தீபாவளிக்கு ரயில் டிக்கெட் முன்பதிவு நாளை தொடங்குகிறது

சென்னை :தீபாவளி பண்டிகைக்கு சொந்த ஊர் செல்ல விரும்பும் பயணிகள் வசதிக்காக டிக்கெட் முன்பதிவு நாளை தொடங்குகிறது. டிக்கெட்கள் இடைத்தரகர்கள் கையில் சிக்காமல் இருக்க ரயில்வே நிர்வாகம் தகுந்த நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

தீபாவளி பண்டிகை வரும் நவம்பர் 5ம் தேதி கொண்டாடப்படுகிறது. நாட்டின் எந்தப்பகுதியில் வசித்தாலும் சொந்த ஊரில் தீபாவளி கொண்டாடவே பெரும்பாலானோர் விரும்புகின்றனர். இதனால் வெளி மாவட்டங்கள், வெளி மாநிலங்களில் உள்ள மக்கள் தங்கள் சொந்த ஊருக்குச் செல்ல முன்கூட்டியே பயணத் திட்டத்தை தயார் செய்து வருகின்றனர்.


ஒரே சமயத்தில் பெரும்பாலானோர் பயணம் செய்ய நினைப்பதால் ரயில்கள், பஸ்களில் அனைவருக்குமே இடம் கிடைப்பது இல்லை. இந்த ஆண்டு தீபாவளி பண்டிகை வெள்ளிக்கிழமை வருகிறது. சனி, ஞாயிறு விடுமுறை என்பதால் கல்வி நிறுவனங்கள், அரசு அலுவலங்களில் பணியாற்றுவோர் மற்றும் தனியார் நிறுவனங்களைச் சேர்ந்தவர்களுக்கு தீபாவளி பண்டிகை இரட்டிப்பு மகிழ்ச்சியை அளித்துள்ளது. இதனால், நவம்பர் முதல் வாரம் முழுவதும் தீபாவளிப் பண்டிகையைக் கொண்டாட மக்கள் தயாராகி வருகின்றனர்.
ரயில்களுக்கு சாதாரண நாட்களிலேயே டிக்கெட் கிடைப்பது சிரமம். முன்பதிவு முறையில் டிக்கெட் பெறுவது என்பது குதிரைக் கொம்பாக இருக்கிறது. டிராவல் ஏஜன்ட்கள், புரோக்கர்கள் என பலரும் முன்பதிவு தொடங்கிய அடுத்த சில நிமிடங்களிலேயே மொத்த டிக்கெட்களையும் அள்ளிவிடுகின்றனர். இதனால், மக்கள் மிகுந்த அவதிக்குள்ளாகி வருகின்றனர்.


காலையில் முன்பதிவு தொடங்கும்போது ஒரு மணி நேரம் கழித்து டிராவல் ஏஜன்ட்களுக்கு அனுமதி அளிக்கப்படும் என ரயில்வே துறை அறிவித்திருந்த போதிலும் அது இன்னும் நடைமுறைக்கு வரவில்லை. இதனால், டிராவல் ஏஜன்ட்கள், புரோக்கர்கள் பணத்தை வாரிச் சுருட்டுகின்றனர். ரயிலில் பயணம் செய்ய 90 நாட்களுக்கு முன்னதாகதான் முன்பதிவு செய்ய முடியும். இதனால், தீபாவளி பண்டிகைக்கான முன்பதிவு நாளை (ஆக.3) தொடங்குகிறது. எனவே, இந்த நாட்களில் புரோக்கர்கள், டிராவல் ஏஜன்ட்கள் டிக்கெட்களை மொத்தமாக வாங்குவதைத் தடுக்க ரயில்வே நிர்வாகம் நடவடிக்கை எடுக்க வேண்டும். ஏழைய எளிய, நடுத்தர மக்களுக்கு டிக்கெட் கிடைப்பதற்கு வழிவகை செய்ய வேண்டும் என பொதுமக்கள் கோரிக்கை விடுத்துள்ளனர்.