பக்காத்தான்: போலீசார் கண்ணீர் புகைக் குண்டுகளை மக்களை நோக்கி சுட்டனர்

பெர்சே 2.0 பேரணி படைபலத்தைக் கொண்டு ஒடுக்கப்பட்டதை பக்காத்தான் தலைவர்கள் வன்மையாகக் கண்டித்துள்ளனர். போலீசார் கண்ணீர் புகைக் குண்டுகளை மக்களை நோக்கி சுட்ட போது பலர் காயமடைந்தனர். அவர்களில் எதிர்த்தரப்புத் தலைவர் அன்வார் இப்ராஹிமும் ஒருவர் ஆவார்.

கண்ணீர் புகைக் குண்டினால் காயமடைந்த இன்னொருவர் ஷா அலாம் எம்பி காலித் சமாட் ஆவார். அவருடைய தலையின் பின்புறத்தை நோக்கி சுடப்பட்ட கண்ணீர் புகைக் குண்டினால் அவர் காயமடைந்தார்.

போலீசார் தொடர்ந்து கூட்டத்தினரை நோக்கி கண்ணீர் புகைக் குண்டுகளைச் சுட்டதாக பிகேஆர் உதவித் தலிஅவர் நுருல் இஸ்ஸா அன்வார் குற்றம் சாட்டினார். அதனால் பலர் காயமடைந்தனர்.

“அன்வாருடைய மெய்க்காவலர் ஒருவருக்கு தாடை எலும்பில் காயம் ஏற்பட்டுள்ளது. எதிர்த்தரப்புத் தலைவருமான என் தந்தையும் காயமடைந்தார். என் இளைய சகோதரி கைது செய்யப்பட்டு போலீஸ் வாகனத்தில் ஏற்றப்பட்டார்”, என நுருல் இஸ்ஸா தெரிவித்தார்.

“போலீசார் ஆகாயத்தை நோக்கி கண்ணீர் புகைக் குண்டுகளை சுடவில்லை. எதிர்த்தரப்பு நாடாளுமன்ற உறுப்பினர்களைக் குறி வைத்து சுட்டனர். அதனால் பலர் காயமடைந்தனர். அவர்கள் அன்வாருடைய தலையையும் குறி வைத்தனர்,” என்றார் அவர்.

எதிர்க்கட்சி அரசியல்வாதிகள் மீதும் பெர்சே ஆதரவாளர்கள் மீதும் போலீசார் நடவடிக்கை எடுத்த முறை கொடூரமானது என வருணித்த அவர், உள்துறை அமைச்சர், பிரதமர், போலீசார் ஆகியோர் அந்த அபத்தத்திற்கும் வன்முறைக்கும் முற்றுப்புள்ளி வைக்க வேண்டும் என்றார்.

நியாயமான சுதந்திரமான தேர்தல்களக் கோருவது அனைத்து மலேசியர்களின் உரிமை என்றும் நுருல் இஸ்ஸா வலியுறுத்தினார்.

பெர்சே 2.0 தலைவர் அம்பிகா ஸ்ரீனிவாசன் கைது செய்யப்பட்டதையும் அவர் கண்டித்தார்.

“நாங்கள் அமைதியாக நடந்து சென்றோம். ஆனால் கண்ணீர் புகைக் குண்டுகள் எங்களை நோக்கி வெடிக்கப்பட்டன.”

போலீஸ் நேர்மை சீரழிந்து விட்டது

போலீசாருக்கு எஞ்சியிருந்த நேர்மையும் அவர்கள் இன்று சட்டத்தை அமலாக்கிய முறையினால் சீரழிந்து விட்டது என கோல சிலாங்கூர் எம்பி டாக்டர் சுல்கெப்லி அகமட் கூறினார்.

“மக்களுடைய நன்மைக்காக பெர்சே 2.0 முன்மொழிந்த சீர்திருத்தங்களை வலியுறுத்தும் வகையில் நடத்தப்பட்ட அமைதியான பேரணி போலீஸ் வன்முறையுடன் முடிந்துள்ளது.”

“பெர்சே கோரிக்கைகள் அடுத்த பொதுத் தேர்தலுக்கு முன்னர் அமலாக்கப்பட வேண்டும்.”

“அவை மக்களுடைய கோரிக்கைகளாகும். எதிர்க்கட்சிகள், அரசு சாரா அமைப்புக்கள் மட்டும் அவற்றை விடுக்கவில்லை. தேர்தல் சீர்திருத்தங்களுக்கு ஆதரவு தெரிவித்து எனக்குக் குறுஞ்செய்திகள் வந்து குவிந்து கொண்டிருக்கின்றன,” என்றும் சுல்கெப்லி சொன்னார்.

“தேர்தல் சீர்திருத்தங்களின் முக்கிய நோக்கம் போட்டிக் களம் சமமாக இருக்க வேண்டும் என்பதாகும்.”

போலீசாரின் தன்மூப்பான நடவடிக்கை போலீஸ் படைக்கு மேலும் சரிவைக் கொண்டு வந்து விட்டதாக பிகேஆர் உதவித் தலைவரான என் சுரேந்திரன் கூறினார்.

“கலைந்து செல்லுமாறு உத்தரவிடப்படவில்லை. மக்கள் அமைதியாக இருந்தனர். அவர்கள் சுரங்கப் பாதை ஒன்றின் வழியாகச் சென்று கொண்டிருந்தனர். கலைந்து செல்லவும் வழி இல்லை. உண்மையில் குறி வைக்கப்ப்பட்டவர்களைக் கொல்வது அல்லது காயப்படுத்துவதே நோக்கம்.”

இதனிடையே பாஸ் தலைவர் அப்துல் ஹாடி அவாங்கை அடுத்த 24 மணி நேரத்துக்குள் போலீசார் விடுவிக்க வேண்டும் என பாஸ் துணைத் தலைமைச் செயலாளர் சையட் அஸ்மான் சையட் நவாவி கெடு விதித்தார்.

இல்லை என்றால் புக்கிட் அமானில் ஒரு மில்லியன் பாஸ் உறுப்பினர்கள் ஒன்று திரளுவர் என அவர் எச்சரித்தார்.

“பெர்சே 2.0 தலைவர் அம்பிகா ஸ்ரீனிவாசனும் கைது செய்யப்பட்ட மற்றவர்களும் விடுவிக்கப்பட வேண்டும் எனவும் நாங்கள் கோருகிறோம்.”

மலேசியாஇன்று