ஜூலை முதல் மின்வெட்டு நேரம் குறைப்பு

சென்னையில் நாளைமுதல் மேலும் ஒரு மணி நேரம் மின்தடை: 10 நாட்களுக்கு அமல்

சென்னை, ஜூன் 25: சென்னையில் திங்கள்கிழமை முதல் மேலும் ஒரு மணி
நேரத்துக்கு மின் தடை அமல் செய்யப்படுகிறது. இந்த மின்வெட்டு முறை 10
நாட்களுக்கு அமலில் இருக்கும்.

மின் பற்றாக்குறை காரணமாக, சென்னை நகரில் ஏற்கெனவே ஒரு மணி நேரம்
மின்தடை செய்யப்படுவது குறிப்பிடத்தக்கது. இப்போது சுழற்சி முறையில்
மேலும் ஒரு மணி நேரம் மின்தடை நடைமுறைப்படுத்தப்படும் என தமிழ்நாடு
மின்சார வாரியம் தெரிவித்துள்ளது. இதுகுறித்து, வாரியம் வெளியிட்டுள்ள
அறிவிப்பு: வட சென்னையில் வள்ளூர் கிராமத்தில் 1500 மெகா வாட் திறனுடைய
அனல் மின் நிலையம் அமைப்பதற்கான பணிகளை விரைந்து முடிப்பதற்கு முதல்வர்
ஜெயலலிதா உத்தரவிட்டுள்ளார்.

இந்த அனல் மின் நிலையத்தின் முதல் அலகு இந்த ஆண்டு டிசம்பரில்
உற்பத்தியைத் தொடங்குவதற்கான அனைத்து நடவடிக்கைகளும் மேற்கொள்ளப்பட்

டுள்ளன. மின் நிலையத்தின் தொடக்கப் பணிகளுக்கான மின் தேவைக்காகவும்,
மின் உற்பத்தி தொடங்கிய பின் உற்பத்தி செய்யப்படும் மின்சாரத்தை,
மாநிலத்தின் பல்வேறு பகுதிகளுக்குக் கொண்டு செல்வதற்காகவும் 400 கிலோ
வோல்ட் மின்பாதை தேசிய மின் கட்டமைப்புக் கழகம் மூலமாக அமைக்கப்படுகிறது.

இந்த மின்பாதை நெல்லூரில் இருந்து அலமாதி வழியாக ஸ்ரீபெரும்புதூர்
செல்லும் 400 கிலோ வோல்ட் இருவழிப் பாதையில் இணைக்கப்பட வேண்டும். இந்தப்
பணி நடைபெற்ற பின்னரே அனல்மின் நிலையத்தில் மற்ற பணிகளை மேற்கொள்ள
இயலும். இந்தப் பணி முடிவடைய பத்து நாட்களாகும்.

பணி நடைபெறும் போது நெல்லூர் வழியாகப் பெறப்படும் ஆயிரம் மெகாவாட்
மின்சாரம் தடைபடும். இதனால், சென்னை மற்றும் சுற்றுப் பகுதிகளில் ஜூன் 21
முதல் 30 வரை நான்கு மணி நேரத்துக்கு ஒருமுறை ஒரு மணி நேரம் சுழற்சி
முறையில் மின்தடை நடைமுறைப்படுத்த மின்சார வாரியம் முடிவெடுத்தது.

மேலும் ஒரு மணி நேரம்...சென்னையில் ஏற்கெனவே ஒரு மணி நேரம் மின் தடை
செய்யப்படுகிறது. மேலும் நான்கு மணி நேரத்துக்கு ஒரு முறை மின்வெட்டு
என்பது மக்களை மிகவும் பாதிக்கும் எனவும், மின் தடை நேரத்தைக் குறைக்கும்
வழிகளை ஆராய்வதற்காக தலைமைச் செயலகத்தில் முதல்வர் ஜெயலலிதா ஆலோசனை
நடத்தினார்.

அந்தக் கூட்டத்தில் எடுக்கப்பட முடிவுகளின்படி, நெல்லூர்-அலமாதி-
ஸ்ரீபெரும்புதூர் இடையிலான இருவழி மின் தடத்தில் ஒரு தடத்தில் மட்டும்
இடைக்கால இணைப்பு ஏற்படுத்த மின்சார வாரியம் முடிவெடுத்துள்ளது.
இதன்மூலம் பெரும்பகுதியான மின்சாரம் சென்னைக்குத் தொடர்ந்து கிடைக்கும்.
இதனால், சென்னை மற்றும் சுற்றியுள்ள பகுதிகளின் மின்பற்றாக்குறை 250
மெகாவாட் அளவுக்குக் குறைக்க இயலும்.

எந்தத் தேதியில் இருந்து: மேலும் ஒரு மணி நேர மின்தடை முறை,
திங்கள்கிழமை (ஜூன் 27) முதல் அமல் செய்யப்படுகிறது. ஜூலை 7-ம் தேதி வரை
மின்தடை முறை அமலில் இருக்கும்.

இரண்டு நாட்களில் மட்டும், அதாவது ஜூன் 28, ஜூலை 6 ஆகிய தினங்களில்
பகலில் ஒரு மணி நேரமும், இரவில் ஒரு மணி நேரமும் சுழற்சி முறையில் மின்
தடை செய்யப்படும். பகல் நேரங்களில் மின் தடை செய்யப்பட்ட இடங்களில், இரவு
நேரங்களில் மின் தடை செய்யப்பட மாட்டாது. மேலும், ஒரே இடம் இரண்டு முறை
இரவு நேரங்களில் பாதிக்கப்படாது என மின்சார வாரியம் தெரிவித்துள்ளது.


இதை நம்பலாமா ?