புங்குடுதீவு மாணவி படுகொலை

புங்குடுதீவு மாணவி படுகொலையை கண்டித்து நேற்று முன்தினம் இடம்பெற்ற ஆர்ப்பாட்டத்தின் போது நீதிமன்றத்தின் மீது தாக்குதல் நடத்தினார்கள் என்ற குற்றச்சாட்டின் பேரில் கைது செய்யப்பட்ட 129பேரும் நேற்று நீதிமன்றில் ஆஜராக்கப்பட்டனர். சிலரை பொலி ஸார் நீதிமன்றுக்கு அழைத்துச் செல்வதையும் விசேட அதிரடிப்படையினர் நீதிமன்றத்தின் முன்னால் காவல் கடமையில் ஈடுபட்டிருப்பதையும் ஊர்காவற்றுறை நீதிமன்றத்தின் முன்னால் நேற்றுக் காலை போராட்டத்தில் ஈடுபட்டிருந்த மக்களையும் படங்களில் காணலாம்.

புங்குடுதீவு மகா வித்தியாலய மாணவி வித்தியாவின் படுகொலைக்கு கிளிநொச்சி மத்திய மகா வித்தியாலயம் தேசிய பாடசாலை பழைய மாணவர் சங்கம் கடும் கண்டனம் தெரிவித்துள்ளது.

கிளிநொச்சி மத்திய மகா வித்தியாலய (தேசிய பாடசாலை) பழைய மாணவர் சங்கம் புங்குடுதீவில் கொலை செய்யப்பட்ட மாணவி சி.வித்தியாவிற்கு வணக்கம் செலுத்தியுள்ளது.

பழைய மாணவர் சங்கம் சார்பாக அதன் செயலாளர் பொன்.காந்தன் ஊடகங்களுக்கு விடுத்துள்ள அறிக்கையில்,

யாழ்ப்பாணம் புங்குடுதீவு மகா வித்தியாலய உயர்தர வகுப்பு மாணவி சிவலோகநாதன் வித்தியா மிக மோசமான முறையில் வன்புணர்வுக்கு உட்படுத்தப்பட்டு கொலை செய்யப்பட்டிருப்பது கண்டு கிளிநொச்சி மத்திய மகா வித்தியாலய பழைய மாணவர் சங்க சமூகமாகிய நாம் அதிர்ச்சியும் கவலையும் அடைகின்றோம்.

எமது சமுதாயத்தில் எதிர்காலத்தில் நல்வாழ்வு வாழக்கூடிய ஒரு மாணவியின் எதிர்காலம் திட்டமிட்டு இரக்கமற்ற மிருகத்தனமான சிந்தனை உள்ளவர்களால் முடித்து வைக்கப்பட்டுள்ளது.

இது இருக்கின்ற ஏனைய மாணவ சமுதாயத்தின் மத்தியில் குறிப்பாக மாணவிகள், பெற்றார்கள் மத்தியிலும் அச்சத்தையும் உளவியல் தாக்கத்தையும் ஏற்படுத்தியுள்ளது.

இலங்கையின் கல்வியில் முக்கிய அடையாளமாக கருதப்படும் யாழ்ப்பாண மாவட்டத்தில் இத்தகையதொரு மிலேச்சத்தனமான சம்பவம் இடம்பெற்றிருப்பது எல்லோரையும் அதிர்ச்சிக்குள்ளாக்கியுள்ளது.

எமது மாணவர்கள் எமது சமுகத்தின் மிகப் பெரும் சொத்துக்கள். எமது சமுதாயம் பெற்றார்கள் மாணவர்களை சுற்றி ஒரு பெரும் கனவை வளர்த்து வைத்துள்ளார்கள். அவர்கள் எமது சமுதாயத்தை புகழ்மிக்கதாக வைத்திருப்பார்கள் என்று எதிர்பார்த்து மாணவர்களுக்காக அல்லும்பகலும் பாடுபடுகின்றார்கள்.

இத்தகைய சூழ்நிலையில் புங்குடுதீவில் மாணவி சி.வித்தியாவிற்கு ஏற்ப்பட்டுள்ள கதி கவலை அளிக்கின்றது.

இந்த நிலைக்கு உள்ளாக்கிய குற்றவாளிகளுக்கு கடுமையான தண்டனை வழங்கப்பட வேண்டுமென கிளிநொச்சி மத்திய மகா வித்தியாலய தேசிய பாடசாலை பழைய மாணவர் சங்க நிர்வாகம் சார்பாக வேண்டுகோள் விடுக்கின்றோம்.

புங்குடுதீவு மகா வித்தியாலய மாணவி சிவலோகநாதன் வித்தியாவின் இழப்பால் துயருற்றிருக்கும் அவரது குடும்பத்துக்கும் பாடசாலை சமூகத்துக்கும் எமது ஆழ்ந்த இரங்கலை தெரிவித்துக் கொள்கின்றோம் என அந்த ஊடக அறிக்கையில் தெரிவிக்கப்பட்டுள்ளது.
=
தமிழ்வின்.காம்