ஆராய்ச்சி அமைப்புகள் மீதான தடை நீக்கம்

இந்திய விண்வெளி மற்றும் பாதுகாப்பு நிறுவனங்களான ஐ.எஸ்.ஆர்.ஓ., மற்றும் டி.ஆர்.டி.ஓ., சார்ந்த ஒன்பது நிறுவனங்கள் மீதான தடையை அமெரிக்கா 13 ஆண்டுகளுக்கு பிறகு நேற்று நீக்கியது.
வாஜ்பாய் தலைமையில் தே.ஜ., கூட்டணி ஆட்சியில் இருந்த போது, 1998ல் இந்தியா "பொக்ரான்' அணு குண்டு சோதனையை நடத்தியது. அதற்கு கடும் எதிர்ப்பு தெரிவித்த அமெரிக்கா, இந்திய பாதுகாப்பு மற்றும் விண்வெளி சார்ந்த நிறுவனங்கள் பலவற்றுடனான வர்த்தகத் தொடர்பு மற்றும் ஒத்துழைப்புக்குத் தடை விதித்தது.

அமெரிக்காவின் ஏற்றுமதி நிர்வாக வரையறை ஆணையம் விதித்த இந்தத் தடைப் பட்டியலில், இந்திய விண்வெளி ஆராய்ச்சிக் கழகம்(ஐ.எஸ்.ஆர்.ஓ.,), பாதுகாப்பு மற்றும் ஆராய்ச்சி மேம்பாட்டுக் கழகம்(டி.ஆர்.டி.ஓ.,), பாரத் டைனமிக்ஸ், ராணுவத் தளவாட ஆராய்ச்சி மற்றும் மேம்பாட்டு நிறுவனம், பாதுகாப்பு ஆராய்ச்சி மற்றும் மேம்பாட்டு ஆய்வகம், ஏவுகணை ஆராய்ச்சி மற்றும் மேம்பாட்டு அமைப்பு, திட நிலை இயற்பியல் ஆய்வகம், திரவ எரிபொருள் திட்ட மையம், ஸ்ரீஹரிகோட்டா விண்வெளி மையம், விக்ரம் சாராபாய் விணவெளி மையம், திட உந்துசக்தி பூஸ்டர் உற்பத்தி மையம் ஆகிய நிறுவனங்கள் இருந்தன.

இந்நிலையில் கடந்த நவம்பர் மாதம் அமெரிக்க அதிபர் ஒபாமா இந்தியா வந்த போது இது பற்றி பேச்சு நடந்தது. இந்த வர்த்தக தடையை விரைவில் அமெரிக்க நீக்கும் என்று அதிபர் பிரதமருக்கு நேரில் உறுதி அளித்தார். இதற்கான நடைமுறைகள் இம்மாத தொடக்கத்தில் தொடங்கின.

இதையடுத்து நேற்று அமெரிக்க தடையை நீக்குவதாக அறிவித்தது. இது குறித்து அமெரிக்க வர்த்தக அமைச்சர் கேரி லாக் கூறுகையில் "அமெரிக்கா மற்றும் இந்தியாவுக்கு இடையே நெருங்கிய உறவை ஏற்படுத்துவதில் இது ஒரு மைல்கல். இதனால் தொழில்நுட்ப வர்த்தகம் மற்றும் ஒத்துழைப்பு அதிகரிக்கும்" என்று கூறினார்.

விடுப்பு குலுமம்