என் மாணவன்

தீபாவளி நெருங்கிக் கொண்டிருந்தது. சிறுவர்கள் பட்டாசு வெடித்து மகிழ்ந்தனர். அப்போது, ஒரு பட்டாசு வெடிக்க, அதில் இருந்து பறந்து வந்த தீப்பொறி ஒன்று இட்லி சுடும் பார்வதி பாட்டி வீட்டு குடிசையில் போய் விழுந்தது. லேசாக புகைந்து கொண்டிருந்த அந்த பொறி, காற்று வேகமாக வீசியதால் `குப்'பென்று பற்றிக் கொண்டது.

இதைக் கண்ட சிறுவர்கள் பலர், "குடிசை எரியுது...குடிசை எரியுது...!''என்று சத்தமாக கத்திக் கொண்டிருந்தனர்.

பத்தாம் வகுப்பு படிக்கும் பாலு மட்டும் தன் வீட்டிற்கு ஓடிச் சென்றான். அங்கு நாலைந்து குடிநீர் உள்ள குடங்கள் வரிசையாக இருந்தன. பாலு அந்த குடங்களில் உள்ள நீரை எடுத்து வந்து, ஒரு கப்பைக் கொண்டு நீரை எடுத்து, நெருப்பின் மேல் வீசி வீசி ஊற்றிக் கொண்டே இருந்தான். அவனது இடைவிடாத முயற்சியின் பலனாக தீ அணைந்தது. சிறிய சேதாரத்துடன் குடிசை தப்பியது.

இதைக் கவனித்துக் கொண்டிருந்த அவனது ஆசிரியர், பாலுவைத் தன் வீட்டிற்கு அழைத்துப் பாராட்டினார்.

"பாலு, எல்லோரும் குடிசை எரியுது...குடிசை எரியுது...ன்னு கத்திக் கொண்டிருந்தனர். நீ மட்டும் கத்தாமல், எந்த விதப் பதற்றமும் இல்லாமல் தீயை அணைப்பதில் மட்டுமே குறியாக இருந்தது எப்படி?'' என்று கேட்டார்.

"ஐயா, நானும் அவர்களைப் போல கத்திக் கொண்டிருந்தால், எனக்கும் குடிசைப் பற்றி எரிகிறதே என்ன செய்ய..? என்ற பயம் வரத்தான் செய்யும். மற்றவர்கள் கத்தும் போது, நானும் கத்தினால், தீயை யார் அணைப்பது? என்று நினைத்தேன். அத னால் தான் நான் முடிந்த அளவிற்கு வேக வேகமாக தீயை அணைக்க முயன்றேன்'' என்று அமைதியாக பதில் சொன்னான், பாலு.

"குடிநீரை எல்லாம் கொண்டு வந்து கொட்டி அணைத்தாயே. மற்றவங்க யாரும் தண்ணீர் கொண்டு வந்து உனக்கு உதவ முன்வரவில்லையே. உன் வீட்டில் கஷ்டப் பட்டு பிடிச்சு வைச்சிருக்கற தண்ணீரை நீ ஏன் எடுத்து செலவழித்தாய் என்று உன் அம்மா திட்ட மாட்டாங்களா?'' என்று ஆசிரியர் கேட்டார்.

"ஐயா, நான் அப்படி தீயை அணைக்காமல் இருந்தால்தான் திட்டுவாங்க. நீங்க தானே சார், `தன்னைப் போல் பிறரையும் நேசி'ன்னு எனக்கு சொல்லிக் கொடுத்தீங்க. மற்ற வங்க தங்களோட தண்ணீரை மட்டும் தான் பார்த்தாங்க. நான் எரிந்து கொண்டிருந்த அந்த பாட்டியோட குடிசையையும் அவங்க கஷ்டப்பட்டு சேர்த்து வைச்ச உடைமை களையும் பார்த்தேன். நான் ஓடிப் போய் அணைக்காம இருந்தால், அக்கம் பக்கத்து வீடுகளுக்கும் தீ பரவி, நாசமாப் போயிருக்கும் இல்லையா?'' என்று பாலு தீர்க்கதரிசனமாக கூறினான்.

பாலுவின் பொது நலத்தையும், உயர்ந்த குணத்தையும் கண்டு பூரித்தார், ஆசிரியர். "உன்னை என் மாணவன் என்று சொல்ல எனக்குப் பெருமையாக இருக்கு'' என்று கட்டி அணைத்து நெகிழ்ந்தார், ஆசிரியர்.

-தா.ஆறுமுகம்

சூப்பர் பாலு