பூமியில் புதையுண்டு கிடக்கும் கார்பன்-டை-ஆக்சைடு

**சிவா** · **சிவா** Fri 24 Apr 2015 - 3:35

நிலக்கரி, பெட்ரோல் போன்ற பூமிக்கடியில் உள்ள எரிபொருட்களை எரிய விடுதல், காடுகளை அழித்தல், மரங்களை எரித்தல் போன்றவற்றின் மூலம் 600 கோடி மெட்ரிக் டன் அளவு கொண்ட கார்பன், கார்பன்-டை- ஆக்சைடு வடிவில் காற்று மண்டலத்தில் கலந்துவிடுகிறது என விஞ்ஞானிகள் கணக்கிடுகின்றனர்.

ஆனால் இதில் சுமார் பாதியளவு கார்பன் மட்டுமே நமது வாயு மண்டலத்தில் தங்கியுள்ளது. பூமியில் இருந்து வெப்பம் வாயு மண்டலத்தை மீறி வெளியேறிச் செல்ல முடியாமல் தடுத்து மேலும் வெப்பமடையக் காரணமாக இருப்பதும் இந்தக் கார்பனே. ஆனால் மீதி 300 கோடி மெட்ரிக் டன் அளவுள்ள கார்பன் ஒவ்வோர் ஆண்டும் நமது வாயு மண்டலத்தில் இருந்து எங்கோ மறைந்துவிடுகிறது. அது எப்படி மறைகிறது என்பதுதான் புரியாத புதிராக உள்ளது. இதைக் கண்டுபிடிப்பது தலையாய விஷயமாகக் கருதப்படுகிறது.

இவ்வாறு மறைந்துபோன கார்பன் அனைத்தும் பூமியின் ஏதோ ஒரு மூலையில் குவிந்து கிடக்கலாம் என்றும், ஏதோ ஒரு நிகழ்வின்போது இந்த ஒட்டுமொத்த கார்பனும் வெளியேறும்போது பூமியில் பேராபத்து விளையலாம் என்றும் விஞ்ஞானிகள் எச்சரிக்கை விடுகின்றனர்.

எதிர்காலத்தில் இப்படிப்பட்ட ஆபத்து எப்போதும் நிகழலாம் என்று அச்சம் தெரிவிக்கின்றனர் விஞ்ஞானிகள். பூமி வெப்பமடைந்தால் இந்தக் கார்பன் முழுவதும் கார்பன்-டை-ஆக்சைடாக மாறி திடீரென வெளியாகலாம். இதன் காரணமாகத் தீவிர நிலை ஏற்படலாம் என்றும், ஏற்கனவே வாயு மண்டலத்தில் உள்ள கார்பனும் மறைந்துள்ள கார்பனும் சேர்ந்து பூமியின் வெப்பத்தை மேலும் அதிகரிக்கும் என்றும் விஞ்ஞானிகள் மேலும் எச்சரிக்கின்றனர்.

புதைபடிவ எரிபொருளை எரிப்பதால் ஏற்படும் கார்பன்-டை-ஆக்சைடின் பெரும்பகுதியானது வாயு மண்டலத்தில் சேரும். பெரும்பகுதியானது பூமியின் வடபகுதிக் காடுகளின் தாவரங்களிலும், அப்பகுதியிலுள்ள மண்ணினாலும் உறிஞ்சப்படுவதாக ஆய்வுகள் கூறுகின்றன.

கார்பன் பல்லாயிரக்கணக்கான ஆண்டுகளாகப் புதையுண்டு கிடப்பதை ஆய்வுகள் கூறினாலும் இந்த வாயுக்கள் எவ்வாறு புதையுண்டது என்பது இதுவரை புதிராகவே உள்ளது.

-ஆர்.ஆர். பூபதி, திண்டுக்கல்.