ஐஸ்வர்யா ராய் குறித்த சர்ச்சை பதிவு: விவேக் ஓபராய்க்கு மகளிர் ஆணையம் நோட்டீஸ்

Vivek_Oberoi
நடிகை ஐஸ்வர்யா ராய் குறித்த சர்ச்சைக்குரிய பதிவுக்காக,
பிரபல நடிகர் விவேக் ஓபராய்க்கு தேசிய மகளிர் ஆணையம்
நோட்டீஸ் அனுப்பியுள்ளது.

மக்களவைத் தேர்தல் வாக்கு கணிப்புகளுடன் ஒப்பிட்டு,
நடிகர் சல்மான் கான்-ஐஸ்வர்யா ராய் இணைந்து எடுத்த
படம், தம்முடன் ஐஸ்வர்யா ராய் எடுத்த புகைப்படம்,
கணவர் அபிஷேக் பச்சன், மகள் ஆராத்யாவுடன் எடுத்த
படம் ஆகியவற்றை இணைத்து விவேக் ஓபராய், சுட்டுரையில்
பதிவிட்டிருந்தார்.

அதில் கருத்து கணிப்பு, வாக்கு கணிப்பு, தேர்தல் முடிவு என
அவர் குறிப்பிட்டிருந்தார்.

ஐஸ்வர்யா ராயின் கடந்தகால வாழ்க்கையை விமர்சிக்கும்
வகையில், விவேக் ஓபராய் இந்த பதிவை வெளியிட்டதாக
கூறப்பட்டது. இதனால் சர்ச்சை ஏற்பட்டது.

சுட்டுரை சமூகவலைதளத்திலும், பிற சமூகவலைதளங்களிலும்
விவேக் ஓபராய்க்கு கடும் கண்டனம் தெரிவிக்கப்பட்டன.

இந்த விவகாரத்தில், விவேக் ஓபராய்க்கு தேசிய மகளிர்
ஆணையமும், மகாராஷ்டிர மகளிர் ஆணையமும் நோட்டீஸ்
அனுப்பியுள்ளன.

இதனிடையே, சுட்டுரையில் தாம் வெளியிட்ட பதிவு
தேவையில்லாமல் அரசியலாக்கப்படுவதாக விவேக் ஓபராய்
குற்றம்சாட்டியுள்ளார்
-
------------------------------------
தினமணி

ஐஸ்வர்யா ராயைக் கேவலப்படுத்தும் மீமைப் பகிர்ந்த விவேக் ஓப்ராய்:
ரசிகர்கள் கடும் கண்டனம்!
By எழில்  |   தினமணி
-------------------------------------

--
மக்களவைக்கு 7 கட்டங்களாக நடைபெற்ற தேர்தல் ஞாயிற்றுக்கிழமை
முடிவடைந்தது. மொத்தம் 542 தொகுதிகளில் தேர்தல் நடைபெற்றுள்ளது.
மக்களவைத் தேர்தலில் பாஜக தலைமையிலான தேசிய ஜனநாயகக்
கூட்டணிக்கு பெரும்பான்மை கிடைக்கும் என்று பெரும்பாலான வாக்குக்
கணிப்பு முடிவுகள் தெரிவிக்கின்றன.

அந்தக் கூட்டணி 300-க்கும் அதிகமான தொகுதிகளைக் கைப்பற்றும்
என்று சில முடிவுகள் தெரிவிக்கின்றன. இதனால், மத்தியில் மீண்டும்
பாஜக ஆட்சி அமைவதற்கான வாய்ப்புகள் உருவாகியுள்ளன.

இந்ந்நிலையில் இந்த வாக்குக் கணிப்பு குறித்த அநாகரிகமான
மீம் ஒன்றைப் பகிர்ந்து ரசிகர்களின் கண்டனத்துக்கு ஆளாகியுள்ளார்
பிரபல பாலிவுட் நடிகர் விவேக் ஓப்ராய்.

அவர் பகிர்ந்த மீமில், ஐஸ்வர்யா ராய் - சல்மான் கான் உள்ள
புகைப்படத்தைக் கருத்துக் கணிப்பு என்றும்
ஐஸ்வர்யா ராய் - விவேக் ஓப்ராய் உள்ள படத்தை வாக்குக்
கணிப்பு என்றும்
தேர்தல் முடிவுகள் என ஐஸ்வர்யா ராய் - அபிஷேக் பச்சன் -
இந்தத் தம்பதியரின் மகள் ஆகியோரைக் கொண்ட படத்தையும்
குறிப்பிட்டிருந்தது.

ஐஸ்வர்யா ராய் - சல்மான் குறித்த காதல் செய்திகள் 2000-ம்
ஆண்டு வெளிவந்தன. ஆனால் இருவரும் 2002-ல் பிரிந்தார்கள்.
பிறகு ஐஸ்வர்யா ராய், விவேக் ஓப்ராயைக் காதலிப்பதாகச்
செய்திகள் வெளியாகின. ஆனால் இது பற்றி ஐஸ்வர்யா ராய்
எதுவும் பேசியதில்லை. 2007-ல் அபிஷேக் பச்சனை மணந்தார்
ஐஸ்வர்யா ராய். இருவருக்கும் ஆராத்யா என்கிற மகள் உண்டு.

ஐஸ்வர்யா ராயின் தனிப்பட்ட வாழ்க்கையைக் குறிக்கும்
இந்த மீமை விவேக் ஓப்ராயே பகிர்ந்ததால் ரசிகர்கள்
அதிர்ச்சியடைந்துள்ளார்கள்.

ஹாஹா.. கிரியேட்டிவ், அரசியல் எதுவும் இல்லை.
இதுதான் வாழ்க்கை என்று அந்த மீமைப் பகிர்ந்து
விளக்கத்துடன் ட்வீட் செய்திருந்தார் விவேக் ஒப்ராய்.

ஆனால் ரசிகர்கள் பலரும் அதை ஏற்றுக்கொள்ளவில்லை.
இதுபோன்ற அநாகரீகமான செயலில் இறங்கவேண்டாம்
என்று விவேக் ஓப்ராய்க்குக் கண்டனம் தெரிவித்துள்ளார்கள்.
-
தினமணி