வருண்காந்திக்கு இன்று திருமணம்: வாரணாசியில் நடக்கிறது

**சிவா** · **சிவா** Sun Mar 06, 2011 10:09 am

வாரணாசி, மார்ச்.6- வருண்காந்திக்கு வாரணாசியில் இன்று காலை திருமணம் நடக்கிறது. இதில் பிரியங்கா உள்பட பல முக்கிய பிரமுகர்கள் கலந்து கொள்கிறார்கள்.

வருண்காந்தி திருமணம்

இந்திரா காந்தியின் பேரனும், மறைந்த சஞ்சய் காந்தி-மேனகா காந்தி எம்.பி.யின் மகனும், பா.ஜனதா கட்சி எம்.பி.யுமான வருண்காந்திக்கும், மே.வங்காள மாநிலம் கொல்கத்தாவைச் சேர்ந்த கிராபிக் டிசைனர் யாமினி ராய் சவுத்ரிக்கும் திருமணம் நிச்சயிக்கப்பட்டது. இவர்களது திருமணம் வாரணாசியில் (காசி) உள்ள காமகோடீசுவரர் கோவிலில் இன்று காலை 7 மணியில் இருந்து 10 மணிக்குள் நடக்கிறது.

கடந்த திங்கட்கிழமை மேனகா காந்தியின் தாய் மரணம் அடைந்தார். இதன் காரணமாக திருமணம் மிகவும் எளிமையாக நடக்கிறது. 8-ந் தேதி நடக்க இருந்த திருமண வரவேற்பு ரத்து செய்யப்பட்டுள்ளது.

பிரியங்கா வருகிறார்

இது முழுக்க, முழுக்க குடும்ப விழாவாக நடத்த முடிவு செய்யப்பட்டு இருப்பதால், ராஜீவ் காந்தி, சஞ்சய் காந்தி, மேனகா காந்தி குடும்பத்தினர் மற்றும் மணமகளின் குடும்பத்தில் மிக முக்கியமானவர்கள் மட்டும் அழைக்கப்பட்டு உள்ளனர். அவர்கள் அனைவரும் நேற்று மாலையிலேயே தனி விமானத்தில் காசி நகருக்கு வந்து சேர்ந்தனர். அவர்கள் அனைவரும் பல்வேறு ஓட்டல்களில் தங்கி உள்ளனர்.

வருண்காந்தியின் பெரியப்பா ராஜீவ் காந்தி-சோனியா காந்தி குடும்பத்தினர் சார்பாக பிரியங்கா கலந்து கொள்வார் என்று எதிர் பார்க்கப்படுகிறது.

பலத்த பாதுகாப்பு

பா.ஜனதா தலைவர்கள் சிலர் உள்பட மிக முக்கிய பிரமுகர்கள் குறைந்த அளவே திருமணத்தில் கலந்து கொள்கிறார்கள். என்றாலும், வருண்காந்தி மற்றும் பிரியங்கா, மேனகா காந்தி ஆகியோரின் பாதுகாப்பை கருதி மிக பலத்த பாதுகாப்பு ஏற்பாடுகள் செய்யப்பட்டு உள்ளன.

ஓட்டல்கள், திருமணம் நடைபெறும் இடம் உள்பட பல பகுதிகள் குண்டு துளைக்காத வகையில் பாதுகாப்பு ஏற்பாடுகள் செய்யப்பட்டு உள்ளன.

இந்திரா காந்தியின் பட்டு சேலை

இன்று நடைபெறும் திருமணத்தில் 40 ஆண்டுகளுக்கு முன் இந்திரா காந்தி தனது மருமகள் மேனகா காந்திக்கு பரிசளித்த பட்டுச் சேலையை மணமகள் யாமினி ராய் அணிந்து கொள்கிறார். வருண்காந்தி கைத்தறியில் நெய்யப்பட்ட குர்தா-பைஜாமாவும், காஷ்மீர் தலைப்பாகையும், ராஜஸ்தான் காலணியும் அணிந்து கொள்வார். மேனகா காந்தி மிருகவதை தடுப்பு சங்கத்தில் இருப்பதால், தோலால் செய்யப்பட்ட காலணி தவிர்க்கப் பட்டுள்ளதாக தெரிவிக்கப்பட்டு உள்ளது.

திருமண சடங்குகள் வருண்காந்தி தங்கியுள்ள ஓட்டலிலேயே நேற்று மாலையில் நடந்தன. வங்காள புரோகிதரும், தென்னிந்திய அர்ச்சகர் ஒருவரும் காசி காமகோடீசுவரர் கோவில் அர்ச்சர்கர்களுடன் சேர்ந்து இன்று காலையில் திருமணத்தை நடத்தி வைக்கிறார்கள்.

**சிவா** · **சிவா** Sun Mar 06, 2011 10:11 am

வருண் திருமணம் நடந்தது

வாரணாசி: இந்திராகாந்தியின் பேரனும் முன்னாள் மத்திய அமைச்சர் மேனகாவின் மகனுமான பா.ஜ., எம்.பி.வருண்-யாமினி திருமணம் இன்று நடந்தது. திருமணம் உத்தரபிரதேசம் மாநிலம் வாரணாசியில் உள்ள காசி காமகோடீசுவரர் அனுமார் கோவிலில் இன்று நடந்தது. காஞ்சி ஜெயேந்திரர் திருமணத்தை நடத்தி வைத்தார். திருமணத்தில் பா.ஜ., தலைவர்கள் பல்வேறு கட்சி மற்றும் கட்சி தலைவர்களும் கலந்து கொண்டனர்.