பெங்களூரு: உச்சநீதிமன்ற உத்தரவுபடி, தமிழகத்துக்கு, மைசூரு கே.ஆர்.எஸ்., அணையிலிருந்து, நள்ளிரவில் திடீரென்று தண்ணீர் திறக்கப்பட்டது. இதற்கு எதிர்ப்பு தெரிவித்து, பல்வேறு கன்னட அமைப்புகள், விவசாய சங்கங்கள் போராட்டம் அறிவித்துள்ளனர். தமிழக பஸ்களை கர்நாடகத்துக்குள் விடமாட்டோம், என்று கன்னட ரக்ஷன வேதிகே எச்சரித்துள்ளது.

தமிழகத்துக்கு தினமும் பத்தாயிரம் கியூசெக்ஸ் தண்ணீர் வீதம், டிசம்பர் ஒன்பதாம் தேதி வரை ஐந்து நாட்களுக்கு ஐம்பதாயிரம் கியூசெக்ஸ் தண்ணீர் விடுமாறு, உச்சநீதிமன்றம் உத்தரவிட்டது. இதற்கு கர்நாடகாவில் பெரும் எதிர்ப்பு கிளம்பியது. காவிரி நதி நீர் பாதுகாப்பு கமிட்டி தலைவர் மாதே கவுடா, கன்னட அமைப்பினர், விவசாய சங்கத்தினர் போர்க்கொடி தூக்கினர். தமிழகத்துக்கு தண்ணீர் திறந்துவிட அனுமதிக்கமாட்டோம். கே.ஆர்.எஸ்., அணையை முற்றுகையிடுவோம் என்று எச்சரித்தனர்.

கர்நாடக முதல்வர் ஜெகதீஷ் ஷெட்டரும், தண்ணீர் திறந்து விட மாட்டோம், என்று உறுதியளித்த பின்னர், மாதே கவுடா தனது போராட்டத்தை வாபஸ் பெற்றார்.இன்று காவிரி கண்காணிப்பு குழு கூட்டம் டில்லியில் நடக்கவுள்ளது. இது தொடர்பாக ஆலோசனை நடத்த, முதல்வர் ஜெகதீஷ் ஷெட்டர் டில்லி புறப்பட்டு சென்றார்.

இந்நிலையில், நேற்றிரவு 11 மணியளவில் மைசூரு கே.ஆர்.எஸ்., அணை திறக்கப்பட்டதாக தகவல்கள் வெளியானது. இதையறிந்த விவசாய சங்கத்தினரும், கன்னட ரக்ஷன வேதிகே நாராயண கவுடா உட்பட பலர் கடும் கண்டனம் தெரிவித்தனர்.

நாராயணகவுடா கூறுகையில், ""முதல்வர் ஷெட்டர் எங்களை ஏமாற்றி விட்டார். நாளை (இன்று) முதல், பெரியளவில் போராட்டம் வெடிக்கும். தமிழகத்திலிருந்து எந்த பஸ்களையும் கர்நாடகத்துக்குள் நுழைய விடமாட்டோம். அதே போன்று கர்நாடகத்திலிருந்து எந்த பஸ்களையும் விடமாட்டோம். முதல்வர் ஷெட்டர் வீட்டின் முன்பு, தர்ணா நடத்துவோம் என்று எச்சரித்துள்ளார்.

மைசூரு கே.ஆர்.எஸ்., அணையை சுற்றி போடப்பட்டுள்ள 144 தடை உத்தரவை மீறுவோம். கே.ஆர்.எஸ்., அணையை முற்றுகையிடுவோம் என்று விவசாய சங்கங்கள் அறிவித்துள்ளன.

மாநில விவசாயிகள் சங்க தலைவர் புட்டணய்யா கூறுகையில், ""கர்நாடக விவசாயிகளை ஏமாற்றி, தமிழகத்துக்கு பா.ஜ., அரசு தண்ணீர் திறந்து விட்டுள்ளது. இந்த அரசுக்கும், விவசாயிகளுக்கும் எந்த சம்பந்தமும் இல்லை. தண்ணீர் திறக்கமாட்டோம் என்று கூறிவிட்டு, அவசர அவசரமாக ஏன் தண்ணீர் திறக்க வேண்டும். ஜெயலலிதாவை திருப்திபடுத்தவே, ஷெட்டர் இவ்வாறு செய்துள்ளார்,'' என்றார்.

இது கர்நாடக விவசாயிகளின் போராட்டமாக தெரியவில்லை.
அரசியல் நோக்கர்களின் எதிர்பார்த்த நோக்கத்திற்கான களமாகவே காணப்படுகிறது