'சீட்டு தந்தா போதுமா; ஜெயிக்க துட்டு வேணாமா': புலம்பும் காங்., வேட்பாளர்கள்

சென்னை: காங்கிரஸ் வேட்பாளர்கள், 25 பேரில், பாதி பேர் பணம் படைத்தவர்கள். மீதிப்பேர், தேர்தல் செலவு செய்கிற அளவுக்கு செல்வந்தரல்ல. என்றாலும், நேர்காணலில், இத்தனை கோடி செலவு செய்வதாக, உதார் விட்டு, 'சீட்' வாங்கி விட்டனர்.
பட்டியலில் பெயர் வந்ததும் சந்தோஷம் அடைந்தவர்கள், தொகுதியில் கால் வைத்ததும், மிரண்டு போய் விட்டார்களாம். சொந்தக்கட்சி, கூட்டணி கட்சி என, கூட்டம் கூட்டமாக வர துவங்கி விட்டனர்.

'லிஸ்ட்' போட்டு, இன்னாருக்கு இவ்வளவு என்ற ரீதியில், பேசத் துவங்கிய பின் தான், பெட்டி பெட்டியாக பணம் தேவை என்பது தெரிய வந்திருக்கிறது.உடனடியாக கட்சி தலைமைக்கு போன் போட்டு, நிலவரத்தை சொல்லி, 'டில்லியில பேசுங்க. எப்படியாவது, அஞ்சு, 'சி' வாங்கி குடுங்க' என்று கெஞ்சாத குறைதானாம். 'டில்லியிலயா... நயா பைசா தேறாது' என்று, பவன் வட்டாரத்தில் இருந்து பதில் வந்துள்ளது.
பணம் இல்லாதோர் பட்டியலில், 'மாஜி' மகன் ஒருத்தரும் உண்டாம். அதனால், அந்த, மாஜி தலைமையில், எல்லாரும் போய், அழகிரியை பார்த்து பேசினார்களாம். 'அறிவாலயத்துல பேசுங்க. 25 சீட்டுக்கு இவ்வளவுனு சொல்லி கேளுங்க. சீட்டு மட்டும் குடுத்தா போதுமா... ஜெயிக்க வேணாமானு கேளுங்க' என்று, அந்த மாஜி ஆலோசனை சொன்னாராம்.

'என்னால முடியாது; அசிங்கமா பேசுவாங்க' என சொல்லி, நாசூக்காக ஒதுங்கி கொண்டாராம், அழகிரி. 'காம்ரேடு'கள், தி.மு.க.,விடம் நன்கொடை பெற்றது எப்படிப்பட்ட விமர்சனத்துக்கு இலக்கானது என்பதை பார்த்தவர் தானே. என்றாலும், அழகிரியால் எந்த வகையிலும் உதவ முடியவில்லை. அருகில் இருந்த டில்லி நிர்வாகியை விட்டு பேச சொன்னார்.
மோடி அரசு வந்ததில் இருந்தே, காங்கிரஸ் கட்சியின் நன்கொடையாளர்களுக்கு நலம்விரும்பிகள் பெயரால், 'மெசேஜ்' போனதில், ஒவ்வொரு தொழிலதிபராக ஒதுங்கி போனதால், அக்கட்சியின் கஜானா காலியாகி கிடக்கிறது.
கட்சி ஆபீஸ் ஊழியர்களுக்கு சம்பளம் போடவே வழியில்லாமல் பரிதாப நிலையில் இருக்கிறதாம். விபரமெல்லாம் சொல்லி மூக்கை சிந்தினாராம் டில்லி நிர்வாகி.இப்போ, தி.மு.க., - மா.செ.,க்களிடம், 'உங்க தலைமைகிட்ட சொல்லி, ஏற்பாடு செய்யுங்க' என, மன்றாடுவதாக தகவல். '25 கொடுத்ததே அதிகம். இதுல பணம் வேறயா' என, மனசுக்குள் கொந்தளித்த மா.செ.,க்கள், 'தலைமையில பேசறோம்' என, தட்டிக்கழிக்கிறார்களாம்.

எப்பவுமே ஆட்சில தான இருக்கப் போறோம்னு நெனச்சா, கடைசில இதான் கதி. 'ரிட்டயர்ட் லைபுக்கு' சேத்து வைக்காதவன் கதை.

நன்றி தினமலர்