ஆப்கானிஸ்தானில் ஆயிரம் அமெரிக்க வீர்ர்கள் பலி

தலிபான்களின் பிடியில் இருந்த ஆப்கானிஸ்தானை அமெரிக்கா உள்ளிட்ட வெளிநாட்டு படைகள் மீட்டன. இதையடுத்து அங்கு பதுங்கியிருக்கும் அல்கொய்தா தீவிரவாதிகளையும், அவர்களுக்கு ஆதரவு அளிக்கும் தலிபான்களையும் கூண்டோடு அழிக்க அங்கு முகாமிட்டு உள்ளனர்.
இவர்களுக்கு எதிராக தலிபான் தீவிரவாதிகள் தாக்குதல்களை நடத்தி வருகிறார்கள். வெளிநாட்டு படைகளை நாட்டை விட்டு வெளியேற்ற வேண்டும் என வலியுறுத்தி பல வன்முறை சம்பவங்கள், தற்கொலை தாக்குதல்களை நடத்தி வருகின்றனர்.

இதனால் ராணுவத்துக்கும், தீவிரவாதிகளுக்கும் இடையே தொடர்ந்து சண்டை நடந்து வருகிறது. இதில், தலிபான் தீவிரவாதிகள் கொல்லப்பட்டாலும், வெளி நாட்டு ராணுவ வீரர்கள் பலரும் பலியாகி வருகின்றனர்.

இவர்களில் அமெரிக்க ராணுவ வீரர்கள் மட்டும் இதுவரை 1000 பேர் பலியாகி இருப்பதாக தெரிய வந்துள்ளது. கடந்த 2001-ம் ஆண்டு முதல் அமெரிக்க படைகள் ஆப்கானிஸ்தானில் முகாமிட்டுள்ளன.

அதில் 2006ம் ஆண்டு வரை அமெரிக்க வீரர்களின் சாவு எண்ணிக்கை 100 ஆக தான் இருந்தது. 2007-ம் ஆண்டுக்கு பிறகு தான் தீவிரவாதிகளால் அதிக அளவில் அமெரிக்க வீரர்கள் கொல்லப்பட்டனர். நேற்று தெற்கு ஆப்கானிஸ்தானில் நடந்த குண்டு வெடிப்பில் அமெரிக்க வீரர்கள் 2 பேர் பலியானார்கள்.

அவர்களை சேர்த்து இதுவரை 1001 அமெரிக்க வீரர்கள் கொல்லப்பட்டுள்ளனர். ஈராக்கிலும் அமெரிக்க படைகள் முகாமிட்டுள்ளன. அங்கு ஆப்கானிஸ்தானை விட அதிக அளவில் அமெரிக்க வீரர்கள் பலியாகி உள்ளனர். சண்டை தொடங்கிய 18 மாதத்திலேயே 1000 பேர் பலியாகி உள்ளனர்.