மலர்ந்த மனம்

**சிவா** · **சிவா** Mon Feb 01, 2010 8:24 pm

பூ ஒன்றின் பயணமிது.

பறித்த கரம் ஒன்றாக
தொடுத்த கரம் இன்னொன்றாக
எடுத்துச் சென்று விற்றுப் பணம்
பெற்றகரம் வேறெதுவோ ஆக...

தனியாக வந்தமலர்
சரமாகிப் போனதுவோ?
சரமாகிப்போனதெல்லாம்
தெய்வத் திருமேனியைத்தான்
சார்ந்ததுவோ?
மங்கையரின் கருங்கூந்தலிலே
மணம் வீசிக் கொண்டிருக்கிறதோ?
மறைந்தவரின் மேனியதன்
மலர் வளையத்தில் அடங்கியதோ?

பயணத்தின் வழிதெரியா
பலவண்ணப் பூக்கள் எல்லாம்
மரணத்தின் எல்லைவரை
மணம் வீசி மலர்ந்திருக்கும்

மலரைப் போல் மனமிருந்தால்
மரணம் வரை துயரமில்லை

- ஷைலஜா