ஒடிசா, ஆந்திராவை மிரட்டும் ஹுட் ஹுட் புயல் !

ஒடிசா, ஆந்திராவை மிரட்டும் ஹுட் ஹுட் புயல் : முன்னெச்சரிக்கை நடவடிக்கை தீவிரம் !



ஆந்திரா: ஆந்திரா மற்றும் ஒடிசா கடற்கரை பகுதிகளை மணிக்கு 150கி.மீ. வேகத்தில் ஹுட் ஹுட் புயல் தாக்கும் என்று எச்சரிக்கப்பட்டுள்ளதால் முன்னெச்சரிக்கை நடவடிக்கைகள் முடுக்கிவிடப்பட்டுள்ளன. அந்தமான் நிக்கோபர் அருகே வங்ககடலில் உருவாகியுள்ள புயலுக்கு ஹுட் ஹுட் என்று பெயரிடப்பட்டுள்ளது. லாங் தீவில் நிலை கொண்டுள்ள இந்த புயல் மேலும் தீவிரமடைந்து வலுவான புயலாக ஆந்திர மாநிலம் விசாகபட்டினம் மற்றும் ஒடிசா மாநிலம் கோபால்பூர் இடையே வரும் 12-ம் தேதி கரையை கடக்கும் என்று எதிர்பார்க்கப்படுகிறது.

அப்போது மணிக்கு 150கி.மீ. வேகத்தில் பலத்த காற்று வீசும் என்று ஒடிசாவின் கடலோர மாவட்டங்களில் கனமழை பெய்யும் என்றும் எச்சரிக்கப்பட்டுள்ளது. புயல் எச்சரிக்கையை அடுத்து ஒடிசாவில் பாரடீப், கோலாப்பூர் ஆகிய துறைமுகங்களில் 2-ம் எண் புயல் கூண்டு ஏற்றப்பட்டு மீனவர்கள் கடலுக்கு செல்ல வேண்டாம் என்றும் அறிவுறுத்தப்பட்டுள்ளன. கடந்த ஆண்டு பைலின் புயல் தாக்கிய போது முன்னெச்சரிக்கை நடவடிக்கைகள் மூலம் சிறப்பாக சமாளிப்பதற்காக ஒடிசா அரசு உளக அளவில் பாராட்டு பெற்றது.

அதே போல் இந்த முறையும் உயரிச்சேதம் ஏதும் இல்லாமல் புயல் பாதிப்பை சமாளிக்க மாநில அரசு திட்டமிட்டுள்ளது. இது தொடர்பாக தலைநகர் புவனேஷ்வரில் முதலமைச்சர் நவின்பட்நாயக் தலைமையில் ஆய்வு கூட்டம் நடைபெற்றது. ஒடிசாவில் உள்ள பாலாசோர், பாத்ராத், ஜெகத்சிங்பூர், பூரி, கஞ்சம், குர்தா, கஜபதி உள்ளிட்ட 16 மாவட்டங்களுக்கு புயல் எச்சரிக்கை விடப்பட்டுள்ளது.

அவசர நிலையை எதிர்கொள்ள பேரிடர் மீட்புபடையினரும், தீயணைப்பு துறையினரும் தயார் நிலையில் வைக்கப்பட்டுள்ளனர். ஆந்திராவிலும் முன்னெச்சரிக்கை தீவிரப்படுத்தப்பட்டுள்ளன. ஹுட் ஹுட் புயலால் தமிழகத்திற்கு எந்த பாதிப்பும் இருக்காது என்று வானிலை மையம் தெரிவித்துள்ளது குறிப்பிடத்தக்கது.

தினகரன்