வீடுதோறும் இருக்கிறது கிணறு: குடிநீர் பஞ்சம் இவர்களுக்கு இல்லை

**ayyasamy ram** · **ayyasamy ram** Mon May 20, 2019 7:13 am

-
பெரம்பலுார்:
அரியலுார் அருகே உள்ள இரண்டு கிராமங்களைச் சேர்ந்த
மக்கள், வீட்டுக்கு வீடு கிணறு அமைத்து, வறட்சி நிலவும்
இந்த நேரத்திலும், பஞ்சமில்லாமல் குடிநீர் பருகுவதுடன்,
விவசாயமும் செய்து வருகின்றனர்.

அரியலுார், ஜெயங்கொண்டத்தில் இருந்து, 2 கி.மீ.,யில்,
தெற்குகரைமேடு கிராமம் உள்ளது.இக்கிராமத்தில், வீட்டுக்கு
வீடு கிணறு அமைத்து, கிணற்று நீரையே, குடிநீராக பயன்
படுத்துகின்றனர்.

குடிநீருக்கு பயன்படுத்தியது போக, விவசாயத்திற்கும், பம்ப் செட்
மூலம் நீரைப் பாய்ச்சி, விவசாயம் செய்கின்றனர்.'மினரல்
வாட்டரையோ, லாரி மற்றும் டிராக்டர்களில் விற்பனை செய்யப்
படும் தண்ணீரையோ, ஒருநாளும் காசு கொடுத்து வாங்கும்
அவசியம் எங்களுக்கு வந்தது கிடையாது' என்கின்றனர்,
இக்கிராம மக்கள்.

புதுக்குடி பஞ்சாயத்து நிர்வாகம் மூலம் வினியோகம் செய்யும்
நீரை கூட, இவர்கள் குடிநீருக்கு பயன்படுத்துவது கிடையாது.
மற்ற தேவைகளுக்கே பயன்படுத்துகின்றனர். இக்கிராமத்தில்,
30 குடும்பங்கள் வசிக்கின்றன.இதில், 25 வீடுகளில் கிணறுகள்
உள்ளன.

எஞ்சியுள்ள, ஐந்து வீடுகளிலும் விரைவில் கிணறு அமைக்க
உள்ளனர். வானம் பார்த்த பூமியான இக்கிராமத்தில், வானம்
பொய்த்து, கடும் வறட்சி நிலவும் இப்போதும், ஊர் முழுக்க வாழை,
எலுமிச்சை, கொய்யா, கேந்திப்பூக்கள், சம்பங்கி, பலா, மா,
முந்திரி என, விவசாயம் நிறைந்து, பசுமையாக காட்சியளிக்கிறது.

இதற்கு காரணம், வீடுதோறும் கிணறு அமைத்துள்ளது தான்.
இதேபோல், இக்கிராமத்துக்கு அருகில் உள்ள புதுக்குடி கிராமத்தில்,
500 குடும்பங்கள் வசிக்கின்றன.இந்த ஊரில் உள்ள வீடுகளில்,
350க்கும் மேற்பட்ட கிணறுகள் உள்ளன. மீதியுள்ள வீடுகளிலும்,
கிணறுகள் அமைத்து வருகின்றனர்.

தெற்குகரைமேடு கிராம மக்கள் கூறியதாவது:

எங்கள் ஊரில், தலைமுறை, தலைமுறையாக கிணறுகள் அமைத்து,
பராமரித்து வருகிறோம். எங்கள் ஊரில் கிணறுகள் அதிகமாக
இருப்பதால் தான், நிலத்தடி நீர் நன்றாக உள்ளது. அந்த காலத்தில்
இருந்து, இன்று வரை கிணற்று நீரைத் தான் பருகுகிறோம்.

குடிநீரை காசு கொடுத்து வாங்கியது இல்லை.தண்ணீருக்காக
போராட்டம் நடத்தியது இல்லை. எங்களுக்கு தண்ணீர் பஞ்சம்
வந்ததில்லை.விவசாயத்திற்கும், கிணற்று நீரையே பயன்
படுத்துகிறோம். தற்போது, கோடை காலம் என்பதால், சற்று
குறைவாக பயன்படுத்துகிறோம்.

தமிழர்களின் அடையாளங்களில் ஒன்றான கிணறுகளை, நாம்
பாதுகாக்க வேண்டும். எங்கள் கிராமத்தைப் போன்று, மற்ற
கிராமங்களிலும் கிணறு அமைக்க, அரசு விழிப்புணர்வு ஏற்படுத்த
வேண்டும்.இவ்வாறு அவர்கள் கூறினர்.
-
---------------------------------------------
தினமலர்

**T.N.Balasubramanian** · **T.N.Balasubramanian** Mon May 20, 2019 5:26 pm

மக்களின் மன முதிர்ச்சிக்கு எடுத்துக்காட்டு.எல்லாவற்றிற்கும் அரசை எதிர்பார்க்காமல் சுயமாக முன்னேறுதல் அவசியம்.

அரசிடம் கொடுத்தால், அதிகாரிகள் 90 % நிதியை அவர்கள் சாப்பிட்டு விடுவார்கள்.

ரமணியன்

வீடுதோறும் இருக்கிறது கிணறு: குடிநீர் பஞ்சம் இவர்களுக்கு இல்லை

வீடுதோறும் இருக்கிறது கிணறு: குடிநீர் பஞ்சம் இவர்களுக்கு இல்லை

Re: வீடுதோறும் இருக்கிறது கிணறு: குடிநீர் பஞ்சம் இவர்களுக்கு இல்லை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக