நிவர் புயல் - செய்திகள்

**ayyasamy ram** · **ayyasamy ram** Mon Nov 23, 2020 8:03 am

நிவர் புயல்” கரையை கடக்கும்போது முன்னெச்சரிக்கை
நடவடிக்கையாக மின்சாரம் துண்டிக்கப்படும்
- அமைச்சர் தங்கமணி தகவல்
-
சென்னை,

நிவர் புயல் வரும் 25-ஆம் தேதி தீவிரப்புயலாக மாமல்லபுரம் - காரைக்கால் இடையே கரையை கடக்க வாய்ப்புள்ளதாக வானிலை ஆய்வு மையம் தெரிவித்துள்ளது.

இதுதொடர்பாக சென்னையில் செய்தியாளர்களிடம் பேசிய அமைச்சர் தங்கமணி, “நிவர் புயலால் ஏற்படும் பாதிப்புகளை சமாளிக்க மின் துறை தயாராக உள்ளது. தேவையான அளவு மின்கம்பங்கள் கையிருப்பு உள்ளன, வருகின்ற 25-ஆம் தேதி புயல் கரையை கடக்கும்போது மக்களின் பாதுகாப்புக்காக மின்சாரம் துண்டிக்கப்படும். அதன் பிறகு மீண்டும் மின்சாரம் வழங்கப்படும். அதை யாரும் மின்வெட்டு என்று நினைக்க வேண்டாம். தாழ்வான பகுதியில் இருக்கக்கூடிய மின்கம்பங்களை உடனடியாக சரி செய்ய அறிவுறுத்தப்பட்டுள்ளது.

அதிகளவு மழை பெய்யக் கூடும் என்பதால் கடலூர் மாவட்டத்திற்கு முன்னுரிமை கொடுத்து நடவடிக்கைகள் எடுக்கப்பட்டுள்ளது. புயல் கரையை கடக்கும்போது மின் கம்பங்கள் சேதம் அடைந்தால் அதை சீரமைக்க ஏற்பாடுகள் தயார் நிலையில் உள்ளன, 100 கிலோ மீட்டர் வேகத்தில் புயல் காற்று வீசினாலும், எந்த இடங்களில் புயல் கரையை கடந்தாலும் மின் துறை சமாளிக்க தயாராக இருக்கிறது” என்று அவர் தெரிவித்தார்.

தினத்தந்தி

**ayyasamy ram** · **ayyasamy ram** Mon Nov 23, 2020 8:10 am

புயல் தடுப்பு நடவடிக்கை குறித்து மூத்த அமைச்சர்கள்
மற்றும் உயர் அதிகாரிகளுடன் முதலமைச்சர் எடப்பாடி
பழனிசாமி சற்று நேரத்தில் ஆலோசனை நடத்த உள்ளார்.

தினத்தந்தி
---------------------

எண்ணூர், கடலூர், நாகை, பாம்பன், புதுச்சேரி,
காரைக்கால் துறைமுகங்களில் 3ம் எண் புயல்
எச்சரிக்கை கூண்டு ஏற்றப்பட்டுள்ளது.

தூத்துக்குடி துறைமுகத்திலும் முன்னெச்சரிக்கையாக
3ம் எண் புயல் எச்சரிக்கை கூண்டு ஏற்றப்பட்டுள்ளது.

ராமநாதபுரம், நாகை, சீர்காழி, புதுச்சேரி மீனவர்கள்
தங்களது படகுகளை கரையில் பாதுகாப்பாக நிறுத்தி
வைத்துள்ளனர்.

மாலைமலர்

**ayyasamy ram** · **ayyasamy ram** Mon Nov 23, 2020 8:21 am

நவம்பர் 23, 2020 13:38 IST
-
வங்கக் கடலில் புயல் சின்னம்... நாளை 6 மாவட்டங்களில் அதீத கனமழைக்கு வாய்ப்பு
-
சென்னை:

சென்னை வானிலை ஆய்வு மையம் வெளியிட்டுள்ள
அறிக்கையில் கூறியிருப்பதாவது:-

வங்கக்கடலில் நிலைகொண்டிருந்த ஆழ்ந்த காற்றழுத்த
தாழ்வு பகுதி இன்று காற்றழுத்த தாழ்வு மண்டலமாக
வலுவடைந்துள்ளது. இது நாளை புயலாக மாறி நாளை
மறுநாள் காரைக்கால்-மகாபலிபுரம் இடையே புதுவைக்கு
அருகே கரையை கடக்கக் கூடும்.

தற்போது நிலவும் காற்றழுத்த தாழ்வு மண்டலம் காரணமாக
இன்று நாகப்பட்டினம், தஞ்சாவூர், திருவாரூர் மாவட்டங்கள்
மற்றும் காரைக்கால் பகுதிகளில் ஓரிரு இடங்களில் இடியுடன்
கூடிய கனமழையும், ஏனைய கடலோர மாவட்டங்களில்
பெரும்பாலான இடங்களில் லேசானது முதல் மிதமான
மழையும் பெய்யக்கூடும்.

நாளை தஞ்சாவூர், திருவாரூர், நாகப்பட்டினம், மயிலாடுதுறை,
அரியலூர் மாவட்டங்கள் மற்றும் காரைக்கால் பகுதிகளில்
ஒருசில இடங்களில் இடி மின்னலுடன் கூடிய அதி கனமழை
பெய்யக்கூடும்.

சென்னை, திருவள்ளூர், காஞ்சிபுரம், செங்கல்பட்டு, விழுப்புரம்,
கடலூர், பெரம்பலூர், திருச்சி, புதுக்கோட்டை மாவட்டங்கள்
மற்றும் புதுவை பகுதிகளில் ஒரு சில இடங்களில் இடி
மின்னலுடன் கூடிய கன முதல் மிக கனமழை பெய்யக்கூடும்.

வேலூர், ராணிப்பேட்டை, திருவண்ணாமலை, கள்ளக்குறிச்சி
மாவட்டங்களில் ஒரு சில இடங்களில் இடி மின்னலுடன்
கூடிய கன மழையும், ஏனைய மாவட்டங்களில் பெரும்பாலான
இடங்களில் லேசானது முதல் மிதமான மழையும் பெய்யக்கூடும்.

சூறாவளிக் காற்று மற்றும் கடல் கொந்தளிப்புடன் காணப்படும்
என்பதால் மீனவர்கள் 25ம் தேதி வரை மீன்பிடிக்க செல்ல
வேண்டாம் என கேட்டுக்கொள்ளப்படுகிறார்கள்.

இவ்வாறு அதில் கூறப்பட்டுள்ளது.

மாலைமலர்