சென்னையில் கொதிக்கும் எண்ணையை ஊற்றி பெண் கொலை

சென்னை, ஜன. 11- காதல் விவகாரத்தால் இருந்த 17 ஆண்டுகால பகையை தீர்க்க கொதிக்கும் எண்ணையை ஊற்றி பெண்ணை கொலை செய்த வாலிபர் கைது செய்யப்பட்டார்.

சென்னை நுங்கம்பாக்கம் புஷ்பாநகரை சேர்ந்தவர் கஸ்தூரி(வயது 60). அதே பகுதியில் வசிப்பவர் ஏழுமலை(35). காதல் விவகாரத்தால் கஸ்தூரி குடும்பத்துக்கும், ஏழுமலை குடும்பத்துக்கும் இடையே 17 ஆண்டு கால முன்பகை இருந்தது. ஏழுமலையின் தங்கை சாந்தி 15 வயது மகனோடு தனியாக வாழ்ந்து வருகிறார். தனது மகனுக்கு தந்தை கஸ்தூரியின் மகன் ஸ்ரீதர் என்று அவர் சொல்லி வருகிறார். ஆனால் ஸ்ரீதர் இதை ஏற்றுக்கொள்ளவில்லை. சாந்தியின் புகாரால் ஸ்ரீதரும் திருமணம் செய்து கொள்ள முடியவில்லை. இதனால் 2 குடும்பங்களுக்கும் அடிக்கடி தகராறு இருந்து வந்தது.

சாந்தியின் புகாரால் தனது மகனால் திருமணம் செய்து கொள்ள முடியவில்லையே என்று கஸ்தூரி, சாந்தியை அடிக்கடி திட்டுவது வழக்கம். கடந்த 6-ந் தேதி அன்று கஸ்தூரி வழக்கம் போல சாந்தியை திட்டிக்கொண்டு இருந்தார். அருகில் லட்சுமி என்ற பெண் பிளாட்பாரத்தில் உட்கார்ந்து வடை சுட்டுக்கொண்டு இருந்தார். அப்போது அந்த வழியாக ஏழுமலை வந்தார். அவர் குடிபோதையில் இருந்தார். கஸ்தூரி தனது தங்கையை திட்டியதை பார்த்து அவர் கோபம் கொண்டார். சற்றும் எதிர்பாராதவிதமாக லட்சுமி வடை சுட்டுக்கொண்டு இருந்த கொதிக்கும் எண்ணையை கஸ்தூரியின் உடலில் ஏழுமலை கொட்டி விட்டார். இதனால் அவர் உடல் முழுக்க வெந்து அலறி துடித்தார். பின்னர் ஏழுமலை தப்பி ஓடி விட்டார். படுகாயம் அடைந்த கஸ்தூரி சென்னை கீழ்பாக்கம் அரசு மருத்துவமனையில் சிகிச்சைக்கு சேர்க்கப்பட்டார். அங்கு சிகிச்சை பலன் அளிக்காமல் கஸ்தூரி நேற்று முன்தினம் இரவு இறந்து போனார்.

இந்த சம்பவம் தொடர்பாக நுங்கம்பாக்கம் போலீஸ் இன்ஸ்பெக்டர் நடேசன் கொலை வழக்கு பதிவு செய்து விசாரணை நடத்தினார். ஏழுமலை கைது செய்யப்பட்டார். இந்த சம்பவம் அந்த பகுதியில் பெரும் பரபரப்பை ஏற்படுத்தியது.

என்ன கொடுமா தல இது