ஜெப் பெசோஸ் முதல் எலான் மஸ்க் வரை: வரி கட்டாத அமெரிக்க பெரும் பணக்காரர்கள்!

நியூயார்க்: அமேசான் நிறுவனர் ஜெப் பெசோஸ், டெஸ்லாவின் எலான் மஸ்க் உள்ளிட்ட அமெரிக்காவின் 25 பெரும் பணக்காரர்கள் 2014 முதல் 2018 காலக்கட்டத்தில் அந்நாட்டின் மத்திய அரசுக்கு மிகக் குறைந்த வரியும், சில சமயங்களில் வரியே செலுத்தாமலும் இருந்ததாக 'புரோபப்ளிகா' என்ற செய்தி நிறுவனம் தகவல் வெளியிட்டுள்ளது.

அமெரிக்காவின் 'புரோபப்ளிகா' பத்திரிகையானது லாபநோக்கமற்ற, பொது நலன் சார்ந்த புலனாய்வு கட்டுரைகளை வெளியிடும் ஒரு இதழ். அந்நாட்டின் 25 பெரும் பணக்காரர்கள் வரி சட்டங்களில் உள்ள ஓட்டைகளை பயன்படுத்தி சொற்பமான வரியே செலுத்தியிருப்பதை அப்பத்திரிகை வெளிகொண்டு வந்துள்ளது. வரி தொடர்பான விஷயங்களை கையாளும் அமெரிக்க அரசின் உள் வருவாய் சேவைத் துறையிலிருந்து இத்தகவல்களை எப்படியோ பெற்று வெளியிட்டுள்ளனர். இவ்விவகாரம் அமெரிக்க அரசியலில் பரபரப்பை ஏற்படுத்தியுள்ளது.




வரி விதிகளில் ஓட்டைகள்!

அவர்கள் வெளியிட்ட தகவல்களில் கூறியிருப்பதாவது: நாட்டின் பணக்கார நிர்வாகிகள் தங்கள் செல்வத்தில் சொற்பமான அளவையே வரியாக செலுத்தியுள்ளனர். 40,100 கோடி டாலர் செல்வத்திற்கு 1,360 கோடி டாலர் மட்டுமே மத்திய அரசுக்கு வரி செலுத்தியிருக்கிறார்கள். வாரன் பபெட், ஜெப் பெசோஸ், மைக்கேல் ப்ளூம்பெர்க், எலான் மஸ்க் போன்ற கோடீஸ்வரர்கள் வரி விதிமுறைகளில் உள்ள சிக்கலான ஓட்டைகளால் பயனடைந்துள்ளனர். ஆனால் அவை சட்டத்திற்கு உட்பட்டே நடந்திருக்கின்றன.









4 ஆயிரம் டாலர் பெற்ற பெசோஸ்!

அதிக பங்கு வைத்திருப்பவர்கள் மூலம் பெரும் தொகையை கடன் பெறுவது அதில் ஒரு நுட்பம். அந்தக் கடன்களுக்கு வரி கிடையாது. மேலும் அவர்கள் அந்த கடனுக்கு செலுத்தும் வட்டிக்காக வரி கழித்துக்கொள்ளப்படும். 2007-ல் அமேசானின் பங்கு விலை இரட்டிப்பாக இருந்தபோதும், அதன் சி.இ.ஓ., ஜெப் பெசோஸ் மத்திய அரசுக்கு வரிகள் எதுவும் செலுத்தவில்லை. 4 ஆண்டுகளுக்கு பின் அவரது சொத்து மதிப்பு 1,800 கோடி டாலரானது. ஆனால் அவர் தான் நஷ்டமடைந்ததாக கூறி, குழந்தைகளை வளர்க்க 4 ஆயிரம் டாலர் டேக்ஸ் கிரெடிட் பெற்றார்.







சொத்துக்களுக்கு 2% வரி!

பணக்காரர்களுக்கு அதிக வரி விதிக்க வேண்டும் என நீண்ட காலமாக பேசி வருகிறார் பெர்க்ஷயர் ஹாத்வே சி.இ.ஓ., வாரன் பபெட். 2014 முதல் 2018 காலக்கட்டத்தில் அவரது சொத்து மதிப்பு 2,430 கோடி டாலராக இருந்த போது, 2.3 கோடி டாலர்கள் மட்டுமே வருமான வரியாக செலுத்தியுள்ளார். இவ்வாறு அந்த பத்திரிகை கூறியுள்ளது.

இச்செய்தியை தொடர்ந்து வருமானத்துக்கு வரி விதிக்காமல், சொத்துக்களுக்கு வரி விதிக்கும் முறையை கொண்டு வர வேண்டும் என்ற விவாதம் கிளம்பியுள்ளது. 5 கோடி டாலர்களுக்கு மேல் சொத்து இருப்பவர்களிடம் 2 சதவீத வரி விதிக்கலாம் என ஆளுங்கட்சி செனட்டர் ஒருவர் கூறியுள்ளார். பணக்காரர்களுக்கான வரியை அதிபர் பைடன் 37 சதவீதத்திலிருந்து 39.6 சதவீதமாக்க உள்ள நிலையில் இத்தகவல் வெளியாகியிருக்கிறது.


நன்றி தினமலர்.

அங்கேயும் இப்பிடித்தானா!!!!!!!!!!!!!!!!?