ஆசிரியர் தினம்: பிரதமர் மோடி வாழ்த்து

ஆசிரியர் தினத்தை முன்னிட்டு ஆசிரியர்களுக்கு பிரதமர் மோடி வாழ்த்துகளைத் தெரிவித்துள்ளார்.

இதுதொடர்பாக அவரின் சுட்டுரை பதிவில்,

நமது எதிர்காலத்தை உருவாக்குவதில் கனவுகளை ஊக்குவிப்பதில் ஆசிரியர்கள் முக்கிய பங்காற்றுகிறார்கள்.

ஆசிரியர்களின் அசைக்க முடியாத அர்ப்பணிப்பு மற்றும் பெரும் தாக்கத்திற்காக வாழ்த்துகிறேன் என்று பதிவிட்டுள்ளார்.

முன்னாள் குடியரசுத் தலைவர் டாக்டர் ராதாகிருஷ்ணனின் பிறந்தநாளை முன்னிட்டு அவருக்கு எனது அஞ்சலிகள்.

2023-க்கான தேசிய ஆசிரியர் விருது பெற்றவர்களுக்கு வாழ்த்து தெரிவித்தார். நாட்டின் இளம் தலைமுறையை வளர்ப்பதில் ஆசிரியர்களின் முயற்சிகளைப் பாராட்டினார். நல்ல ஆசிரியர்களின் முக்கியத்துவத்தையும், நாட்டின் தலைவிதியை வடிவமைப்பதில் அவர்கள் ஆற்றக்கூடிய பங்கையும் அவர் எடுத்துரைத்தார்.

சாதனையாளர்களின் வெற்றியைப் பற்றி குழந்தைகளுக்குக் கற்பிப்பதன் மூலம் அவர்களை ஊக்கப்படுத்துவதன் முக்கியத்துவத்தையும் அவர் வலியுறுத்தினார்.

ஒவ்வொரு ஆண்டும் செப்டம்பர் 5ஆம் தேதி ஆசிரியர் தினம் கொண்டாடப்படுகிறது. இது ஆசிரியர்களுக்காக அர்ப்பணிக்கப்பட்ட நாள். மாணவர்களின் வாழ்க்கையை வடிவமைப்பதில் அவர்கள் முக்கிய பங்கு வகிக்கின்றனர் என்று அவர் பதிவிட்டுள்ளார்.

நேற்று பிரதமர் மோடி ஆசிரியர்களுடன் கலந்துரையாடினார். அப்போது அவர் பேசியது,

தாய் உயிர் கொடுக்கிறாள் என்றால் குரு வாழ்க்கையைக் கொடுக்கிறார். இங்கு வந்திருக்கும் அனைத்து ஆசிரியர்களுக்கும் எனது வணக்கங்கள் மற்றும் நன்றிகள்.

பள்ளியில் பயிலும் ஆதி திராவிடர்கள் மாணவர்களிடமிருந்து நாம் நிறையக் கற்றுக்கொள்ள வேண்டும். அவர்கள் வாழ்க்கை முறையை நாம் தெரிந்துகொள்ள வேண்டும். இந்த காலத்தில் அனைத்து பொருள்களும் மறுசுழற்சி பயன்பாடு வந்துவிட்டது. அந்தக் காலத்தில் பழைய துணிகள் வீட்டில் உள்ள அண்ணன், அதற்கடுத்து தம்பி என மாறி மாறிப் பயன்படுத்துவார்கள். ஆனால், இந்தக் காலகட்டத்தில் அனைத்து பொருள்களும் ஒருமுறை பயன்படுத்தப்படும்(use and throw) முறை வந்துவிட்டது என்றும் அவர் பேசினார்.

அதன்பின்னர், ஆசிரியர்கள் கரோனா காலத்தில் பள்ளியில் மாணவர்களுக்கு கற்பித்த விதத்தையும் பற்றியும் தெரிவித்தார்.

தேசிய நல்லாசிரியர் விருதுக்கு தேர்வான ஆசிரியர்களுடன், பிரதமர் நரேந்திர மோடி நேற்று புதுடில்லியில் உள்ள அவரது இல்லத்தில் கலந்துரையாடினார்.

ஒவ்வொரு ஆண்டும் மறைந்த முன்னாள் ஜனாதிபதி டாக்டர் ராதாகிருஷ்ணனின் பிறந்தநாளான செப்., 5ம் தேதி, ஆசிரியர் தினமாக கொண்டாடி வருகிறோம். இதையொட்டி சிறந்த பங்களிப்பு மற்றும் அர்ப்பணிப்புணர்வுடன் பணியாற்றி வரும் ஆசிரியர்களை நாடு முழுதும் தேர்வு செய்து, தேசிய நல்லாசிரியர் விருதை மத்திய அரசு வழங்கி வருகிறது.

நடப்பாண்டு முதல் தேசிய நல்லாசிரியர் விருது, உயர் கல்வித்துறை மற்றும் திறன் மேம்பாட்டு அமைச்சகத்தின் ஆசிரியர்களுக்கும் விரிவு படுத்தப்பட்டுள்ளது. இதன்படி, நாடு முழுதும் 50 பள்ளி ஆசிரியர்கள், 13 உயர்கல்வி ஆசிரியர்கள், திறன் மேம்பாட்டு பயிற்சி நிலையங்களைச் சேர்ந்த, 12 ஆசிரியர்கள் என மொத்தம், 75 பேருக்கு தேசிய நல்லாசிரியர் விருதுகள் வழங்கப்பட உள்ளன.

இதில், தமிழகத்தின் மதுரை மாவட்டம் அலங்காநல்லுார் அரசு ஆண்கள் மேல்நிலைப் பள்ளி ஆசிரியர் டி.காட்வின் வேதநாயகம் ராஜ்குமாரும், தென்காசி மாவட்டம் கீழப்பாவூர் வீரகேளம்புதுார் அரசு மேல்நிலைப் பள்ளி ஆசிரியை எஸ்.மாலதியும் தேர்வு செய்யப்பட்டுள்ளனர். தேர்வு செய்யப்பட்ட அனைவருக்கும் இன்று புதுடில்லி விஞ்ஞான் பவனில் நடக்கும் ஆசிரியர் தின விழாவில், ஜனாதிபதி திரவுபதி முர்மு விருது வழங்கி கவுரவிக்க உள்ளார். முன்னதாக, விருது பெற உள்ள ஆசிரியர்களை, புதுடில்லியில் உள்ள தன் வீட்டிற்கு நேற்று அழைத்து பிரதமர் மோடி கலந்துரையாடினார்.

ஆசிரியர்களின் தனித்துவமான பங்களிப்பை கொண்டாடுவதே, நல்லாசிரியருக்கான விருது வழங்கப்படுவதன் நோக்கம் ஆகும். ஆசிரியர்கள், நம் நாட்டின் எதிர்காலத்தை உருவாக்குவதில் மிகச்சிறந்த பங்களிப்பை அளித்து வருகின்றனர். மாணவர்களின் கல்வித்தரத்தை மட்டுமின்றி, அவர்களின் வாழ்வை வளப்படுத்துவதிலும், ஆசிரியர்களின் பங்கு அளப்பரியது என்பதை கவுரவிக்கவும், இந்த விருது வழங்கப்படுகிறது.