தாவூத்இப்ராகிம் என்னை கொல்ல சதி அபுசலீம் அலறல்

மும்பையில் பிரபல தாதாவாக செயல்பட்டு வந்தவன் அபுசலீம்.

1993-ம் ஆண்டு மும்பையில் நடந்த தொடர் குண்டு வெடிப்பில் சம்பந்தப்பட்டு இருந்தான். குண்டு வெடிப்புக்கு பிறகு தலைமறைவாகி வெளிநாட்டில் தஞ்சம் அடைந்தான். அவனுடைய காதலி நடிகை மோனிகாபேடியும் அவருடன் சென்று இருந்தான்.

2005-ம் ஆண்டு இருவரும் போர்ச்சுக்கல் நாட்டில் தங்கி இருந்தபோது அந்த நாட்டு போலீசார் அவர்களை கைது செய்து இந்தியாவிடம் ஒப்படைத்தனர்.

அவன் மும்பை ஆர்தர் ரோடு ஜெயிலில் அடைக்கப்பட்டான். அபுசலீம் மீது மும்பை குண்டு வெடிப்பு வழக்கு, 2 கொலை வழக்கு உள்ளிட்ட 7 வழக்குகள் நிலுவையில் உள்ளன.

இந்த நிலையில் ஆர்தர் ரோடு ஜெயிலில் அபுசலீமுடன் தங்கியிருந்த முகமது முஸ்தபா என்ற கைதி அபுசலீமை தாக்கினார். கரண்டி ஒன்றை கூர்மையான ஆயுதமாக மாற்றி அபுசலீம் தலை, கழுத்து மற்றும் பல்வேறு இடங்களில் குத்தினார்.

இதில் படுகாயம் அடைந்த அபுசலீமுக்கு ஜெயில் ஆஸ்பத்திரியில் சிகிச்சை அளிக்கப்பட்டது. இந்த சம்பவத்தை அடுத்து அபுசலீம் பாதுகாப்பு கருதி அவனை ஆர்தர் ரோடு ஜெயிலில் இருந்து நியூமும்பையில் உள்ள தலோஜா ஜெயிலுக்கு மாற்றி உள்ளனர்.

அவன் தாக்குதல் குறித்து தனியார் டி.வி. சானல் ஒன்றுக்கு பேட்டியளித்துள்ளான். அவன் கூறியதாவது:-

என்னை கொல்வதற்கு தாவூத் இப்ராகிம் சதி திட்டத்தை தீட்டி இருக்கிறான். அவன் தூண்டுதலால்தான் முகமது முஸ்தபா என்னை கொல்ல வந்தான்.

முகமது முஸ்தபாவை என்னுடன் ஒரே அறையில் அடைக்கும் போதே ஜெயில் சூப்பிரண்டிடம் அவனை என் அறையில் அடைக்க வேண்டாம், அவனால் எனக்கு ஆபத்து ஏற்படலாம் என கூறினேன். ஆனால் அவர் கேட்கவில்லை.

இத்தனைக்கும் எனது உயிருக்கு ஆபத்து இருப்பதாக போலீஸ் சூப்பிரண்டு எச்சரித்தார். இருந்தும் முகமது முஸ்தபாவை எனது அறையில் அடைத்தனர்.

சம்பவத்தன்று நான் முகமது முஸ்தபாவுடன் எனக்கு வாக்குவாதமோ, தகராறோ இல்லை. இருந்தும் அவன் என்னை தாக்கினான்.


இப்போது இருக்கும் ஜெயிலிலும் எனக்கு பாதுகாப்பு இல்லை. தாவூத் இப்ராகிம் என்னை கொலை செய்ய தொடர்ந்து முயற்சிக்கிறான். இதனால் என் உயிருக்கு ஆபத்து ஏற்பட்டு உள்ளது.

இவ்வாறு அவன் கூறினான்.
தாவூத் இப்ராகிமின் முக்கிய கூட்டாளியாக அபுசலீம் முன்பு இருந்து வந்தான். வெளிநாட்டுக்கு தப்பி சென்றபிறகு இருவருக்கும் இடையே மோதல் ஏற்பட்டது.