இதெல்லாம் ஸ்டாலினின் திட்டம்தான்!”

சென்னை, இந்தியா: தி.மு.க.வின் சமீபத்தைய நிர்வாக மாற்றங்கள், கட்சியின் இரண்டாம் மட்டத் தலைவர்களிடம் கடும் புகைச்சலை ஏற்படுத்தியுள்ளது. தங்களை டம்மியாக்கி ஒதுக்கி வைக்கும் திட்டம் இது என்பதை சில சீனியர் தி.மு.க. தலைவர்கள் புரிந்து கொண்டுள்ளனர்.

இனியும் தாமதித்தால், தாங்கள் மூலையில் முடக்கப்படுவோம் என்பதால் இவர்கள் கட்சிக்குள் எந்த நிமிடத்திலும் போர்க்கொடி தூக்கலாம். விவகாரம் கட்சிக்குள் கடுமையாகப் புகையத் தொடங்கிவிட்டது.

இவர்கள் போர்க்கொடி தூக்கப்போவது, ஸ்டாலினுக்கு எதிராக!

கொந்தளித்துக் கொண்டிருக்கும், தி.மு.க. முன்னாள் அமைச்சர் ஒருவருடன் பேச்சுக் கொடுத்தோம். இவர் தென்மாவட்ட பிரமுகர். ஒருகாலத்தில் அழகிரி ஆதரவாளராக இருந்து, பின் ஸ்டாலின் அணிக்கு வந்தவர். இவரே ஸ்டாலின்மீது கடும் கோபத்தில் இருக்கிறார்.

“தலைவர் இனி ஆக்டிவ் அரசியலில் இருக்க மாட்டார் என்பது எங்களுக்கு நன்றாகவே புரிகின்றது. ஸ்டாலினும் அதைப் புரிந்து கொண்டே கட்சியைக் கைப்பற்ற காய் நகர்த்துகிறார்” என்கிறார் இவர்.

“கனிமொழி விஷயத்தில் தனது முழுக் கவனத்தையும் செலுத்திக் கொண்டிருக்கும் கலைஞர், இப்போதெல்லாம் கட்சி விஷயஙகளை ஏனோதானோ என்றுதான் அணுகுகிறார். இதனால், ஸ்டாலினால் கட்சி விஷயத்தில் எதையும் சொல்லி தலைவரிடம் அனுமதி வாங்க முடிகிறது.

உதாரணமாக, மாவட்டச் செயலாளர்களின் அதிகாரங்களைக் குறைக்கும் முடிவை தலைவர் 5 நிமிடங்களுக்குக் குறைவான நேரத்தில் எடுத்திருக்கிறார். எவ்வளவு பெரிய விஷயம் இது? எத்தனை பேருடன் ஆலோசித்து, விவாதித்து எடுக்க வேண்டிய முடிவு இது? ஆனால் அப்படி நடக்கவில்லை” என்றும் கூறுகிறார் இந்த முன்னாள் அமைச்சர்.

“இந்த முடிவை தலைவர் எடுத்தபோது, அறைக்குள் ஸ்டாலின் மாத்திமே அவருடன் இருந்தார்” என்பது இவரது குற்றச்சாட்டு.

‘‘தற்போதுள்ள சீனியர் தலைவர்கள் பலர் ஸ்டாலினுக்கு எதிராக இருக்கின்றனர். அவர்களை டம்மியாக்குவது ஸ்டாலினின் திட்டம். அதுவரை அழகிரியின் ஆதரவாளர்களில் கைவைக்க மாட்டார். இரண்டாம் கட்டமாகத்தான் அழகிரி ஆதரவாளர்கள் ஓரம் கட்டப்படுவார்கள். நீங்கள் இருந்து பாருங்கள். நான் சொல்வது நடக்காவிட்டால் நான் அரசியலில் இருந்தே ஒதுங்குகிறேன்” என்றும் சவால் விடுகிறார்.

இவர் கூறுவதைப் பார்த்தால், சவால் காரணமாக இவராக ஒதுங்காவிட்டாலும், தலைமையால் ஒதுக்கப்பட்டு விடுவார் போலிருக்கிறதே!


வி வி