பீட்சா - திரை விமர்சனம்

லோகு · லோகு Sun Oct 28, 2012 5:22 pm

பீட்சா - விமர்சனம்

அனைவருக்கும் வணக்கம், இந்த திரை விமர்சனம் பகுதிமீது எனக்கு நீண்ட நாட்களாகவே ஒரு கண்?!?!. அதனால் எதாவது ஒரு படத்தை விமர்சனம் செய்யலாம் என்று நினைத்துக் கொண்டு இருந்தேன். ஆனால் எழுதும் முதல் படம், மிகவும் திருப்திகரமாகவும் நல்ல படமாகவும் இருக்க வேண்டும் என்று முடிவில் இருந்தேன். அதன் விளைவே இந்த பீட்சா படத்தின் விமர்சனம்.

வெகுநாட்களாக திகில் படம் வராமல் காய்ந்து கிடந்த தமிழ் திரைக்கு அடிவயிற்றில் அட்ரினலின் அதிகமாக சுரக்க, அடிநாதமாக வந்த நீர்வீழ்ச்சி - பீட்சா!

பொதுவாக தமிழ் மக்களின் எண்ணங்கள்…. எண்ணங்கள் என்பதைவிட கேள்விகளே ஒரு படத்திற்கு செல்வதற்கு முன் அதிகமாக இருக்கும். அப்படிப்பட்ட கேள்விகள் அனைத்திற்கும் தன் வழியிலே, மிகவும் தனிவழியிலே பதில் அளித்திருக்கிறார் கார்த்திக் சுப்புராஜ் (எழுத்து-இயக்கம் இவருதாங்க…!)

அதே கண்கள், யாவரும் நலம் போன்ற படத்துக்குப் பிறகு ஒரு நல்ல திகில் படமாக இதை வைக்கலாம். பேய் படங்களில் வரும் அதே பயமுறுத்தல் காட்சிகள் இருந்தாலும், நீங்கள் எதிர்பாராத நேரத்தில் எதிர்பாராத கோணத்தில் தான் """கண்டிப்பாக""" அந்த திகில் காட்சி அமைந்திருக்கும் என்பதை என்னால் அடித்துக் கூறமுடியும். நீங்கள் "இப்போதான் பேய் வரப்போவுது…" என்று நினைத்தால் அங்கு உங்களுக்கு ஏமாற்றம்தான் மிஞ்சும். "இப்போ அந்த குழந்தை காணாம போயிடும் பாரு" என்று நினைத்தால் அந்த குழந்தை அங்கேயே வெகுநேரமாக அமர்ந்து உங்களை மொக்கை பண்ணும். எந்த தருணத்தையும் ஒருவராலும் கணிக்க முடியாத அளவில் திரைக்கதை இருந்ததாலே இறுதிவரை சீட்டுநுணியில் அமர்ந்து பார்க்க விளைந்தது. அனைவரும் பார்க்க வேண்டிய படம்.

பீட்சா விற்கும் ஆணின் கதைதான் என்றாலும் அவர் பீட்சா விற்க சென்று மாட்டிக்கொள்ளும் இடத்தையே முழுக்களமாக எடுத்துக் கையாண்டிருப்பது அருமை, ஆனால் முதற்பாதி முழுதுமே அந்த வீடும் அதன் திக்லுமாக செல்வது கொஞ்சம் சலிப்பு தந்தாலும் பின்னணி இசையும் காட்சிவெட்டுக்களும் தலையில் அடித்து அமரவைக்கிறது. எப்போதும் திகில் படத்தில் நன்றாக போய்க்கொண்டிருந்தால் நடுவில் ஒரு டாக்டர் வந்து "ஸ்ப்லிட் பெர்சனாலிட்டி, மல்டி பெர்சனாலிட்டி டிசார்டர்" போன்ற வார்த்தைகளை கூறி பேயின் மேல் உள்ள பயத்தை குறைத்துவிடுவர். ஆனால் இப்படத்தில் டாக்டர் வராதது நல்ல விசயம். படத்தில் பல இடங்களில் நீங்கள் ஊகித்துக் கொண்டிருக்கும் எண்ணங்களை உடைத்து, அதை கேலியும் செய்திருக்கிறார் இயக்குநர். ஒவ்வொரு மனிதருக்கும் (ஆவிகளுக்கும் கூட) உண்டான தேவைகள் மற்றும் அதற்காக அவர்கள்(அவை) செய்யும் தினவாழ்க்கை எதார்த்தங்களையும் கையாள இயக்குநர் மறக்கவில்லை. என்னால் அடித்துக் கூற முடியும் கடைசி இருபது நிமிடங்கள் உச்சகட்டத்தை நெருங்கும் சமயத்தில் வரும் """அந்த""" திருப்பத்தை யாராலும் ஊகிக்க முடியாது என்று.

"நினைக்குதேதேஏஏஏ…." என்று அமைதியாக ஆரம்பிக்கும் கானா பாலாவின் குரல் அடங்கிய பாடல் போகப்போக நம் அடிவயிற்றில் புளியைக் கரைக்க ஆரம்பிக்கும் இடங்கள் அற்புதம். சந்தோஸ் நாராயணனின் பின்னணி இசை எங்கெங்கு இருக்கவேண்டுமோ ஆங்காங்கே மட்டும் அடக்கிவாசித்து, பயம் பெருக்கெடுக்க உதவுகிறது. ஒரு டார்ச் லைட் அடித்து இருட்டில் கதாநாயகன் உலவுவதை மிகவும் அழகாக காட்டமுடியும் என நிரூபித்த முதல் தமிழ் படம் எனக் கூறலாம். காட்சிகளும், கோணங்களும் நம்மை ஒலியை குறைத்துப் பார்த்தால்கூட பயமுறுத்தும் என்பதில் ஐயமில்லை.

மொத்தத்தில் 2.30 மணிநேரம் உங்கள் எண்ணங்கள் அனைத்தையும் உடைத்து லாஜிக் எதையும் நம்பாமல் ஒரு சுத்தமான பேய் படம் (அல்லது) திகில் படம் அளித்துள்ளனர். படத்தைப் பார்த்துவிட்டு எனக்கு பீன்னூட்டம் இடுங்கள். எனக்கு தெரிந்து அதிகமாக குறைகள் ஏதும் இல்லை. யாரேனும் கண்டால் கூறுங்கள். இதைப் படித்துவிட்டு பத்து பேர் அரங்குக்குச் சென்றால் கூட ஒரு நல்ல படத்தை அறிமுகப் படுத்தியதில் நான் பெருமிதம் கொள்வேன்.

நன்றி………!!!!