சபரிமலையில் பொன் ராதாகிருஷ்ணனை தடுத்து நிறுத்திய எஸ்.பி யதிஷ் சந்திரா இட மாற்றம்: கேரளா அரசு உத்தரவு!

திருவனந்தபுரம்: சபரிமலையில் மத்திய நெடுஞ்சாலைத்
துறை இணையமைச்சர் பொன்.ராதாகிருஷ்ணனை தடுத்து
நிறுத்திய காவல்துறைக் கண்காணிப்பாளர் (எஸ்பி)
யதீஸ்சந்திராவை இடமாற்றம் செய்து உத்தரவிட்டுள்ளது
கேரள அரசு.

சபரிமலையில் நடக்கும் போராட்டங்களைக் கட்டுப்படுத்த
பல்வேறு கட்டுப்பாடுகளை பக்தர்களுக்கு போலீஸார்
விதித்துள்ளனர். அதன்படி, பக்தர்களின் வாகனங்கள்
சபரிமலையின் நுழைவாயிலான நிலக்கல்லில் நிறுத்தப்பட்டு,
அங்கிருந்து அரசு பேருந்தில்தான் பம்பை செல்ல வேண்டும்.

இந்நிலையில், கடந்த புதன்கிழமை காலையில் மத்திய
அமைச்சர் பொன். ராதாகிருஷ்ணன் சபரிமலைக்கு இருமுடி
கட்டி சென்றார். அவருடன் பாரதிய ஜனதா கட்சி நிர்வாகிகளும்
சென்றனர்.

இவர்களின் கார், நிலக்கல்லை அடைந்ததும், அங்கு
பாதுகாப்புப் பணியில் இருந்த மாவட்டக் காவல்துறைக்
கண்காணிப்பாளர் யதீஸ்சந்திரா, மத்திய அமைச்சருடன்
வந்தவர்களின் காரை தடுத்து நிறுத்தினார்.

அமைச்சரின் காரைத் தவிர மற்றவர்களின் வாகனங்கள்
நிலக்கல் தாண்டி அனுமதிக்கப்படாது என்று கண்டிப்பாகக்
கூறினார். இதனால், அமைச்சர் பொன். ராதாகிருஷ்ணனுக்கும்,
எஸ்பி யதீஸ்சந்திராவுக்கும் இடையே வாக்குவாதம் ஏற்பட்டது.

பிறகு, பாரதிய ஜனதா நிர்வாகிகளின் கார்களை அ
னுமதிக்காததால் பொன். ராதாகிருஷ்ணன் நிலக்கல்லில்
இருந்து அரசு பஸ்ஸில் பம்பை சென்றார்.
இது நாடு முழுவதும் பரபரப்பாக பேசப்பட்டது.

பொன்.ராதாகிருஷ்ணனை தடுத்து நிறுத்திய
எஸ்பி யதீஸ்சந்திரா மீதும், கேரள அரசு மீதும் மத்திய
உள்துறை அமைச்சகத்தில் கேரள பாஜக புகார் அளித்தது.

இந்நிலையில், மத்திய இணையமைச்சர்
பொன் ராதாகிருஷ்ணனை தடுத்து நிறுத்திய காவல்
துறைக் கண்காணிப்பாளர் யதீஸ்சந்திராவை ஏற்கனவே
பணியாற்றி வந்த திருச்சூர் ஆணையராக மாற்றி கேரளா
அரசு உத்தரவிட்டுள்ளது.

மேலும் திருச்சூர் காவல்துறைக் கண்காணிப்பாளர் இருந்த
புஷ்பாகரனை நிலக்கல் பகுதியில் நியமிக்கப்பட்டுள்ளனர்.

நாளை மீண்டும் கேரளா சட்ட சபை கூடும் நிலையில் இந்த
விவகாரத்தை எதிர்க்கட்சிகள் சர்ச்சையை கிளப்ப உள்ளதால்
முன் கூட்டியே அரசு நடவடிக்கை எடுத்துள்ளதாக
கூறப்படுகிறது.
-
--------------------------
தினமணி