மர்ம காய்ச்சல்

யுவா · யுவா Mon 25 Jan 2010 - 16:05

சென்னை: மதுரை, தேனி, திருநெல்வேலி, நாகப்பட்டினம், ராமநாதபுரம் உட்பட பல தென்மாவட்டங்களில் மர்ம காய்ச்சல் பரவி வருகிறது. மர்ம காய்ச்சலால் ஒரு சிலர் இறந்துள்ளனர். இன்னும் பலர் மருத்துவமனையில் தீவிர சிகிச்சை பெற்று வருகின்றனர். மர்ம காய்ச்சல் குறித்து ஆய்வு செய்ய, தேசிய தொற்றுநோய் மையம் மற்றும் அவசரகால சிகிச்சை மையத்தில் இருந்து டி.ஜி.தாமஸ் தலைமையில் ஜபீர்சிங், பி.கே.சர்மா, போர்லால் கொண்ட குழுவினர் கடந்த 20ம் தேதி தமிழகம் வந்தனர்.

இக்குழுவினர் மர்ம காய்ச்சல் பாதிக்கப்பட்ட பகுதிகளுக்கு சென்று தொடர்ந்து ஆய்வு நடத்தினர். இதுகுறித்து பொது சுகாதாரத் துறை இயக்குனர் டாக்டர் இளங்கோ கூறியதாவது, தென் மாவட்டங்களில் பரவி வருவது மர்ம காய்ச்சல் இல்லை. காலநிலை மாற்றத்தால் வரும் சாதாரண காய்ச்சல்தான். வேதாரண்யத்தில் காய்ச்சலால் பாதிக்கப்பட்டவர்களின் ரத்த மாதிரிகளை பரிசோதனை செய்து பார்த்ததில் எலிக்காய்ச்சல் என்று தெரிந்தது.

புனேவில் உள்ள மத்திய ஆய்வு கூடத்தில் ரத்த மாதிரிகளை பரிசோதனை செய்த போது எலிக்காய்ச்சல் என்று கூறினர். திருநெல்வேலியில் எலிக்காய்ச்சல், டெங்கு, டைப்பாய்டு போன்ற பலவிதமான காய்ச்சல்தான் இருக்கிறது. இதேபோல் ராமநாதபுரம், விருதுநகரிலும் டெங்கு காய்ச்சல்தான் உள்ளது. மர்ம காய்ச்சல் எதுவும் பரவவில்லை. டெல்லி ஆய்வு குழுவினர் மதுரை, திருநெல்வேலி மாவட்ட மருத்துவமனை, ஆரம்ப சுகாதார நிலையம் உட்பட பல பகுதிகளில் ஆய்வு நடத்தினர். தென் மாவட்டங்களை போல் சென்னையிலும் ஒருவித காய்ச்சலால் பொதுமக்கள் பாதிக்கப்பட்டுள்ளதால், அந்த குழுவினர் சென்னையிலும் ஆய்வு செய்தனர். சென்னையில் 15 ரத்த மாதிரிகள் உட்பட 80 ரத்த மாதிரிகளை எடுத்து கொண்டு நேற்று முன்தினம் ஆய்வு குழுவினர் டெல்லி சென்றுள்ளனர். அந்த ரத்த மாதிரிகளை பரிசோதனை செய்து தென் மாவட்டங்களில் பரவி வருவது என்ன காய்ச்சல் என்பது குறித்த அறிக்கையை ஒருவாரத்துக்குள் சமர்ப்பிப்பார்கள். இவ்வாறு இளங்கோ கூறினார்.