பீட்டர்சன் அதிரடியில் இங்கிலாந்து வெற்றி..!

கோல்கட்டா: கோல்கட்டாவில் நடந்த "டுவென்டி-20 போட்டியில், பீட்டர்சன் அதிரடி அரைசதம் கைகொடுக்க, இங்கிலாந்து அணி 6 விக்கெட்டுகள் வித்தியாசத்தில், ஆறுதல் வெற்றி பெற்று கோப்பை கைப்பற்றியது. பேட்டிங், பவுலிங்கில் சொதப்பிய இந்திய அணி, பரிதாபமாக வீழ்ந்தது.
இந்தியா, இங்கிலாந்து அணிகள் இடையிலான "டுவென்டி-20 போட்டி, கோல்கட்டா ஈடன் கார்டன் மைதானத்தில் நடந்தது. "டாஸ் வென்ற இந்திய அணி கேப்டன் தோனி, "பேட்டிங் தேர்வு செய்தார்.
இந்திய அணியில் "டுவென்டி-20 "ஸ்பெஷலிஸ்ட் வீரர்கள் உத்தப்பா, யூசுப் பதான் இடம் பெற்றனர். இங்கிலாந்து அணியின் கேப்டன் பொறுப்பை சுவான் ஏற்றார்.
சொதப்பல் துவக்கம்:
இந்திய அணிக்கு ஒருநாள் தொடரில் சிறப்பான ஆட்டத்தை வெளிப்படுத்திய ரகானே, இம்முறை "டக் அவுட்டாகி அதிர்ச்சி தந்தார். கடந்த 2008க்குப் பின் இந்திய அணியில் இடம் பெற்ற உத்தப்பா (1), கிடைத்த வாய்ப்பை வீணடித்தார்.
கோஹ்லி ஏமாற்றம்:
பின் விராத் கோஹ்லி, ரெய்னா இணைந்தனர். பிரஸ்னன் ஓவரில் இரு பவுண்டரிகள் விளாசிய விராத் கோஹ்லி, 15 ரன்னுக்கு அவுட்டாகினார். சற்று தாக்குப்பிடித்த மனோஜ் திவாரி 15 ரன்னில் வெளியேறினார்.
ரெய்னா ஆறுதல்:
பின் பந்தில் சிக்சர் விளாசி அதிரடியாக துவக்கினார் ரெய்னா. இவர் சுவான் ஓவரில் தலா ஒரு சிக்சர், பவுண்டரி உட்பட 16 ரன்கள் எடுக்க, ஸ்கோர் 50 ஐ கடந்தது. இதனிடையே 29 பந்தில் 39 ரன்கள் எடுத்த ரெய்னா, ஸ்டீவன் பின் வேகத்தில் வீழ்ந்தார். அடுத்த பந்தில் ஜடேஜாவும், "டக் அவுட்டாக, இந்திய அணி 76 ரன்களுக்கு 6 விக்கெட்டுகளை இழந்து தத்தளித்தது.
குறைந்த ஸ்கோர்:
பெரிதும் எதிர்பார்க்கப்பட்ட யூசுப் பதான் (10) சொதப்பினார். பிரவீண் குமாரும் "டக் அவுட்டாகினார். கடைசி நேரத்தில் அஷ்வின் மூன்று பவுண்டரிகள் விளாசினார். நிதான ஆட்டத்தை வெளிப்படுத்திய தோனி (21) ரன் அவுட்டாக, இந்திய அணி 20 ஓவரில், 9 விக்கெட்டுக்கு 120 ரன்கள் எடுத்தது. அஷ்வின் (17) அவுட்டாகாமல் இருந்தார்.
கீஸ்வெட்டர் "அவுட்:
எளிய இலக்கை துரத்திய இங்கிலாந்து அணிக்கு கீஸ்வெட்டர், ஹேல்ஸ் சுமாரான துவக்கம் தந்தனர். தோனி முதல் ஓவரில் இருந்தே சுழற்பந்து வீச்சை கையில் எடுத்தார். இதற்கு நல்ல பலன் கிடைத்தது. ஜடேஜா விரித்த "வலையில் கீஸ்வெட்டர் (12) சிக்கினார். ஹேல்ஸ் (11), யூசுப் பதானிடம் வீழ்ந்தார்.
"சூப்பர் ஜோடி:
பீட்டர்சன் ஒரு ரன் எடுத்த போது கொடுத்த "கேட்ச் வாய்ப்பை, ரெய்னா கோட்டை விட்டார். இதன் பின் போட்டி இங்கிலாந்து பக்கம் திரும்பியது. பீட்டர்சன், சமித் படேல் இணைந்து அதிரடியாக ரன்கள் சேர்த்தனர். யூசுப் பதான் பந்துகளில், பீட்டர்சன் தலா இரண்டு சிக்சர், பவுண்டரி விளாசினார்.
பிரவீண் குமார் ஓவரில் பீட்டர்சன் இரு பவுண்டரி அடிக்க, வினய் குமார் பந்தில் சமித் படேல் "சூப்பர் சிக்சர் அடித்தார். மூன்றாவது விக்கெட்டுக்கு 60 ரன்கள் சேர்த்த நிலையில், சமித் படேல் (21) அவுட்டானார். சிறப்பான ஆட்டத்தை வெளிப்படுத்திய பீட்டர்சன், சர்வதேச "டுவென்டி-20 அரங்கில், 6வது அரைசதம் (53) கடந்து திரும்பினார்.
அடுத்து வந்த போபரா, பேர்ஸ்டவ் இணைந்து அணியை வெற்றிக்கு அழைத்துச் சென்றனர். இங்கிலாந்து அணி 18.4 ஓவரில் 4 விக்கெட்டுக்கு 121 ரன்கள் எடுத்து வெற்றி பெற்றது. போபரா (15), பேர்ஸ்டவ் (2) அவுட்டாகாமல் இருந்தனர்.
கடந்த 2006க்குப் பின் இந்தியாவுக்கு எதிரான ஒரு சர்வதேச போட்டியில், இந்திய மண்ணில் இங்கிலாந்து அணி பெறும் முதல் வெற்றி இதுவாகும்.
-தினமலர்

