மலேசியாவில் முதலாவது தகவல் உரிமைச் சட்டம் நிறைவேற்றப்பட்டது.

சிலாங்கூர் சட்டமன்றம் இன்று 2010 தகவல் உரிமைச்சட்டத்தை ஏகமனதாய் நிறைவேற்றி, அப்படி ஒரு சட்டத்தைக் கொண்டுவந்த முதலாவது சட்டமன்றம் என்று புதிய வரலாறும் படைத்துள்ளது.

அந்தச் சட்டத்தை சுற்றுலா, பயனீட்டாளர் விவகாரம், சுற்றுச்சூழல் ஆகிய விவகாரங்களுக்குப் பொறுப்பான ஆட்சிக்குழு உறுப்பினரும் புக்கிட் லஞ்சான் சட்டமன்ற உறுப்பினருமான எலிசபெத் வோங் மூன்றாவது வாசிப்புக்குத் தாக்கல் செய்தார். ஸ்ரீ அண்டாலாஸ் சட்டமன்ற உறுப்பினர் சேவியர் ஜெயக்குமார் அதனை வழிமொழிந்தார். பின்னர் அது ஏகமனதாய் ஏற்றுக்கொள்ளப்பட்டது.

“இதைத் தயாரித்துக் கொண்டுவர (நிபுணர்களும் பொதுமக்களும் அடங்கிய ஒரு தேர்வுக்குழுவுக்கு) ஒன்பது மாதங்கள் பிடித்தது….இது 2008இல், பக்காத்தான் ரக்யாட்டைத் தேர்ந்தெடுத்த மக்களின் துணிச்சலுக்கும் நம்பிக்கைக்கும் கிடைத்த வெகுமதி” என்று எலிசபெத் வோங் கூறினார்.

“அது ஒரு முழுமையான சட்டமாகவும் அதேவேஎளை மாநிலச் சட்டங்களுக்கு உட்பட்டதாகவும் கூட்டரசு அரசமைப்புடன் முரண்படாமலும் இருக்க வேண்டும் என்று விரும்பினோம்.”

இச்சட்டம். மாநில நிர்வாகம், மாநில அரசு சார்பு நிறுவனங்கள், முனிசிபல், மற்றும் நகராட்சி மன்றங்கள் முதலியவற்றிடமிருந்து தகவல் பெறும் உரிமையை வழங்குகிறது.

“தேவை ஏற்பட்டால் ஐந்தாறு மாதங்களில் சட்டத்தில் திருத்தம் செய்யப்படலாம்”, என்றாரவர்.

தேர்வுக்குழுவின் ஒரு கூட்டத்தில்கூட பிஎன் சட்டமன்ற உறுப்பினர்கள் கலந்துகொள்ளவில்லை என்று குறிப்பிட்ட வோங், “வரலாறு படைக்கப்படுவதில் பங்கேற்கும்” வாய்ப்பை அவர்கள் தவற விட்டுவிட்டார்கள் என்றார்.

அச்சட்டம், பக்காத்தான் ரக்யாட் ஆதரவாளர்களுக்கு மேலும் பல பதவிகளை உருவாக்கிக்கொடுப்பதற்காகக் கொண்டுவரப்பட்ட ஒன்று என்றும் அதனை இயற்றும் அதிகாரம் சட்டமன்றத்துக்கு இல்லை என்றும் கூறி சிலாங்கூர் பிஎன் அதற்கு எதிர்ப்புத் தெரிவித்தது. 'மலேசியா இன்று'