கிறுக்கல் "நம்பர்பிளேட்' வாகனங்களுக்கு ஆர்.சி., புத்தகத்தை ரத்து செய்ய முடிவு

சிவகங்கை : ""மாவட்டத்தில், கிறுக்கல் "நம்பர் பிளேட்'களுடன் சுற்றித்திரியும் வாகன உரிமையாளர்கள் மீது வழக்கு பதிந்து, ஆர்.சி., புத்தகம் ரத்து செய்யப்படும்,'' என, போலீஸ், போக்குவரத்து துறையினர் எச்சரிக்கை விடுத்துள்ளனர்.மோட்டார் வாகன விதிப்படி இருசக்கர வாகனம், கார், பஸ் உள்ளிட்ட வாகனங்களில் "நம்பர் பிளேட்' எழுதவேண்டும் என அரசு உத்தரவிட்டுள்ளது. இருப்பினும், இம்மாவட்டத்தில் நூற்றுக்கு 80 சதவீத வாகனங்களில் ஆயுதங்கள், கட்சி தலைவர்கள் படம், பெயர், பணியாற்றும் துறைகளின் பெயர்களை நம்பர் பிளேட்களில் "கிறுக்கி' வைத்துள்ளனர். இதனால், விபத்துக்களில் சிக்கும் வாகனங்களின் நம்பர்களை கண்டுபிடிக்க முடியாத நிலை ஏற்படுகிறது.தடை: இப்பிரச்னைகளை தவிர்க்க, மோட்டார் வாகன விதிப்படி நம்பர் பிளேட்களை எழுதவேண்டும் என அரசு உத்தரவிட்டது. இதற்காக ஆக.,31ம் தேதி வரை கால அவகாசம் வழங்கப்பட்டது. இன்று முதல் கிறுக்கல் நம்பர் பிளேட் வாகன உரிமையாளர்கள் மீது போலீசார் மற்றும் போக்குவரத்து துறையினர் நடவடிக்கை எடுக்க அரசு உத்தரவிட்டுள்ளது.பன்னீர்செல்வம் எஸ்.பி., கூறுகையில்,"" மோட்டார் வாகன விதிப்படி நம்பர் பிளேட் எழுதாத வாகன உரிமையாளர்கள் மீது வழக்கு பதிய, போக்குவரத்து போலீசாருக்கு உத்தரவிடப்பட்டுள்ளது. போலீசாரும் இதற்காக, சிறப்பு வாகன சோதனையில் ஈடுபடுவர். எனவே வாகன ஓட்டிகள் முறைப்படி நம்பர் பிளேட்களை மாற்றி அமைத்து, வழக்குகளை தவிர்க்கவும்,'' என்றார்.வட்டார போக்குவரத்து அலுவலர் கல்யாண்குமார் கூறுகையில்,""விதிப்படி நம்பர் பிளேட் இல்லாத வாகன உரிமையாளர்களிடம் முதலில் விளக்கம் கேட்டு நோட்டீஸ் தரப்படும். அதற்கு பின்பும் நம்பர் பிளேட்களை மாற்றாமல் இருந்தால், ஆர்.சி., புத்தகத்தை ரத்து செய்வோம்,'' என்றார். தினமலர்

நல்ல முடிவு