நிதி இல்லை: மருத்துவமனை அதிகாரிகள் அதிருப்தி: ஒதுக்கீடு தாமதமாவது ஏன்?

அரசு மருத்துவமனைகளின் பராமரிப்பு பணிகளுக்காக, முதல் இரண்டு தவணைகளுக்குரிய நிதியை குறைந்த அளவிலும், தாமதமாகவும் மருத்துவக் கல்வி இயக்ககம் வழங்கி உள்ளதால், மருத்துவமனை அதிகாரிகள் அதிருப்தியில் உள்ளனர்.

நிதி ஒதுக்கீடு: மருத்துவக் கல்வி இயக்ககத்தின் கீழ் வரும் அனைத்து மருத்துவக் கல்லூரி மருத்துவமனைகளுக்குரிய முதல் மூன்று மாதங்களுக்கான பராமரிப்பு நிதியை, இரண்டு தவணைகளுக்கும் சேர்த்து மருத்துவக் கல்வி இயக்ககம் ஒதுக்கீடு செய்துள்ளது.இதில், சிறிய மற்றும் புதிய மருத்துவமனைகளுக்கு அதிக நிதி ஒதுக்கப்பட்ட நிலையில், பெரிய மருத்துவமனையான, சென்னை அரசு பொது மருத்துவமனைக்கு தேவையான நிதி ஒதுக்கப்படாமல், மருத்துவக் கல்வி இயக்ககம் பாரபட்சம் காட்டியுள்ளது.

பாரபட்சம்: மருத்துவமனைக்களுக்கான பராமரிப்பு நிதி, நான்கு தவணைகளாக பிரித்து வழங்கப்படும். இந்த ஆண்டின் முதல் தவணை நிதி, ஏப்ரல் மாதத்திற்குள் வழங்கி இருக்க வேண்டும். ஆனால், ஜூன் 5ம் தேதிக்குப் பிறகே, மருத்துவமனைகளின் தேவைகளுக்கேற்ப வழங்காமல், பாரபட்சம் பார்த்து நிதி ஒதுக்கப்பட்டுள்ளதாக, மருத்துவமனை நிர்வாகிகள் தெரிவித்து உள்ளனர்.

இதுகுறித்து மருத்துவமனை அதிகாரி ஒருவர் கூறியதாவது: கடந்த ஆண்டு முதல் தவணையாக வழங்கிய தொகையில் பாதியளவு கூட, இந்த ஆண்டு வழங்கவில்லை. மேலும், நோயாளிகள் அதிகம் வரும் பெரிய மருத்துவமனைகளுக்கு குறைந்த அளவு நிதி வழங்கப்பட்டுள்ளது. அதுவும், தாமதமாகவே வழங்கப்பட்டுள்ளதால், குறிப்பிட்ட காலத்திற்குள் பணியை முடிக்க முடியாத நிலை ஏற்படும்.இவ்வாறு அவர் கூறினார்.

இயக்ககம் நிர்ணயம்: மேலும், ஆண்டு தோறும், பொதுப் பணித்துறை அதிகாரிகள் தங்கள் மருத்துவமனையின் பராமரிப்பிற்கு தேவையான நிதியை, தங்கள் துறையின் மேல் அதிகாரிக்கு தெரிவிப்பர். பின், அந்தத் தொகை, பொதுப்பணித் துறையின் வழியாக, மருத்துவமனைகளுக்கு வழங்கப்படும். தற்போது, மருத்துவமனைகளுக்கு வேண்டிய நிதியை மருத்துவக் கல்வி இயக்ககமே நேரடியாக நிர்ணயித்து, அந்தந்த மருத்துவமனைகளுக்கு பட்டியலை அனுப்பியுள்ளது. அந்த, ஆணையில் பொதுப் பணித்துறை அதிகாரிகள் செய்ய வேண்டிய பணியையும், மருத்துவக் கல்வி இயக்ககமே நிர்ணயித்துள்ளது. இதனால், பொதுப் பணித் துறை அதிகாரிகள் அதிருப்தியில் உள்ளனர்.

அதிருப்தி: இதுகுறித்து, பொதுப் பணித்துறை அதிகாரி ஒருவர் கூறியதாவது:ஆண்டு தோறும் நாங்கள் கோரிய தொகையில், நான்கில் ஒரு பங்கு முதலில் வரும். ஆனால், இந்த ஆண்டு நாங்கள் கோரிய பணத்தை விட, மிகவும் குறைந்த அளவிலே முதலில் வந்துள்ளது. மேலும், மருத்துவமனையில் என்ன பணிமேற்கொள்ள வேண்டும் என, எங்கள் துறைக்குத் தான் தெரியும். இந்த ஆண்டு, நாங்கள் செய்ய வேண்டிய பணியை மருத்துவக் கல்வி இயக்ககம் நிர்ணயித்துள்ளது. இவர்கள் கூறியவாறு பணியை மேற்கொள்ள வேண்டுமா அல்லது எங்கள் துறையின் கீழ் பணிபுரிய வேண்டுமா என்ற குழப்பத்தில் நாங்கள் உள்ளோம்.இவ்வாறு அவர் கூறினார்.

இயக்குனர் கருத்து : மருத்துவக் கல்வி இயக்குனர் வம்சதாரா கூறும் போது, ""கடந்த ஆண்டு இரண்டு தவணைக்கான நிதி ஒதுக்கியது போலவே, இந்த ஆண்டும், அரசு விதியில் கூறியுள்ளவாறு முக்கியத்துவம் வாய்ந்த மருத்துவமனைக்கு அதிக நிதி ஒதுக்கப்பட்டு உள்ளது '' என்றார்

நன்றி:- தினமலர்

அவங்க என்னங்க பண்ண முடியும் - இரண்டு பை எலெக்ஷன் வந்துடுச்சு - அவங்க எஸ்டேட்ட வித்தா செலவு பண்ண முடியும். இந்த நிதிய அந்தப் பக்கம் அணை கட்டிட்டாங்க போல...