங்கள்

இவர்களது புனித ஆத்மா சாந்தி அடையட்டும்.