பகவத் கீதை விவகாரம்: ரஷிய தூதரிடம் இந்தியா வலியுறுத்தல்

**சிவா** · **சிவா** Wed Dec 28, 2011 1:17 pm

ரஷியாவில் சைபீரிய கோர்ட்டில் பகவத் கீதைக்கு தடை விதிக்க கோரி தொடரப்பட்ட வழக்குக்கு இந்தியாவில் கடும் எதிர்ப்பு கிளம்பி உள்ளது. பாராளுமன்றத்திலும் அமளி ஏற்பட்டது. இந்த நிலையில், வழக்கின் அடுத்தகட்ட விசாரணை இன்று நடைபெறுகிறது. இந்த சூழ்நிலையில், இந்தியாவுக்கான ரஷிய தூதர் அலெக்சாண்டர் கடாகின்னை மத்திய வெளியுறவு மந்திரி எஸ்.எம்.கிருஷ்ணா நேற்று நேரில் அழைத்தார்.

அவரிடம், `பகவத் கீதை விவகாரத்தை சுமூகமாக தீர்க்க அனைத்து நடவடிக்கைகளையும் ரஷிய அரசு மேற்கொள்ள வேண்டும் என்றும் பகவத் கீதைக்கு தடை செய்யப் கோரும் வழக்கால் இந்திய மக்களின் உணர்வுகள் புண்படுத்தப்பட்டுள்ளது' என்றும் கிருஷ்ணா தெரிவித்தார்.

அதற்கு பதிலளித்த அலெக்சாண்டர், `இந்த விவகாரத்தை தீர்த்து வைக்க, தனது அதிகார வரம்புக்கு உட்பட்டு அனைத்து நடவடிக்கைகளையும் ரஷிய அரசு மேற்கொள்ளும்' என கிருஷ்ணாவிடம் உறுதி அளித்தார்.