தி.மு.க., வேட்பாளர் பெயரை மறந்த முதல்வர் : பர்கூரில் காத்திருந்து ஏமாந்த கட்சியினர்

கிருஷ்ணகிரி : பர்கூரில் நடந்த வேட்பாளர்கள் அறிமுக நிகழ்ச்சியில், பா.ம.க., மற்றும் விடுதலைச் சிறுத்தைகள் கட்சியின் வேட்பாளர்களின் பெயர்களை மட்டும் கூறி, அவர்களுக்கு ஓட்டு போடும்படி, முதல்வர் கருணாநிதி பேசினார். தி.மு.க., மற்றும் காங்., கட்சி வேட்பாளர்களின் பெயர்களை கூறி, அவர்களுக்கு முதல்வர் கருணாநிதி ஓட்டு சேகரிக்காததால், அக்கட்சி வேட்பாளர்கள் ஏமாற்றம் அடைந்தனர்.
சேலத்தில் நேற்று முன்தினம் இரவு நடந்த பொதுக் கூட்டத்தில், கூட்டணி கட்சி வேட்பாளர்களுக்கு தமிழக முதல்வர் கருணாநிதி ஆதரவு திரட்டினார். அங்கிருந்து நேற்று காலை, கார் மூலம் வேலூர் புறப்பட்டார். கிருஷ்ணகிரி மாவட்ட எல்லையான சப்பாணிப்பட்டிக்கு, 11.55 மணிக்கு, முதல்வர் கருணாநிதி வந்தார். பிரசாரத்தில், தி.மு.க., மாவட்ட செயலர் செங்குட்டுவன் உள்ளிட்ட தி.மு.க., கூட்டணி நிர்வாகிகள் பலர் கலந்து கொண்டனர்.
அதன் பின், பர்கூர் அரசு இன்ஜினியரிங் கல்லூரி எதிரே கிருஷ்ணகிரி மாவட்ட தி.மு.க., கூட்டணி கட்சி வேட்பாளர்களை, தமிழக முதல்வர் கருணாநிதி அறிமுகம் செய்து வைக்கும் நிகழ்ச்சிக்கு ஏற்பாடு செய்யப்பட்டிருந்தது. பர்கூரில், தனி டெம்போவில், தி.மு.க., வேட்பாளர்கள், செங்குட்டுவன், பிரகாஷ், காங்கிரஸ் வேட்பாளர் கோபிநாத் ஆகியோர் ஏறி, கைகூப்பியபடி நின்று கொண்டிருந்தனர்.
பா.ம.க., வேட்பாளர் ராஜா, விடுதலைச் சிறுத்தைகள் கட்சி வேட்பாளர் முனியம்மாள் ஆகியோர் முதல்வரை வரவேற்க சாலையோரம் நின்று கொண்டிருந்தனர். பகல் 12.25 மணிக்கு பர்கூர் வந்த முதல்வர் கருணாநிதியின் காரை பொதுமக்கள் சூழ்ந்து கொண்டனர். கிருஷ்ணகிரி மாவட்டத்தில் தி.மு.க., கூட்டணி சார்பில் போட்டியிடும் வேட்பாளர்களின் பெயர்கள் அடங்கிய லிஸ்ட் வேண்டும் என்று, காரில் இருந்த முதல்வரின் உதவியாளர் கேட்டார். ஆனால், முதல்வர் கருணாநிதியிடம் லிஸ்ட் கொடுக்கப்படவில்லை.
முதல்வர் கருணாநிதி பேசியதாவது: ஊத்தங்கரை தொகுதியில் போட்டியிடும் விடுதலைச் சிறுத்தைகள் கட்சியின் வேட்பாளர் முனியம்மாள் கனியமுதனுக்கு மெழுகுவத்தி சின்னத்திலும், பர்கூர் தொகுதி பா.ம.க., வேட்பாளர் ராஜாவுக்கு மாம்பழம் சின்னத்திலும் ஓட்டளிக்க வேண்டும். உங்கள் சிறப்பான வரவேற்புக்கு நன்றி. இவ்வாறு முதல்வர் கருணாநிதி பேசினார்.



தினமலர்.