வறுமையும், வேலை இல்லா திண்டாட்டமும் மக்களை எந்த அளவிற்கு கொண்டு போகும் என்பதற்கு உதாரணங்கள்தான் இங்கு இடம் பெற்றுள்ள படங்கள். நம்மூரில் சில நரிக்குறவர்கள் குரங்குகளை பிடித்து அதற்கு ஆடை அணிவித்து "ஆடுரா ராமா' என்று குட்டிக்கரணம் போடவைத்தும், வேடிக்கை பார்ப்பவர்களை பார்த்து வணக்கம் போடவைத்தும், அவர்களது காலை தொட்டு காசு கேட்கவும் பழக்கிவைத்திருப்பார்கள்.

இதே செயலை நைஜீரியாவில் உள்ள இளைஞர்கள், அங்குள்ள ஆப்பிரிக்காவாழ் அபூர்வ குரங்குகளை வைத்து செய்கிறார்கள். குரங்கோடு நின்றால் பரவாயில்லை, காடுகளில் காணப்படும் கழுதைப்புலி, பாம்புகள் போன்றவற்றையும் கயிறுகளால் கட்டிவைத்து வேடிக்கைகாட்டி காசு பண்ணுகிறார்கள்.

நீண்ட நாட்களாக பயணம் செய்து இதை பதிவு செய்த பீட்டர் ஹியூகோ என்ற புகைப்படக் கலைஞர் கூறுகையில் கழுதைப்புலி என்பது புலியைவிட கொடூரமானது, ஆனால் அது ஒரு நாய்க்குட்டி போல அவர்களிடம் பணிந்து கிடப்பது ஆச்சர்யத்தை தந்தது என்கிறார்.

இதற்கு காரணமாக நைஜீரியா இளைஞர்கள் கூறும்போது குட்டியாக இருக்கும்போதே இந்த கழுதைப்புலியை கொண்டுவந்து அதற்கு சாதாரண உணவை கொடுத்து வளர்ப்போம். அதன் பிறவிக்குணத்தை ஆக்ரோஷமாக வெளிப்படுத்தும்போது குச்சி மற்றும் கம்பியால் அடி, அடி என்று அடித்து விடுவோம். இதன் காரணமாக சும்மா "உர்' என்றால் கூட இவனுக செமத்தியாய் அடித்துவிடுவார்கள் என, அடிக்கு பயந்து கழுதைப்புலிகள் எங்களிடம் அடிபணிந்து கிடக்கும் என்றனர்.

வனத்துறையினர் இதையெல்லாம் கண்டு கொள்வது இல்லை. ஏதாவது சொன்னாலோ, செய்தாலோ அப்புறம் அலுவலத்தில் வந்து உட்கார்ந்து கொண்டு சோறு போடு என்பார்கள் எப்படியோ போகட்டும் என்று விட்டுவிட்டதாக கூறுகின்றனர்.

வெளிநாட்டில் இருந்து வரும் பார்வையாளர்களுக்கு இதை வைத்து வேடிக்கை காட்டும்போது நிறைய காசு கிடைக்கும். அதே நேரம் நெருங்கிவர பயப்படுவார்கள். இதனால் கழுதை புலிகளின் வாயை சில நேரம் வலை போட்டு கட்டி வைத்து விடுவோம், என்றும் குறிப்பிட்டனர்.

வனமும், வனவிலங்குகளும்தான் ஒரு நாட்டின் இயற்கை மற்றும் செழுமையை வெளிக்காட்டும் விஷயம். ஆனால் இந்த விஷயத்தில் நைஜீரியா இதனை கண்டு கொள்ளாமல் இருப்பது எதிர்காலத்திற்கு நல்லதல்ல என்பது மட்டும் தெளிவு




dinamalar

ஜேன் செல்வகுமார் wrote:

நம்ம நிலைமை வீட்டில் எப்படி ஜேன் - இதேதானே?