பெண்கள் தகராறை தடுத்த பள்ளி மாணவன் படுகொலை

ஆத்தூர் அருகே பெண்களுக்கு இடையே ஏற்பட்ட தகராறை விலக்கிவிட்ட பிளஸ் 2 மாணவன் வெட்டிக் கொலை செய்யப்பட்டான். துப்புரவு தொழிலாளியை போலீசார் கைது செய்து விசாரித்து வருகின்றனர்.
சேலம் மாவட்டம் ஆத்தூர் அருகே ஆரகலூர் கிராமத்தை சேர்ந்தவர் வீரப்பன். சேலம் மத்திய சிறையில் வார்டனாக பணியாற்றி வருகிறார். மனைவி மலர்க் கொடி (50). மகள் கலைவாணி (23), ஆசிரியர் பயிற்சி முடித்துவிட்டு வீட்டில் இருக்கிறார். மகன் ராஜாஜி (18), பிளஸ் 2 படித்து வந்தார். இன்று கடைசி தேர்வு எழுத இருந்தார்.

வீரப்பன் வீட்டில் ஒரு குட்டை உள்ளது. பக்கத்து வீட்டில் வசிக்கும் துப்புரவு தொழிலாளி முருகேசன் மனைவி வாசுகி, கழிவு பொருட்களை குட்டையில் கொட்டியதாக கூறப்படுகிறது. இதுதொடர்பாக இரு வீட்டாருக்கும் முன்விரோதம் இருந்து வந்துள்ளது. இந்நிலையில், நேற்று குட்டையில் எலும்பு துண்டுகளை வாசுகி கொட்டியுள்ளார். இதை மலர்க்கொடி தட்டிக் கேட்டதால் அவர்களுக்குள் தகராறு ஏற்பட்டுள்ளது.
இரவு 8 மணிக்கு முருகேசன், வாசுகி மற்றும் சிலர் மலர்க்கொடியிடம் தகராறு செய்துள்ளனர். வாக்குவாதம் முற்றிய நிலையில் கலைவாணியை வாசுகி தாக்கியுள்ளார். வீட்டுக்குள் படித்து கொண்டிருந்த ராஜாஜி ஓடிவந்து, தகராறை விலக்கி விட்டு அக்காவை வீட்டுக்குள் அழைத்து செல்ல முயன்றுள்ளார்.

அப்போது மறைத்து வைத்திருந்த அரிவாளால் ராஜாஜியை, முருகேசன் சரமாரியாக வெட்டினார். அந்த இடத்திலேயே மாணவன் துடிதுடித்து இறந்தார். கலைவாணி, மலர்க்கொடிக்கும் அரிவாள் வெட்டு விழுந்தது. அவர்கள் ஆத்தூர் அரசு ஆஸ்பத்திரியில் சேர்க்கப்பட்டனர். தலைவாசல் போலீசார் வழக்கு பதிவு செய்து முருகேசனை தேடிவந்தனர். நேற்றிரவு அவர் போலீசில் சிக்கினார். அவரை கைது செய்து விசாரணை நடத்தி வருகின்றனர்.