பள்ளி மாணவி மீது ஆசிட் வீசி கொலை

arularjuna · arularjuna Mon Apr 12, 2010 9:22 am

குண்டூர்:ஆந்திராவில் இளைஞர் ஒருவர், தன்னை காதலிக்க மறுத்த பள்ளி மாணவி மீது, ஆசிட் வீசி, கொலை செய்த சம்பவம் பரபரப்பை ஏற்படுத்தியுள்ளது.ஆந்திரா, பிரகாசம் மாவட்டத்தைச் சேர்ந்த இளைஞர் சுப்பா ராவ். குண்டூர் மாவட்டத்தைச் சேர்ந்த பள்ளி மாணவி லலிதா (15). இருவரும் பழகி வந்தனர். சுப்பா ராவுக்கு, லலிதா மீது காதல் ஏற்பட்டது. இது தொடர்பாக லலிதாவுக்கு அடிக்கடி தொல்லை கொடுத்து வந்துள்ளார், சுப்பா ராவ்.இதனால், சுப்பா ராவுடன் பேசுவதை, லலிதா நிறுத்தி விட்டார். இது, சுப்பா ராவுக்கு ஆத்திரத்தை ஏற்படுத்தியது.

இந்நிலையில், குண்டூரில் உள்ள தனது சகோதரியின் வீட்டில் லலிதா தங்கியிருந்தார். இரவு நேரத்தில் அந்த வீட்டுக்கு சென்ற சுப்பா ராவ், கதவை தட்டினார். கதவு திறந்ததும், வேகமாக உள்ளே நுழைந்தார்.படுக்கை அறையில் லலிதா தூங்கிக் கொண்டிருந்தார். லலிதாவை எழுப்பி, தகராறு செய்தார். கோபத்தில், மறைத்து வைத்திருந்த ஆசிட்டை எடுத்து லலிதா மீது வீசினார்.

இதில், லலிதாவின் உடல் முழுவதும் தீக் காயங்கள் ஏற்பட்டன.ஆபத்தான நிலையில் மருத்துவமனையில் அனுமதிக்கப்பட்ட லலிதா, பரிதாபமாக பலியானார். குண்டூர் போலீசார் வழக்கு பதிவு செய்துள்ளனர்.ஆந்திராவில் பரபரப்பை ஏற்படுத்தியுள்ள இந்த ஆசிட் வீச்சு சம்பவம் தொடர்பாக, மாநில உள்துறை அமைச்சர் சபீதாரெட்டி கூறுகையில், 'இதுபோன்ற குற்றச் செயல்களில் ஈடுபடுவோர் மீது கடும் நடவடிக்கை எடுக்கப் படும்.இதுபோன்ற பிரச்னைகளுக்காக, 'ஹெல்ப் லைன்' ஒன்றும் ஏற்படுத்தப்பட்டுள்ளது. அவசர காலங்களில் பொதுமக்கள் இதில் தொடர்பு கொள்ளலாம்' என்றார்.