இன்ஜினியரிங் கல்லூரியில் மாணவர்கள் தற்கொலை முயற்சி

கிருஷ்ணகிரி :
பர்கூர் இன்ஜினிரிங் கல்லூரியில் செமஸ்டர் செய்முறை
தேர்வில் பெயில் ஆனதால், ஐந்து மாணவர்கள் தூக்க மாத்திரை சாப்பிட்டு
வகுப்பறையில் தற்கொலைக்கு முயன்றதால் பரபரப்பு ஏற்பட்டது.
கிருஷ்ணகிரி மாவட்டம் பர்கூரில் அரசு இன்ஜினியரிங் கல்லூரியில்
1,500க்கும் மேற்பட்ட மாணவர்கள் படிக்கின்றனர். நேற்று காலை வழக்கம் போல்
கல்லூரியில் வகுப்புகள் துவங்கின. கம்ப்யூட்டர் சயின்ஸ் பிரிவில் மூன்றாம்
ஆண்டு படிக்கும் மாணவர்கள் நெய்வேலி காட்டு மன்னாரைச் சேர்ந்த மணிகண்டன்
(20) பர்கூரைச் சேர்ந்த பூபாலன் (20) ஒரப்பத்தைச் சேர்ந்த சந்தோஷ் (20)
மருகூரைச் சேர்ந்த கிருஷ்ண மணிகண்டன் (23) நான்காம் ஆண்டு படிக்கும்
ராமநாதபுரம் பாரதிநகரைச் சேர்ந்த அருண்காந்தி (21) ஆகிய மாணவர்கள்
திடீரென்று அடுத்தடுத்து வகுப்பறையில் மயங்கி விழுந்தனர். அதிர்ச்சியடைந்த
கல்லூரி நிர்வாகம் அவர்களை மீட்டு சிகிச்சைக்காக கிருஷ்ணகிரி அரசு
மருத்துவமனையில் சேர்த்தனர். பர்கூர் போலீசார் விசாரித்தனர். நேற்று
முன்தினம் செமஸ்டர் தேர்வு முடிவுகள் வெளியானது. இதில், நான்காம் ஆண்டு
கம்ப்யூட்டர் சயின்ஸ் பிரிவில் கம்ப்யூட்டர் நெட்வொர்க் செய்முறை தேர்வில்
12 மாணவர்களும், மூன்றாம் ஆண்டு, "மைக்ரோ பிராசஸ்' செய்முறை தேர்வில் 15
மாணவர்களும் தேர்ச்சி பெறவில்லை.
அதிர்ச்சியடைந்த மாணவர்கள், மதிப்பெண் பட்டியலை பார்த்தபோது,
சம்பந்தப்பட்ட பாடங்களை எடுக்கும் பேராசிரியர்கள் போடும் இன்டர்னல்
மதிப்பெண் மிகவும் குறைவாக கிடைத்ததால் பெயில் ஆனது தெரிந்தது.
விரக்தியடைந்த மாணவர்கள், தூக்க மாத்திரைகளை அளவுக்கு அதிகமாக சாப்பிட்டு
வகுப்பறைக்கு சென்றனர். வகுப்பறையில் மயங்கி விழுந்தது தெரிந்தது. கல்லூரி
நிர்வாகத்திடம் கேட்ட போது, "தேர்வில் பெயில் ஆனதால் பெற்றோருக்கு பயந்து
தற்கொலை செய்ய முயற்சியில் ஈடுபட்டுள்ளனர்' என்றனர். மாணவர்கள்
கூறுகையில், "கம்ப்யூட்டர் பாடம் எடுக்கும் பேராசிரியர் குமார்,
வகுப்பறையில் மாணவர்களிடம் கெடுபிடியாக நடந்து கொள்வார். பாடம் நடத்துவதை
தவிர்த்து, மாணவர்களின் தனிப்பட்ட விவகாரங்களில் தலையீடு செய்து வந்தார்.
அதனால், அவரிடம் வாக்குவாதம் செய்த மாணவர்களை பழிவாங்கும் வகையில்
திட்டமிட்டு மதிப்பெண்ணை குறைத்து போட்டுள்ளார். அதனால் பாதிக்கப்பட்ட
மாணவர்கள் தற்கொலை முயற்சிக்கு சென்றனர்' என்றனர்.
தற்கொலைக்கு முயன்ற மாணவர்களுக்கு ஆதரவாக கல்லூரியில் படிக்கும் மற்ற
மாணவர்கள் கல்லூரி அருகே கிருஷ்ணகிரி - சென்னை நெடுஞ்சாலையில் நேற்று
திடீர் சாலை மறியலில் ஈடுபட்டனர். மாணவர்களை தற்கொலைக்கு தூண்ட காரணமான
பேராசிரியர் மீது நடவடிக்கை எடுக்க வலியுறுத்தி கோஷம் போட்டனர்.