'பன்றிக் காய்ச்சலை குணப்படுத்த ஆயுர்வேதமும் யோகாவும் உதவும்'

பெங்களூர்: பன்றிக் காய்ச்சலை சமாளிப்பதற்கான சக்தி, இந்திய ஆயுர்வேத மருத்துவத்துக்கும், யோகப் பயிற்சிக்கும் உண்டு என்று ஸ்ரீ ஸ்ரீ ரவிஷங்கரின் வாழும் கலை அமைப்பு தெரிவித்துள்ளது.

இதுகுறித்து அந்த அமைப்பின் ஸ்ரீ ஸ்ரீ ஆயுர்வேத மையம் இன்று வெளியிட்டுள்ள அறிக்கை:

ஸ்ரீ ஸ்ரீ ஆயுர்வேத மையத்தின் மூத்த மருத்துவர்கள் கூறுகையில், பன்றிக் காய்ச்சல் வைரஸ் கிருமிகள் நம் உடம்பில் உள்ள நோய் எதிர்ப்புச் சக்தியை குறைத்துவிடும். இந்தத் தாக்கத்தால் தான் பாதிப்பு மிகுதியாகிவிடுகிறது. நோய் எதிர்ப்புச் சக்தியை அதிகரிக்கச் செய்யும் வகையிலான ஆயுர்வேத நிவாரணிகள் நிறையவே உள்ளன.

லக்ஸ்மி டாரு (botanical name: Simarouba) என்ற இலைகள் மூலம் தயாரிக்கப்பட்ட தேநீர், துளசி, நெல்லிக்காய், அம்ருத் போன்றவை நோய் எதிர்ப்பு சக்தியை உடனடியாகக் கூட்டும் வல்லமை கொண்டவை. மேலும், இஞ்சி மற்றும் மஞ்சள் பவுடர் ஆகியவற்றை எலுமிச்சை பழச்சாறு அல்லது தேனுடன் கலந்து ஒருநாளுக்கு இரண்டு முறை சாப்பிட்டால் நோய் எதிர்ப்புச் சக்தி கூடும்.

காற்றின் மூலம் எளிதில் பரவும் பன்றிக் காய்ச்சல் வைரஸை தடுக்க, வீட்டில் தினமும் இரண்டு முறை சாம்பிராணி புகையை மூட்ட வேண்டும். சாம்பிராணி புகைக்கு நச்சுப் பொருட்களை அகற்றும் வல்லமை உண்டு.

நோய் எதிர்ப்பு சக்தியைக் கூட்டுவதைப் பொருத்தமட்டில், நமது மனமும் முக்கிய பங்காற்றுகிறது. எப்போதெல்லாம் அச்சத்தால் பதற்றம் கொள்கிறோமோ, அப்போதெல்லாம் நோய் எதிர்ப்பு சக்தி குறைந்துவிடும். எனவே, மனத்தை அமைதியாக வைத்துக்கொள்ள பிராணயாமம் பயிற்சி மிகவும் உறுதுணைபுரியும்.

நமது உடலின் நோய் எதிர்ப்புச் சக்தியை மூன்று மடங்காக உயர்த்தும் வல்லமை பிராணயாமம் பயிற்சி மற்றும் தியானத்துக்கு உண்டு என்பதை டெல்லியில் உள்ள எய்ம்ஸ் என்று அழைக்கப்படும் அகில இந்திய மருத்துவ விஞ்ஞான கழகம் மற்றும் பெங்களூரில் உள்ள நேஷனல் இன்ஸ்டிட்யூட் ஆஃப் மென்டல் ஹெல்த் அண்ட் நியூரோ சைன்ஸஸ் ஆகியவை உறுதி செய்துள்ளன.

நாம் இந்த இந்தப் பயிற்சிகளை தினமும் செய்து வருவதுடன், எளிய ஆயுர்வேத நிவாரணிகளை தகுந்த ஆயுர்வேத சிகிச்சை மருத்துவர்களின் ஆலோசனையுடன் எடுத்துக் கொண்டால் பன்றிக் காய்ச்சல் வைரஸை வென்று விட முடியும் என்று ஆயுர்வேத மருத்துவர்கள் தெரிவித்துள்ளதாக ஸ்ரீ ஸ்ரீ ஆயுர்வேத மையம் தனது அறிக்கையில் கூறியுள்ளது.