ஒக்கி' புயல் அறிவிப்பு தாமதம் காரணம் யார்?

ஒக்கி' புயல் குறித்து, வானிலை மையம் முன் எச்சரிக்கை செய்யாதது குறித்து, மத்திய அரசு அதிகாரிகள் விசாரணையை துவக்கி உள்ளனர்.

'ஒக்கி' புயல் அறிவிப்பு தாமதத்திற்கு காரணம் யார்?  

'டிசம்பரில் மீண்டும் புயல், கனமழை வரலாம்' என, வானிலை ஆய்வாளர்கள் கணிப்புகளை வெளியிட்டனர். ஆனால், இந்திய வானிலை ஆய்வு மையம், தமிழக வருவாய்த்துறை மற்றும் தேசிய பேரிடர் மேலாண்மை ஆணையம், இதை உறுதி செய்யவில்லை.

இந்நிலையில், தென்மேற்கு வங்க கடலில் உருவான காற்றழுத்த தாழ்வு பகுதி, இந்திய பெருங்கடலுக்கு நகர்ந்து, காற்றழுத்த தாழ்வு மண்டலமாகவும், பின், புயலாகவும் மாறியது.
'ஒக்கி' என, பெயரிடப்பட்ட இந்த புயல், நவ.,30ல், சூறாவளி காற்றுடன் குமரியை துவம்சம் செய்தது. திருநெல்வேலி மாவட்டத்தில், அதிகபட்சம், 45 செ.மீ., மழை கொட்டியது.

இந்த புயலால், கன்னி யாகுமரி மாவட்டம் மற்றும் கேரள பகுதிகளில், கடலுக்குள் சென்ற ஆயிரக்கணக்கான மீனவர்கள் மாயமாகி உள்ளனர். அவர்களில் சிலர் இறந்தும், பலர் உயிருடனும் மீட்கப்பட்டு வருகின்றனர். நுாற்றுக்கணக்கான மீனவர்களின் நிலை

என்ன ஆனது என்று, இன்னும் தெரியவில்லை. அதனால், கன்னியாகுமரி மாவட்டம், கேரளாவில் மீனவ கிராமங்களில் சோகம் சூழ்ந்துள்ளது.

எந்த முன் எச்சரிக்கையும் இல்லாததால், கடலுக்குள் வழக்கம்போல் மீன்பிடிக்க சென்ற மீனவர்கள், ராட்சத அலையிலும், சூறாவளி காற்றிலும் சிக்கி, மிக மோசமான பாதிப்பை சந்தித்துள்ளனர்.

இந்த பிரச்னை குறித்து, சென்னை வானிலை ஆய்வு மையம், இந்திய வானிலை ஆய்வு மையம், ராடார் மையம், திருவனந்தபுரம் வானிலை மையம் ஆகியவற்றில் பணியில் இருந்தவர்கள், அளித்த வானிலை அறிவிப்பு விபரங்கள் குறித்து, மத்திய அரசு அதிகாரிகள் விசாரணை நடத்த துவங்கியுள்ளனர்.உள்துறை உத்தரவின்படி, இந்த விசாரணை துவங்கி உள்ளதாக தெரிகிறது.

ஒக்கி புயல் உருவாகி, நவ., 29 நள்ளிரவு முதல், பிற்பகல், 3:00 மணி வரை, கன்னியாகுமரியில், சூறாவளி காற்று வீசி, கனமழை கொட்டியது. ஆனால், நவ., 30, நண்பகல், 12:00 மணிக்கு தான், 'ஒக்கி' புயல் உருவாகி உள்ளதாக, அதிகாரப்பூர்வ அறிவிக்கையை, இந்திய வானிலை ஆய்வு மையம் வெளியிட்டுள்ளது.

முன்னதாக, தீவிர காற்றழுத்த தாழ்வு மண்டலம்,புயலாக மாறும் வாய்ப்புள்ளதாக, அரசுத் துறை அதிகாரிகளுக்கு, காலை, 9:30 மணிக்கு குறுஞ்செய்தி எச்சரிக்கையில், இந்திய வானிலை மையம் தெரிவித்தது.

இந்த குறுஞ்செய்தி அனுப்பிய நேரத்தில், குமரியில் புயலின் தாக்கம் ஏற்பட்டு, பல மணி நேரமாகி இருந்தது.அதேபோல், புயல் உருவாகியுள்ளதாக,

சென்னை வானிலை ஆய்வு மையம், நவ., 30, பகல், 12:45 மணிக்கு தான், ஊடக சந்திப்பில் அறிவிப்பை வெளியிட்டது. அதனால், முன் எச்சரிக்கை எதுவும் மீனவர்களுக்கு கிடைக்கவில்லை.

வானிலை மையம் அறிவிப்பு வெளியிட்ட நேரத்தில், கடலுக்குள் ஏற்கன வே சென்ற மீனவர்களை, துவம்சம் செய்த புயல், கேரளாவை நோக்கி, நகர்ந்து கொண்டு இருந்தது.அதேபோல் தமிழக வருவாய்த் துறை, பொதுப்பணித் துறை, கடற்படை, துறைமுகம் என, எந்தத்துறையும், புயல் தாக்குவதற்கு முன், பொதுமக்களுக்கும், ஊடகத்திற்கும் தகவல் தெரிவிக்கவில்லை என, பாதிக்கப்பட்டவர்கள் குமுறுகின்றனர்.

இதேபோல், நவ., 1, 2ல், தமிழகத்தின் தென் மாவட்டங்களில் கன மழை பெய்யும் என, வானிலை மையம் எச்சரித்தது. ஆனால், இதற்கு மாறாக, சென்னையில் கன மழை பெய்து, வெள்ளக்காடானது.

- நமது நிருபர் -தினமலர்