ஒன்பது தலை ராவணன்!

ராவணனுக்கு பத்து தலைகள் என்றுதானே புராணங்கள் சொல்கின்றன... இது என்ன புதுக்கரடி என்று மிரண்டு விடாதீர்கள்! கேஷுவலாக மேலே படியுங்கள். கோயில்களில் உற்சவ மூர்த்திகள் வீதியுலா வரும்போது, நந்தி, சிம்மம், மயில், அன்னம் போன்ற வாகனங்களின் மேல் அமர்ந்து வருவது வழக்கம்.

அந்த வகையில் சிவனுக்கு வாகனமாக ராவணன் இருக்கிறான். சிவனுக்கு ராவணன் வாகனமா? என எண்ணுவோர், தர்மபுரி மாவட்டம் காரிமங்கலத்துக்கு வர வேண்டும். இங்குள்ள பழமை வாய்ந்த சிவன் கோயிலில்தான், சிவனுக்கு வாகனமாக ஒன்பது தலையுடன் கூடிய ராவணன் வாகனம் இருந்துள்ளது.

அந்த வாகனத்தை அகழ்வாராய்ச்சியாளர்கள் இப்போது கண்டுபிடித்து, தர்மபுரி அகழ் வைப்பகத்தில் வைத்து பாதுகாத்து வருகின்றனர். இந்த ராவணனுக்கு 9 தலைகள்தான் இருப்பது போல் வாகனம் வடிவமைக்கப்பட்டுள்ளது.

பார்வதியுடன் சிவன் கைலாய மலையில் இருந்தபோது, ராவணன் மலையைத் தூக்கியுள்ளான். அப்போது, சிவபெருமான் தன் கால் பெருவிரலால் மலையை அழுத்தினார்.

இதில் ராவணன் மலைக்கு அடியில் மாட்டிக் கொண்டதாகவும், அப்போது தன்னுடைய ஒரு தலை மட்டும் நசுங்கி, அதிலிருந்த நரம்புகளை எடுத்து, வீணை நரம்புகளாக்கி மீட்டியதாகவும், இதில் மயங்கிய சிவபெருமான் கால் பெருவிரலை எடுத்ததாகவும் கூறப்படுகிறது.

இதைக் குறிக்கும் வகையிலேதான் 9 தலையுடன் கூடிய ராவணன் வாகனம் வடிவமைக்கப்பட்டுள்ளது என்கின்றனர் அகழ்வாராய்ச்சியாளர்கள். காலப்போக்கில் இதில் பத்தாவதாக ஒரு தலை ஒட்டப்பட்டு, தனியாக நிற்கிறது.