மாட்டுப் பொங்கல் தெரியும்… யானை பொங்கல் கேள்விப்பட்டிருக்கீங்களா?

-
வனத்துறையினருக்கு மனித – வனவிலங்கு மோதல்களை தடுத்தல், விளைநிலங்களை சேதப்படுத்தும் காட்டு யானைகளை வனப்பகுதிக்குள் விரட்டுதல் உள்ளிட்ட பல்வேறு கும்கி பணிகளில் உதவும் துறை யானைகளை சிறப்பிக்கும் வகையில், யானை பொங்கல் கொண்டாடப்படுகிறது.

யானை பொங்கல் கேள்விப்பட்டிருக்கிறீர்களா… என்னது யானை பொங்கலா… ஒருவேளை தப்பா படிச்சிட்டோமா… என்பதுதானே உங்கள் மைண்ட்வாய்ஸ்? ஆம்! எனக்கும் முதல்முறை யானை பொங்கல் பற்றி கேள்விப்பட்டபோது அப்படிதான் இருந்தது. பிறகு இதைப் பற்றி விசாரித்தப்போது, ஒவ்வொரு வருடமும் உலாந்தி வனச்சரகத்தில் உள்ள கோழிகமுத்தி யானைகள் முகாமில் யானை பொங்கல் கொண்டாடப்படுகிறது என்பது தெரியவந்தது.


-
முகாமின் பெயரைக் கேட்டதும், ஒருவேளை வேறு மாநிலமாக இருக்குமோ என்று நினைக்காதீர்கள். இந்த முகாம் கோவை மாவட்டத்தில், பொள்ளாச்சியில் உள்ள ஆனைமலை புலிகள் காப்பகத்தில்தான் உள்ளது. இது தமிழக வனத்துறையின் இரண்டாவது பெரிய யானைகள் முகாம்.

கோழிகமுத்தி பகுதியில் `மலைசர்’ என்னும் பழங்குடி மக்கள் அதிகம் வாழ்கிறார்கள். இந்த முகாமில் உள்ள யானைகளுக்கு பெரும்பாலும் இந்த மக்கள்தான் பாதுகாவலர்களான மாவூத் மற்றும் கவாடிகளாக இருக்கிறார்கள். இவர்கள் தலைமுறை தலைமுறையாக யானை வளர்ப்பு மற்றும் பராமரிப்புப் பணிகளில் இருந்து வருகின்றனர்.

கடந்த ஆகஸ்ட் மாதம் கொண்டாடப்பட்ட உலக யானைகள் தினத்தன்று, சுற்றுச்சூழல், வனம் மற்றும் பருவநிலை மாற்றம் அமைச்சகம் சார்பாக, மலைசர் மக்கள் யானைகள் பாதுகாப்பில் சிறப்பாகச் செயல்படுகின்றனர் என்று `கஜ்கெளரவ விருது’ வழங்கப்பட்டது குறிப்பிடத்தக்கது.

-
கோழிகமுத்தி யானை முகாம்…

Prasanth

சரிசரி… சுற்றி வளைக்காமல் நேரடியாக விஷயத்திற்கு வந்துவிடுவோம். யானை பொங்கல் என்றால் என்ன, எப்படி கொண்டாடப்படுகிறது என்பது குறித்து, கோழிகமுத்தி யானைகள் முகாமைச் சேர்ந்த வனத்துறை அதிகாரி நமக்கு விளக்குகிறார்…

இதுதான் யானை பொங்கல்…

“கோழிகமுத்தி யானைகள் முகாமில் மொத்தம் 26 யானைகள் உள்ளன. அந்த யானைகளையும், அவற்றைப் பராமரிக்கிற மாவூத், கவாடி-களையும் வனத்துறை சார்பாக சிறப்பிக்க, இத்தகைய யானை பொங்கல் கொண்டாடப்படுகிறது. இந்தப் பொங்கல் கோழிகமுத்தி யானைகள் முகாமில், 2001-ம் ஆண்டில் இருந்து கொண்டாடப்பட்டு வருகிறது. இந்த கொண்டாட்டத்திற்கான ஏற்பாடுகள், பொங்கலுக்கு முந்தைய வாரமே களைக்கட்டத் தொடங்கிவிடும்.
-

-
யானை பொங்கல்!

Prasanth

பொங்கல் கொண்டாட்டத்தன்று, யானைகளைச் சிறப்பிக்கும் வகையில் ஐந்து அல்லது ஏழு பொங்கல் வைக்கப்படும். மேலும் இந்தப் பொங்கல் கொண்டாட்டத்தில், கோழிகமுத்தி மற்றும் வரகளியார் பகுதியில் பராமரிக்கப்பட்டு வரும் துறை யானைகள் மட்டும்தான் கலந்து கொள்ளும்.

இந்த பொங்கலில் என்ன ஸ்பெஷல்?

யானை பொங்கல் அன்று, துறை யானைகளை அலங்கரித்து வரிசையில் நிற்கவைத்து, சிறப்பு மற்றும் ஊட்டசத்து மிகுந்த உணவுகள் வழங்கப்படும். மேலும் பொங்கல் வைத்தல், பந்தல் மற்றும் தோரணம் கட்டுதல், பாராம்பர்ய நடனம் ஆடுதல் என ஊர் மக்களின் பங்களிப்பு வெகுவாக இருக்கும்.

வனத்துறை சார்பாக யானை பணியாளர்கள் மற்றும் அவர்களின் குடும்பத்தினரை மகிழ்வூட்டும் வகையில், பல்வேறு விளையாட்டுப் போட்டிகள் மற்றும் கலை நிகழ்ச்சிகள் நடத்தப்படும். தவிர இந்த விழாவில் சுற்றுலா பயணிகள், வன ஆர்வலர்கள், வனப்பணியாளர்கள் என அனைவரும் ஆர்வமுடன் கலந்து கொள்வார்கள்.

-
வனத்துறைக்கு உதவும் யானைகள்!

எதற்காகக் கொண்டாடப்படுகிறது?

விவசாயத்திற்குப் பயன்படுத்தப்படும் கால்நடைகளைப் பெருமைப்படுத்தும் விதமாக மாட்டுப் பொங்கல் கொண்டாடாப்படுகிறது. அதுபோல வனத்துறையினருக்கு மனித – வனவிலங்கு மோதல்களை தடுத்தல், விளைநிலங்களை சேதப்படுத்தும் காட்டு யானைகளை வனப்பகுதிக்குள் விரட்டுதல் உள்ளிட்ட பல்வேறு கும்கி பணிகளில் உதவும் துறை யானைகளைச் சிறப்பிக்கும் வகையில் யானை பொங்கல் கொண்டாடப்படுகிறது.

வேறு எங்கெல்லாம் கொண்டாடப்படுகிறது?

யானை பொங்கல் கோழிகமுத்தி யானைகள் முகாமைத் தவிர, முதுமலை புலிகள் காப்பகம், தெப்பக்காடு யானைகள் முகாம் ஆகியவற்றிலும் கொண்டாடப்படுகிறது” என்றார்.

மக்களே, நீங்களும் யானை பொங்கலில் கலந்து கொள்ள ரெடியா?

-நிவேதா.நா (விகடன்)