பாகிஸ்தானில் இன்று சுதந்திரதின கொண்டாட்டம் ரத்து; வெள்ளம் பாதிப்புக்கு இந்தியா நட்புக்கரம்

இஸ்லாமாபாத்: என்னதான் முரட்டுத்தனம் காட்டினாலும் , பாதிப்பு என்ற போது நட்புக்கரம் நீட்டுவது இந்தியாவின் தனித்துவம் என்பதை காட்டும் வகையில் இந்தியா 5 மில்லியன் டாலர் பாகிஸ்தானுக்கு நிதி வழங்குவதாக இந்திய வெளியுறவு துறை அமைச்சகம் தெரிவித்துள்ளது. கடும் மழை வெள்ளத்தில் இருந்து இன்னும் மீள முடியாமல் தவிக்கும் பாகிஸ்தான் இன்று கொண்டாட இருந்த சுதந்திரதினத்தை ரத்து செய்துள்ளது.



பாகிஸ்தானில் கடந்த வாரம் பெய்த பேய் மழையில் சிந்து நதியில் வெள்ளம் கட்டுக்கடங்காமல் அருகில் இருந்த சுமார் 300 க்கும் மேற்பட்ட கிராமங்களை மூழ்கடித்தது. இதில் ஆயிரத்து 700 பேர் வரை உயிரிழந்தனர். லட்சக்கணக்கானவர்கள் வீடு இழந்தனர். கோடிக்கணக்கானவர்கள் பாதிக்கப்பட்டனர். இந்த வெள்ளம் காரணமாக ஏற்பட்ட இழப்புகள் மற்றும் சேதம் குறித்து உலக அளவில் பெரும் அனுதாபத்தை ஏற்படுத்தியது. ஐ.நா., முதல் அமெரிக்கா உள்ளிட்ட நாடுகள் உதவி செய்வதாக அறிவித்துள்ளது.



நிலநடுக்கத்தை விட பாதிப்பு பல மடங்கு : பாகிஸ்தானில் கடந்த 2005 ம் ஆண்டில் நடந்த நிலநடுக்கத்தை விட இந்த மழை பாதிப்பு பல மடங்கு அதிகம் என்கிறார் உலக வங்கி தலைவர் ராபர்ட் ஷாலிக். இவர் மேலும் கூறுகையில், பாகிஸ்தானில் 7 லட்சம் வீடுகள் முற்றிலும் இடிந்து தரைமட்டமாகி விட்டன . இங்குள்ள தேச பணிகள் மற்றும் நிவாரண ஏற்பாடுகள் செய்வதற்காக உலக வங்கி மற்றும் ஆசிய வளர்ச்சி வங்கி அதிகாரிகள் இங்கு சென்று ஆய்வு நடத்தி வருகின்றனர். இவ்வாறு அவர் ராபர்ட் கூறினார்.



ஐ.நா., பொதுசெயலர் பான்கீ மூன் இன்று ( சனிக்கிழமை ) அவசரமாக பாகிஸ்தான் புறப்பட்டு செல்கிறார். அங்கு வெள்ள பாதிப்பு பணிகளை ஆய்வு செய்கிறார்.

இதற்கிடையில் இந்தியா பாகிஸ்தானுக்கு நிதி உதவி அளிப்பதாக அறிவித்துள்ளது. இந்திய வெளியுறவு துறை அமைச்சர் எஸ்.எம்., கிருஷ்ணா, அந்நாட்டு வெளியுறவு துறை அமைச்சர் குரேஷியை தொடர்பு கொண்டு இந்திய 5 மில்லியன் டாலர் தொகைகை வழங்கிட முன்வந்திருப்பதாக கூறினார்.



இந்நிலையில் ஆண்டுதோறும் பாகிஸ்தானில் சிறப்பாக கொண்டாடப்படும் சுதந்திர தினம் இன்று ( ஆக., 14 ) ரத்து செய்யப்பட்டுள்ளது. அதிபர் சர்தாரி மற்றும் பிரதமர் கிலானி ஆகியோர் நாடு முழுவதும் இந்த சுதந்திர தினம் இன்று கொண்டாடப்படவில்லை என அறிவித்துள்ளனர். இந்த சுதந்திர தினத்திற்கு செலவாகும் தொகையை மீட்பு பணிக்கு ஒதுக்கி விடவும் முடிவு செய்துள்ளனர்.


: :த

http://tamilpalakai.blogspot.com/