மஹிந்தவின் நல்லிணக்க ஆணைக்குழு விசாரணை இன்று ஆரம்பமாம்

நிசாந்தன் · நிசாந்தன் Wed Aug 11, 2010 11:36 am

இலங்கைப் போரின்போது இடம்பெற்ற போர்க்குற்றங்களை ஆராய்வதற்காக அரசாங்கத்தினால் நியமிக்கப்பட்டிருந்த கற்றுக்கொண்ட பாடங்கள் மற்றும் நல்லிணக்கத்துக்கான ஆணைக்குழுவானது தனது முதலாவது பகிரங்க விசாரணையை இன்று புதன்கிழமை ஆரம்பிக்கிறது. தலைநகர் கொழும்பில் 5 நாட்களும் வவுனியாவில் 2 நாட்களும் இந்த விசாரணையை எட்டு உறுப்பினர்களைக் கொண்ட ஆணைக்குழு மேற்கொள்ளும் என்று நேற்று செவ்வாய்க்கிழமை விடுக்கப்பட்டுள்ள அறிக்கை கூறுகிறது.

அரசாங்கத்திற்கும் விடுதலைப்புலிகளுக்குமிடையில் 2002 இல் கைச்சாத்திடப்பட்ட போர் நிறுத்த உடன்படிக்கை ஏன் சீர்குலைந்தது என்பது பற்றியும் அதன் பின்னர் அதிகளவு மோதல் ஏற்பட்டதற்கான காரணம் குறித்தும் ஆராய்வதில் இந்த விசாரணை ஆணைக்குழு கவனம் செலுத்துமென எதிர்பார்க்கப்படுகிறது. ஆரம்ப விசாரணையின் போது வெளிவிவகார அமைச்சின் முன்னாள் செயலாளரும், முன்னாள் சமாதான செயலகத்தின் பணிப்பாளரும், பிரித்தானியாவுக்கான முன்னாள் தூதுவருமான பர்னாட் குணதிலக மற்றும் கலாநிதி நல்லநாயகம் ஆகியோர் சாட்சியமளிப்பார்கள் எனத் தெரிவிக்கப்பட்டுள்ளது.

நாளைய தினம் கொட்பிறி குணதிலக மற்றும் இரந்தி விஜேமான்ன ஆகியோர் சாட்சியமளிப்பார்கள் என்றும் அதனைத் தொடர்ந்து 17 ஆம் 18 ஆம் திகதிகளிலும் 23 ஆம் 25 ஆம் திகதிகளிலும் விசாரணைகள் நடைபெறும் என்றும் தெரிவிக்கப்படுகிறது. போரினால் பாதிக்கப்பட்ட பகுதி மக்களிடம் சாட்சியங்களைப் பெறுவதற்காக எதிர்வரும் 14 ஆம் 15 ஆம் திகதிகளில் வவுனியாவில் இதன் பொது அமர்வும் நடைபெறவுள்ளதாக ஆணைக்குழுவின் இணைப்புச் செயலாளர் குறிப்பிட்டுள்ளார்.

இலங்கையானது பல போர்க்குற்றங்களைப் புரிந்து பொதுமக்களைக் கொன்றதாக குற்றம் சாட்டப்பட்டிருக்கும் நிலையில், தாம் பொதுமக்கள் எவரையுமே கொல்லவில்லை என்று அரசு கூறிவருவதோடு, தமது நல்லிணக்க ஆணைக்குழு தவிர வேறு குழுக்கள் எவையும் இவ்விசாரணையை நடத்துவதற்கும் அரசு விடாப்பிடியாக மறுத்து வருகிறது.

மஹிந்தவின் நல்லிணக்க ஆணைக்குழு விசாரணை இன்று ஆரம்பமாம்

மஹிந்தவின் நல்லிணக்க ஆணைக்குழு விசாரணை இன்று ஆரம்பமாம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக