ஈழத்தமிழர் பிரச்னையில் நேரடியாக தலையிட இந்தியா முடிவு?

ரபீக் · ரபீக் Sat Jun 12, 2010 10:59 am

இலங்கை சிறுபான்மை கட்சிகள் அனைத்தையும் நேரடியாக அழைத்துப் பேசி நீண்டகால ஈழத்தமிழர் பிரச்னைக்கு தீர்வுகாண இந்தியா முடிவெடுத்துள்ளதாக தெரியவந்துள்ளது.

விடுதலைப் புலிகளுடனான போர் முடிவுக்கு வந்து ஓராண்டுக்கு மேல் ஆன நிலையிலும் ஈழத்தமிழர் பிரச்னைக்கு அந்நாட்டு அரசால் தீர்வு காண முடியவில்லை. அங்கு தொடர்ந்து தமிழர்கள் துயரம் அடைவது தவிர்க்க முடியாததாகவே இருந்து வருகிறது. இது இந்திய அரசுக்கு பலத்த ஏமாற்றத்தை ஏற்படுத்தியுள்ளது. இதனால் தாங்களே நேரடியாக களத்தில் இறங்கி ஈழத்தமிழர் பிரச்னைக்கு தீர்வுகாண இந்திய அரசு திட்டமிட்டுள்ளதாக ஆசியான் டிரிபியூன் இணையதளத்தில் குறிப்பிடப்பட்டுள்ளது.

இலங்கை சிறுபான்மை கட்சிகளை தனித்தனியாக தில்லிக்கு அழைத்துப் பேச்சு நடத்த இந்திய அரசு முடிவெடுத்துள்ளது. அந்தவகையில் ஈழத்தமிழர்கள் நலனுக்காகப் போராடிவரும் தமிழ் தேசிய கூட்டணிக் கட்சி பிரதிநிதிகளை முதலில் அழைத்துப் பேசி அவர்களின் கருத்துக்களை கேட்டறிய திட்டமிட்டுள்ளது. இதைத்தொடர்ந்து பிற சிறுபான்மை கட்சிகளை தனித்தனியே அழைத்துப் பேசுவது குறித்து தீவிரமாக ஆலோசித்து வருகிறது.

இலங்கை அதிபர் மகிந்த ராஜபட்ச இந்திய பயணத்தை முடித்துக் கொண்டு தாயகம் திரும்பியதும் இலங்கையின் சிறுபான்மை கட்சிகளை அழைத்துப் பேசும் நடவடிக்கையை இந்திய அரசு மேற்கொள்ளும்.

இந்த ஆலோசனையின் போது கட்சிகளிடம் இருந்து பெறப்படும் கருத்துகளை தொகுத்து இந்திய அரசு வரைவை தயாரிக்கும். பின்னர் அதை இலங்கை அரசின் பரிசீலனைக்கு அனுப்பி வைக்கும் என்றும் அந்த இணையதளத்தில் தெரிவிக்கப்பட்டுள்ளது.

வரவேற்பு: இலங்கை சிறுபான்மை கட்சிகளை அழைத்துப் பேசி ஈழத்தமிழர் பிரச்னைக்கு தீர்வு காண இந்திய அரசு முடிவெடுத்துள்ளதை தாங்கள் வரவேற்பதாக இலங்கையை சேர்ந்த முஸ்லிம் கட்சியின் மூத்த தலைவர் ஒருவர் தெரிவித்துள்ளார்.

இந்த ஆலோசனைக் கூட்டம் நடைபெறும் என்ற நம்பிக்கை உள்ளது. இதற்காக நாங்கள் ஆவலுடன் காத்திருக்கிறோம் என்றும் அவர் கூறினார்.

எதிர்ப்பு: ஈழத்தமிழர் பிரச்னையை தீர்க்க இந்திய அரசே நேரடியாகத் தலையிட உள்ளது என்று தகவல் வெளியாகியுள்ளதற்கு இலங்கையின் பிரதான எதிர்க்கட்சியான ஐக்கிய தேசிய கட்சி எதிர்ப்பு தெரிவித்துள்ளது.

இணையதளத்தில் வெளியாகியுள்ள தகவல் குறித்து அதிபர் மகிந்த ராஜபட்ச தெளிவுபடுத்த வேண்டும் என்று அந்தக் கட்சித் தலைவர்கள் வலியுறுத்தியுள்ளனர்.

இந்த விவகாரத்தை இலங்கை நாடாளுமன்றத்தில் எழுப்பி பேசிய ஐக்கிய தேசிய கட்சியின் மூத்த தலைவர்களில் ஒருவரான ரவி கருணநாயகே, ஒருவேளை இந்திய அரசு ஈழத்தமிழர் பிரச்னையில் நேரடியாகத் தலையி விரும்பினால், சிறுபான்மை கட்சிகளை மட்டும் அழைத்துப் பேசக்கூடாது. அப்படி பேசுவது சிறந்த பலனைத் தராது. நாட்டின் பிரதான கட்சிகளையும் அழைத்துப் பேச வேண்டும் என்று வலியுறுத்தினார்.

விடுதலைப் புலிகளுடனான போர் நிறைவடைந்த பின்னர் இலங்கை அதிபர் மகிந்த ராஜபட்ச முதல் முறையாக இந்தியா வந்து சென்றுள்ளார். அவரது பயணத்துக்கு தமிழகத்தில் கடும் எதிர்ப்பு கிளம்பியது.

விடுதலைப் புலிகளுக்கு எதிரான போர் என்று சொல்லி அப்பாவி தமிழ் மக்களை கொன்று குவித்து மனிதப் படுகொலையை அரங்கேற்றிய ராஜபட்சவை இந்திய மண்ணில் சிவப்புக்கம்பளம் விரித்து வரவேற்பதா என்று தமிழ் ஆர்வலர்கள் குரல் எழுப்பியுள்ளனர். புலிகளுடனான போர் முடிவடைந்து ஓராண்டுக்கு மேல் ஆகியும் ஈழத்தமிழர்களை அவர்களது பகுதியிலேயே குடியமர்த்துவது, மறுவாழ்வு அளிப்பது தொடர்பாக அளித்த வாக்குறுதியை ராஜபட்ச இதுவரை காப்பாற்றவில்லை. ஏதாவது ஒரு காரணத்தை சொல்லி தட்டிக்கழித்து வருகிறார்.

ராஜபட்சவின் இந்த மெத்தனத்தால் ஆயிரக்கணக்கான தமிழர்கள் இன்னும் முகாம்களில் சிறைவைக்கப்பட்டுள்ளனர். அந்த முகாம்களில் அவர்கள் படும் துயரம் சொல்லி மாளாது. இலங்கையில் இப்படி தமிழர்கள் சித்திரவதைபடும் போது அந்த நாட்டு அதிபர் மகிந்த ராஜபட்சவை இந்தியாவுக்கு அழைத்து அவருடன் ஒட்டி உறவாடுவது ஏற்கத்தக்கதல்ல. இந்திய அரசின் இந்த நடவடிக்கை ஒட்டு மொத்த தமிழ் மக்களின் மனதை புண்படுத்தும் விதத்தில் உள்ளது என்று சர்வதேசம் முழுவதும் வாழும் தமிழர்கள் தங்களது ஆதங்கத்தை வெளிப்படுத்தியுள்ளனர்.