கவிஞர் வைரமுத்துவுக்கு தேசிய இலக்கிய விருது

**சிவா** · **சிவா** Mon Mar 23, 2009 12:23 am

கவிஞர் வைரமுத்துவுக்கு தேசிய இலக்கிய விருதான 'சாதனா சம்மான்' விருதினை இந்திய மொழிக்கழகம் வழங்குகிறது. கொல்கத்தாவில் இயங்கி வரும் இந்த கழகம் தேசிய அளவில் 14 மொழிகளில் சிறந்த படைப்பாளிகளை தேர்வு செய்து விருதுகளை வழங்கி வருகிறது.

இந்த ஆண்டு இலக்கியம், நாவல், திரைப்பாட்டு மூலமாக கவிஞர் வைரமுத்து இந்திய இலக்கியத்திற்கு செய்த பங்களிப்பிற்காக தேசிய இலக்கிய விருதுக்கு தேர்ந்தெடுக்கப்பட்டுள்ளார். 51 ஆயிரம் ரூபாய் பொற்கிழியும், பாராட்டு பட்டயமும் வைரமுத்துவுக்கு வழங்கப்படும். இந்த விருது தமக்கு மகிழ்ச்சி தருவதாக வைரமுத்து தெரிவித்துள்ளார். அடுத்த மாதம் 18ஆம் தேதி கொல்கத்தாவில் நடக்கும் விழாவில் இந்த விருது வழங்கப்படுகிறது.

**Tamilzhan** · **Tamilzhan** Mon Mar 23, 2009 12:34 am

தமிழ்த்தாய் வாழ்த்து - வைரமுத்து
விழித்துப் பார்க்கும்
விடியலொவ்வொன்றிலும்
தலையணை மீது
தலையிருந்ததில்லை

விரலோடு நுரைவிரவாமல்
பல்துலக்க இன்னும்
பயிற்சியில்லை

குளிக்கும் வரைக்கும்
ஞாபகம் இருக்கும்
குளிக்கும்போது
மறந்தே போகும்
காதுமடல் தினமும்
கழுவியதில்லை

ஏதேனுமொரு விரலில்
ரத்தக் கோடில்லாமல்
நானறிந்து இதுவரை
நகம் களைந்ததில்லை

ஒரே பாய்ச்சலில்
உள்ளாடைக்குள்
கால் நுழைத்த சாதனை
நிகழ்ந்ததே இல்லை

சீப்போடு என்னதான்
சிநேகம் பிடித்தாலும்
ஒரே வகிர்வில்
வகிடு கொண்டதில்லை

எது உள்
எது வெளி
பட்டிமன்றம் முடியாமல்
காலுறை அணிந்ததில்லை

நேற்றுவரைக்கும்
ஊற்றுப்பேனாவில்
சிந்தாமல் மையிட்ட
சேதியில்லை

பசிக்காத மேஜைக்கெல்லாம்
பந்திவைக்காமல்
சுயமாய்ப் பரிமாறிச்
சோறுண்டதில்லை

ஓடும் ரயிலில்
பிடிமானமில்லாமல்
சிறுநீர் கழிக்கும் திறனுமில்லை

எந்தவொரு மேடையிலும்
பொன்னாடையோ
கைக்குட்டையோ
போக்காமல் வந்ததில்லை

உடையில் சிறிது
கறை சேராமல்
பச்சை இளநீர்
பருகியதில்லை

மனிதனோ நானோ
மரமோ விலங்கோ
காயப்படாமல் சைக்கிள் ஓட்டும்
கலை இன்னும்
கைவரவில்லை

திரும்பத் திரும்பத்
திருத்தியும் திருத்தியும்
முற்றும் பிழை நீக்க
முடியவில்லை

இத்தனை ஓட்டைகள்
இருப்பினும் என்னில்
வழியாதெப்படி
வந்து நிறைந்துளாய்
என் தமிழே?

கவிஞர் வைரமுத்துவுக்கு தேசிய இலக்கிய விருது

கவிஞர் வைரமுத்துவுக்கு தேசிய இலக்கிய விருது

Re: கவிஞர் வைரமுத்துவுக்கு தேசிய இலக்கிய விருது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக