பழநி : பக்தர்களின் அரோகரா கோஷம் விண்ணை பிளக்க பழநியில் தைப்பூச திருவிழா தேரோட்டம் நேற்று நடந்தது. பழநி தண்டாயுதபாணி சுவாமி திருக்கோயிலின் முக்கிய திருவிழாக்களில் ஒன்று தைப்பூச திருவிழாவிற்காக பல்வேறு பகுதிகளில் இருந்து லட்சக்கணக்கான பக்தர்கள் பாதயாத்திரையாக வருவது வழக்கம். இந்த ஆண்டு திருவிழா கடந்த 1ம் தேதி பெரியநாயகி அம்மன் கோயிலில் கொடியேற்றத்துடன் தொடங்கியது. கடந்த மாதத்தில் இருந்தே தினமும் ஆயிரக்கணக்கான பக்தர்கள் பாதயாத்திரையாக வந்து பழநியில் குவிந்தனர்.

பக்தர்கள் பால் காவடி, மயில் காவடி, பன்னீர் காவடி, அன்னக்காவடி, பறவைக்காவடி உள்ளிட்ட பல்வேறு காவடிகள் எடுத்து வந்தும், அலகு குத்தியும், ஆணி காலணி அணிந்து வந்தும் தங்களின் நேர்த்திக் கடன்களை நிறைவேற்றினர். முக்கிய நிகழ்ச்சியான தேரோட்டம் நேற்று நடந்தது.

இதையொட்டி காலை 5 மணிக்கு வள்ளி, தெய்வானை சமேதராக முத்துக்குமார சுவாமி தோளுக்கு இனியாள் வாகனத்தில் சண்முக நதிக்கு எழுந்தருளினார். அங்கு தீர்த்தம் வழங்கும் நிகழ்ச்சி நடைபெற்றது. தொடர்ந்து காலை 10.30 மணிக்கு மேஷ லக்னத்தில் சுவாமி திருத்தேரில் எழுந்தருளும் நிகழ்ச்சி நடந்தது. நேற்று மாலை 4.35 மணிக்கு தேரோட்ட நிகழ்ச்சி நடைபெற்றது.

தேரோட்டத்தையொட்டி வள்ளி தெய்வானை சமேதரரராய் முத்துக்குமாரசாமி மலர்களா லும், அணிகலன்களாலும் அலங்கரிக்கப்பட்டு சிறப்பு பூஜைகள் நடத்தப்பட்டது. தொடர்ந்து வீரபாகு, விநாயகர் சாமிகளுக்கு சிறப்பு பூஜைகள் செய்யப்பட்டு, தனித்தேர்களில் ரதவீதிகளில் உலா வரும் நிகழ்ச்சி நடந்தது. கூடியிருந்த ஆயிரக்கணக்கான பக்தர்களின் அரோகரா கோஷம் விண்ணை பிளக்க, கோயில் யானை தேரின் பின்புறம் தள்ள தேர் மாலை 4.45 மணிக்கு நிலையில் இருந்து ரத வீதிகளில் உலா வந்தது.

இரவு 7.30 மணிக்கு தந்த பல்லக்கில் தேர்கால் பார்த்தல் நிகழ்ச்சியும், ரத வீதிகளில் உலா வரும் நிகழ்ச்சியும் நடந்தது. நிகழ்ச்சியில் இந்துசமய அறநிலையத்துறை அமைச்சர் ஆனந்தன், கலெக்டர் நாகராஜன், நகராட்சி தலைவர் வேலுமணி உள்ளிட்ட பலர் கலந்து கொண்டனர். இன்று வையாபுரி கண்மாயில் வாண வேடிக்கையும், 10ம் தேதி மாலை 6 மணிக்கு மேல் தெப்பத்தேர் நிகழ்ச்சியும் நடைபெறுகிறது. அன்று இரவு 11.30 மணிக்கு கொடி இறக்குதலுடன் 10 நாள் தைப்பூச விழா நிறைவடைகிறது. 10 லட்சத்துக்கும் அதிகமான பக்தர்கள் பழநி நகரில் குவிந்திருந்தனர்.

திருச்செந்தூர்

அறுபடை வீடுகளில் 2ம் படை வீடான திருச்செந்தூர் சுப்பிரமணிய சுவாமி கோயிலில் தைப்பூச திருவிழாவையொட்டி கடந்த ஒரு வாரமாக பக்தர்கள் பாதயாத்திரையாக திருச்செந்தூர் வந்த வண்ணம் இருந்தனர். நேற்று தைப்பூசத்தையொட்டி கோயில் நடை அதிகாலை 3 மணிக்கு திறக்கப்பட்டு 3.30க்கு விசுவரூப தீபாராதனை, விஜயமார்த்தாண்ட அபிஷேகம் நடைபெற்றது. தொடர்ந்து சுவாமி அஸ்திர தேவர் கடலில் நீராடியபின் தீர்த்தவாரி நடந்தது.

தினகரன்

தோழமைக்கு ,
" அஞ்சு முகம் தோன்றில் ஆறுமுகம் தோன்றும்
வெஞ்சமரில் அஞ்சல் என வேல் தோன்றும்
நெஞ்சில் ஒரு கால் நினைக்கின் இருகாலும் தோன்றும்
முருகா என்றோதுவார் முன். "
- ஆற்றுப்படை நூலில் படித்த வரிகளே
முருகனை நினைத்ததும் தோன்றுகிறது.

பகிர்வுக்கு நன்றி தல

பழனிமலை முருகனுக்கு அரோகரா