கோல்கட்டா: இங்கிலாந்து அணிக்கு எதிரான டுவென்டி-20 கிரிக்கெட் போட்டியில் தோல்வியடைந்ததற்கு இந்திய பேட்ஸ்மேன்களே காரணம் என கேப்டன் தோனி கூறியுள்ளார். இங்கிலாந்து அணிக்கு எதிரான டுவென்டி-20 கிரிக்கெட் போட்டியில் இந்திய அணி 6 விக்கெட் வித்தியாசத்தில் தோல்வியடைந்தது. போட்டிக்கு பின்னர் பேட்டியளித்த இந்திய அணி கேப்டன் தோனி, எட்டு பேட்ஸ்மேன்களுடன் களமிறங்கியும், இந்திய அணி குறைந்த ரன்களே எடுத்தது. பேட்ஸ்மேன்கள் கடைசி வரை களத்தில் இருக்க வேண்டும். இந்திய அணிக்கு துவக்கம்சரிவர அமையவில்லை. இரண்டு அணிக்கும் இடையே உள்ள வித்தியாசம் 4 விக்கெட் மற்றும் 8 விக்கெட்கள் வீழ்ந்தது தான். இதனால் இந்திய அணி தோல்வியடைந்தது. இந்திய அணி தோல்வியடைந்ததற்கு பேட்ஸ்மேன்கள் பொறுப்பேற்க வேண்டும் என கூறினார்.
-தினமலர்

ஐந்து ஒரு நாள் போட்டியை வென்றதால் நம் வீரர்கள் சற்றுக் களைப்படைந்து விட்டார்கள். அடுத்தடுத்த போட்டிகளில் இந்தியா இமாலய வெற்றி பெறும்.