கழுகின் கண்கள்

**சிவா** · **சிவா** Thu 20 Aug 2009 - 19:11

கூர்மையான பார்வைத்திறன் படைத்தவரை "அவருக்குக் குழுகுக் கண்" என ஸ்பெயின் நாட்டவர் வர்ணிப்பார்கள். தமிழிலும் ஒருவருடைய கூரிய பார்வையை கழுகுப்பார்வை எனச் சொல்லுவதுண்டு. கழுகின் கூர்மையான பார்வைநூற்றாண்டுக் கணக்கில் உருவகமாகப் பேசப்படுவது. காரணமில்லாமலா?! உண்மையில் எந்தளவு தூரத்திலிருந்து கழுகினால் பார்க்கமுடியும்? ஏற்ற சூழ்நிலைகளில் கோல்டன் ஈகிள் (Golden Eagle) என அழைக்கப்படும் பொன் கழுகு ஒரு முயலின் அசைவை இரண்டு கிலோமீட்டருக்கும் அதிக உயரமரத்திலிருந்து கூட கண்டு கொண்டுவிடும். என "த கின்னஸ் புக் ஒஃப் அனிமல் ரெக்கோர்ட்ஸ்" விளக்கிறது. இன்னும் அதிக தொலைவிலிருந்தும் கழுகினால் தெளிவாக பார்க்கமுடியும் என்பது சிலரது கணிப்பு!

கழுகால் அந்தளவுக்கு கூர்மையாக பார்க்க முடிவது எப்படி? முதலாவதாக கோல்டன் ஈகிளின் இரண்டு பெரிய கொட்டைக் கண்கள் அதன் தலையின் பெரும்பகுதியை ஆக்கிரமித்து விடுகின்றன. பொன் கழுகின் கண்கள் "எந்தளவுக்கு பெரியதாக இருக்க முடியுமோ அந்தளவுக்கு பெரியதாக இருக்கின்றன". அதே சமயத்தில் இடைஞ்சலுண்டாகும் அளவுக்கு அவை பெரிதாகவில்லை என "புக் ஒஃப் பிரிட்டிஷ்" (என்ற நூல்) குறிப்பிடுகின்றது.

மேலும் நமக்குள்ளதை விட சுமார் ஐந்து மடங்கு அதிகமான ஒளி உணர்வு செல்கள் கழுகின் கண்களில் உள்ளன. நமக்கு ஒரு சதுர மில்லி மீட்டரில் 200,000 கூம்பு செல்களே இருக்கின்றன. கழுகிற்கோ சுமார் 1,000,000 கூம்புசெல்கள் உள்ளன. ஒவ்வொரு உள்வாங்கியும் ஒரு நியுரோனுடன் இணைக்கப்பட்டுள்ளது. இதனால் கண்களிலிருந்து மூளைக்கும் செய்திகளை சுமந்து செல்லும் கழுகினுடைய பார்வைநரம்பில் மனிதனுக்கு உள்ளதைவிட இரண்டு மடங்கு அதிகமான நார்கள் (Fibers) காணப்படுகின்றன. அந்தப் பறவைகள் நிறங்களை அடையாளங்கண்டு கொள்வதில் பலே கில்லாடிகளாக இருப்பதில் ஆச்சரியமேதுமில்லை. இறுதியாக மற்றப் பறவைகளைப் போலவே இரையைக் கொன்று தின்னும் இப்பறவைகளின் கண்களிலும் சக்திவாய்ந்த"லென்ஸ்" உண்டு. இதனால் ஒரு அங்குலம் தூரமுள்ள பொருட்களிலிருந்து வெகு தொலைவிலுள்ள பொருட்கள் வரை எதையும் சட்டென "ஜூம்" (Zoom) செய்து பார்க்ககூடியதாயுள்ளது. இந்த விஷயத்திலும் அவற்றின் கண்கள் நம்முடையதைவிட ரொம்பவே மேலானவை.

கழுகின் பார்வை பகல்நேரம் நிகரற்று விளங்குகிறது. ஆந்தைக்கோ இரவு நேரம் வாகாக அமைகின்றது. இரையைக் கொன்று தின்னும் இந்த இரவு பறவைகளுக்கு கண்களில் ஒளி உணர்வு குச்சி செல்கள் (Rods) பெருமளவு இருப்பதோடு லென்சும் (Lense) பெரியதாக உள்ளது. இதனால், நம்மைக் காட்டிலும் இரவில் நூறு மடங்கு தெளிவாகக் காணமுடியும். எனினும், துளியும் வெளிச்சமில்லாத கும்மிருட்டு நேரங்களில் ஆந்தைகள் இரையைக் கண்டுபிடிக்க தங்கள் கூர்மையான செவியுணர்வையே முழுக்க முழுக்க நம்பியிருக்க வேண்டும்.