கொச்சியில் விதிகளை மீறி கட்டப்பட்ட அடுக்குமாடி குடியிருப்புகள் தகர்ப்பு

கேரள மாநிலம் கொச்சி மரடு பகுதியில் கடலும், ஆறும் சேரும்
காயல் பகுதியில் 4 அடுக்குமாடி குடியிருப்புகள் கட்டப்பட்டன.
இதில் மொத்தம் 343 வீடுகள் இருந்தன.

இந்த 4 அபார்ட்மென்டுகளுடன் கூடிய அடுக்கு மாடி
குடியிருப்புகளும் கடற்கரை ஒழுங்குமுறை விதிகளை மீறி
கட்டப்பட்டுள்ளதாக புகார் எழுந்தது. இதுதொடர்பாக
உச்சநீதிமன்றத்தில் வழக்கு தொடரப்பட்டது.

இந்த வழக்கை விசாரித்த நீதிபதி, 4 அபார்ட்மென்டு அடுக்குமாடி
குடியிருப்புகளையும் இடிக்க உத்தரவிட்டார்.

இதைத்தொடர்ந்து அடுக்குமாடி குடியிருப்புகளை இடிக்கும்
பணிகளை கேரள அரசு தொடங்கியது. முதல் கட்டமாக
4 குடியிருப்புகளிலும் வசித்தவர்கள் அனைவருக்கும் நோட்டீசு
வழங்கப்பட்டு அவர்கள் வெளியேற்றப்பட்டனர்.

தொடர்ந்து அந்த குடியிருப்புகளை குண்டு வைத்து தகர்க்க
முடிவு செய்யப்பட்டது.

கடந்த சில நாட்களாக 4 அபார்ட்மென்டு குடியிருப்புகளில்
ஒவ்வொரு தளங்களிலும் வெடிகுண்டுகள் நிரப்பப்பட்டன.

இந்நிலையில் இன்று காலை 8 மணி முதல் மாலை 4 மணி வரை
144 தடை உத்தரவும் பிறப்பிக்கப்பட்டது. அந்த பகுதியில்
மின் இணைப்பும் துண்டிக்கப்பட்டது.

இன்று காலை 9 மணிக்கு அடுக்குமாடி குடியிருப்பை குண்டு
வைத்து தகர்ப்பதற்கான பணிகள் தொடங்கியது. 9 மணிக்கு
அந்த கட்டிடங்களை சுற்றி 200 மீட்டர் சுற்றளவில் உள்ள அனைவரும்
அப்புறப்படுத்தப்பட்டனர். அந்த கட்டிடங்களை சுற்றியுள்ள
முக்கிய சாலைகளில் போக்குவரத்தும் நிறுத்தப்பட்டது.

11.18 மணிக்கு அந்த குடியிருப்பில் இருந்த வெடிகுண்டுகளை
நிபுணர்கள் வெடிக்கச் செய்தனர்.

பயங்கர சத்தத்துடன் வெடிகுண்டுகள் வெடித்தன. கட்டிடம்
இடிக்கப்பட்ட போது அப்பகுதி முழுக்க தூசு மண்டலமாக காட்சி
அளித்தது. ஒரு மணி நேரம் இந்த நிலை நீடிக்கும் என்று
அதிகாரிகள் தரப்பில் தெரிவிக்கப்பட்டுள்ளது.

நாளை மீதம் உள்ள 2 குடியிருப்புகளும் வெடி வைத்து தகர்க்கப்படுகிறது.
-
தினமலர்-நெல்லை