இந்திய அணி இமாலய வெற்றி * இஷான் கிஷான், ஸ்ரேயாஸ் விளாசல்

-

லக்னோ:
இலங்கை அணிக்கு எதிரான முதல் 'டி-20' போட்டியில் இந்திய அணி
62 ரன் வித்தியாசத்தில் இமாலய வெற்றி பெற்றது. இஷான் கிஷான்,
ஸ்ரேயாஸ் அரைசதம் விளாசினர்.

இந்தியா வந்துள்ள இலங்கை அணி மூன்று 'டி-20' போட்டிகள் கொண்ட
தொடரில் பங்கேற்கிறது. முதல் போட்டி இன்று லக்னோவில் நடந்தது.
'டாஸ்' வென்ற இலங்கை அணி கேப்டன் ஷனகா, பீல்டிங் தேர்வு செய்தார்.
விண்டீஸ் தொடரில் கடைசி போட்டியில் பங்கேற்ற இந்திய அணியில்
6 மாற்றங்கள் செய்யப்பட்டன.

சாம்சன், ஜடேஜா, பும்ரா, புவனேஷ்வர் குமார், சகால் அணிக்கு திரும்பினர்.
தீபக் ஹூடா 'டி-20' போட்டியில் அறிமுக வாய்ப்பு பெற்றார். இந்திய அணிக்கு
ரோகித் சர்மா, இஷான் கிஷான் ஜோடி துவக்கம் கொடுத்தது. இஷான் 30வது
பந்தில் அரைசதம் அடித்தார்.

இந்திய அணி முதல் விக்கெட்டுக்கு 11.4 ஓவரில் 111 ரன் சேர்த்த போது,
ரோகித் (44) அவுட்டானார். இஷான் 89 ரன் எடுத்த போது, ஷனகா பந்தில்
சிக்சருக்கு ஆசைப்பட்ட இஷான், லியானாகேவிடம் 'கேட்ச்' கொடுத்து
வெளியேறினார்.

ஸ்ரேயாஸ் 25வது பந்தில் அரைசதம் கடந்தார். இந்திய அணி 20 ஓவரில்
2 விக்கெட்டுக்கு 199 ரன் குவித்தது. ஸ்ரேயாஸ் (57), ஜடேஜா (3) அவுட்டாகாமல்
இருந்தனர்.

புவனேஷ்வர் நம்பிக்கை

கடின இலக்கைத் துரத்திய இலங்கை அணிக்கு, புவனேஷ்வர் 'வில்லனாக'
அமைந்தார். முதல் பந்தில் நிசங்காவை (0) போல்டாக்கிய இவர், மிஷராவையும் (13)
வெளியேற்றினார். ஜடேஜா 'சுழலில்' சண்டிமால் (10) சிக்க, ஷனகாவை (3) சகால்
அவுட்டாக்கினார். கருணாரத்னே 21 ரன் எடுத்தார். மறுபக்கம் அசலங்கா, சர்வதேச
'டி-20' அரங்கில் 3வது அரைசதம் அடித்தார்.

இலங்கை அணி 20 ஓவரில் 6 விக்கெட்டுக்கு 137 ரன் மட்டும் எடுத்தது.
அசலங்கா (53), சமீரா (24) அவுட்டாகாமல் இருந்தனர். இந்தியா சார்பில் புவனேஷ்வர் 2,
வெங்கடேஷ் 2 விக்கெட் சாய்த்தனர். இந்திய அணி 62 ரன்னில் இமாலய வெற்றி பெற்றது.
தொடரில் 1-0 என முன்னிலை பெற்றது.

தினமலர்