பசி வந்தால் நன்றியும் பறந்து போகும்!

இந்தோனேஷியாவில் ஏழு நாய்கள் சோறு தண்ணீர் இல்லாததால் பசி பொறுக்க முடியாமல் வீடு திரும்பிய தம் எஜமானையே கடித்துத் தின்று விட்டன. இரண்டு வாரங்களாகப் பட்டினியில் வாடிய நாய்களின் கண்களுக்கு தம் எஜமானின் முகமே மறந்து போய்விட்டது போலும். சம்பந்தப்பட்டவரின் பக்கத்து வீட்டுக்காரர் கெட்ட வாடை வருவதை உணர்ந்து போலீஸுக்கு தகவல் சொல்லியிருக்கிறார். வந்து பார்த்தால், அவரது உடம்பு, வீட்டு வாசலுக்கு முன்னர் இருந்ததாகவும், மீதி பாதி உடம்பு சமையலறையில் இருந்ததாகவும் கூறுகிறார்கள். வீட்டை உடைத்து உள்ளே சென்ற போலீஸாருக்கு மேலும் ஓர் ஆச்சர்யம் - அந்த நாய்களில் இரண்டு நாய்கள் அதே மாதிரி கடித்துக் குதறப்பட்டு இறந்து கிடந்தனவாம். நாய்கள் தன்னைத் தானே கொண்டு தின்றிருக்கின்றன! வீட்டுல நாய் இருந்தால் ஒழுங்கா சாப்பாடு போட்டுடுங்கப்பா!

வீட்டில் மனைவியுடன் ஏற்பட்ட சண்டை காரணமாக, குடியுரிமை வழங்கும் அதிகாரி ஒருவர் தம் மனைவியின் பெயரை தீவிரவாதிப் பட்டியலில் இணைத்துவிட்டார். தமக்கு இருக்கும் உரிமையைப் பயன்படுத்தி டேட்டாபேஸில் தம் மனைவியின் பெயரை இணைத்துவிட, மனைவியால் மூன்று வருடங்களாக பிரிட்டனுக்குள் நுழைய முடியவில்லையாம்.

பாகிஸ்தானில் மாட்டிக்கொண்ட மனைவி ரொம்பவும் தவித்துப் போனாராம். இதற்கு நடுவில் இந்த அதிகாரிக்கும் பதவி உயர்வு கிடைத்துவிட, அவரது விவரங்களை கணினியில் பதிந்திருக்கிறார் ஒருவர். அப்பொழுது இவரது மனைவி ஒரு தீவிரவாதி என்று கணினி எச்சரிக்கை விடுக்க, கணவர் அதிர்ந்து போனாராம். அதன்பின் நடந்தவற்றைக் கிளறி எடுத்தால் தாம்தான் இந்தத் தில்லுமுல்லைச் செய்ததாக ஒப்புக் கொண்டுள்ளார். உடனே அவரை பணிநீக்கம் செய்துவிட்டு மனைவியை நாடு திரும்பச் சொல்லியிருக்கிறார்கள். எல்லைப் பாதுகாப்பு அதிகாரிகளான இவர்கள், இவ்வளவு தில்லுமுல்லு செய்திருப்பது எல்லோரையும் ஆச்சர்யப்பட வைத்திருக்கிறது.

தி.சு.பா.
கல்கி