ஸ்டாலினின் கோபக் கேள்வி “நெசமா அந்தாள் யார்னு தெரியாதா?”

ஸ்டாலினின் கோபக் கேள்வி “நெசமா அந்தாள் யார்னு தெரியாதா?”
on Monday, February 6, 2012 | 0 Comment



திருச்சியில் தென்பட்ட காட்சி ஒன்றை பார்த்துவிட்டு, அது என்ன என்று விசாரிக்காமல் செய்தி வெளியிட்டிருந்தால், “இளம் சன்யாசிகள் பாசறை” என்று தலைப்பு கொடுத்திருக்க வேண்டும். தூய வெண்ணிற ஆடையணிந்து, நெற்றியில் மங்களகரமாக திருநீற்றுப் பட்டை, குங்குமம் என்று அசத்தலாக 500-க்கும் மேற்பட்டவர்கள் ஒன்றுகூடியிருந்தனர்.

ஆனால், இந்த இளம் சன்யாசிகள் தோற்றத்தில் இருந்தவர்கள் ஒன்றுகூடிய இடம்தான் குழப்பத்தை விளைவித்தது. காரணம் அந்த இடம், “கடவுள் இல்லை” என்ற பகுத்தறிவுக் கொள்கையுடைய தி.மு.க.-வின் மாவட்ட செயல் அலுவலகமான, திருச்சி கலைஞர் அறிவாலயம்!ஒருவேளை பாரதீய ஜனதா கட்சியுடன் கூட்டணி உடன்பாடு ஏதாவது ஏற்பட்டு, பா.ஜ.க. தொண்டரணி தி.மு.க. அலுவலகத்துக்கு வந்துள்ளார்களோ என்ற சந்தேகத்தில் நின்றிருக்க, கார் ஒன்றில் மற்றொரு இளைஞர் வந்து இறங்கினார். அந்த இளைஞருக்கு சுமார் 60 வயது இருக்கும்.

அருகே போய்ப் பார்த்தால், தி.மு.க. இளைஞரணி தலைவர் மு.க. ஸ்டாலின்!அதன் பிறகுதான், வெண்ணிற ஆடை, பட்டை குங்குமத்துடன், ஏதோ சன்னியாச தீட்சை பெற வந்தவர்கள் போல காட்சியளித்த இளைஞர்கள், தி.மு.க. இளைஞர் அணியில் பதவிகளுக்காக நேர்முக தேர்வுக்கு வந்தவர்கள் என்று தெரியவந்தது. நல்ல வேளையாக யாருடைய இடுப்பிலும் சுருக்குப் பையில் விபூதி காணப்படவில்லை.


வலதுபுற போட்டோவில் உள்ளவர்கள் தி.மு.க. இளைஞர் அணி நேர்காணலுக்கு மங்களகரமாக வந்தவர்கள். இடதுபுற போட்டோ சும்மா ஒப்பிட்டுப் பார்க்க..

அந்த இளைஞர்களை ஒவ்வொருவராக அழைத்து நேர்முகத் தேர்வு நடத்தினார் மு.க.ஸ்டாலின். தி.மு.க. வரலாறு, அதன் முன்னோடிகள் தொடர்பான சில கேள்விகள் நேர்முகத் தேர்வில் கேட்கப்பட்டன. வந்திருந்த பலருக்கு அப்படியொரு வரலாறு இருப்பதாகவோ, மு.க. குடும்பத்தைத் தவிர அக்கட்சிக்கு வேறு யாராவது முன்னோடிகள் உள்ள விஷயமோ தெரிந்திருக்கவில்லை.

திருதிருவென விழித்தார்கள்.
நல்ல வேளையாக மு.க. குடும்ப முன்னோடிகள் பற்றி அவர்களுக்கு தெரிந்துள்ளதே என்று ஆறுதலடைந்த ஸ்டாலின், அவர்களுக்கு மதிப்பெண் போட்டு அனுப்பிக் கொண்டிருந்தார். சரி. நேர்முக தேர்வுக்கு வந்தவர்களுக்கு மு.க. குடும்ப முன்னோடிகள் பற்றி ஜெனரல் நாலேட்ஜ் இருப்பதை தளபதி ஸ்டாலின் எப்படி கண்டு கொண்டார்? எல்லாம், அவர்களிடம் இருந்து வந்த பதில்களை வைத்துத்தான்.

இதோ உதாரணத்துக்கு சாம்பிள் பாருங்கள்:
ரியல் இளைஞர் ஒருவரிடம், தி.மு.க. இளைஞர் ஸ்டாலின் தனது முதல் கேள்வியை வீசினார், “அறிஞர் அண்ணா தெரியுமா?”“ரொம்ப நல்லா தெரியுமுங்க தளபதி. ஜெயலலிதா கட்சி பெயர்ல உள்ள அண்ணாதானே.. அ.தி.மு.க. கட்சி போஸ்டர்ல போட்டோ பாத்திருக்கேன்”“அப்படி சொல்லக்கூடாது தம்பி. அறிஞர் அண்ணாதான் தி.மு.க.-வின் முன்னோடி”
“அட, நம்ம அண்ணா பற்றி கேட்கிறீங்களா? நம்ம கட்சி போஸ்டர்ல போட்டோ பாத்திருக்கேனே..”

“பரவாயில்லையே.. இப்பதான் சரியான ட்ராக்குக்கு வர்ரே.. சரி. அறிஞர் அண்ணாவோட.. அதுதான் நம்ம அண்ணாவோட முழு பெயர் என்ன தெரியுமா?”

“ரொம்ப நல்லா தெரியுமே.. மு.க.அழகிரிங்க”
ஸ்டாலினின் முகத்தில் கோபம் தென்பட தொடங்குகிறது. இளைஞரை உற்றுப் பார்த்தார் அவர்.அதை கவனிக்காத இளைஞர், “தொடக்கத்தில நீங்க ‘அறிஞர்’ அண்ணான்னு சொன்னதும் கன்ஃபியூஸ் ஆயிட்டேன். தப்பா எடுத்துக்காதீங்க தளபதி சார்” என்றார் பவ்வியமாக.

“என்ன தம்பி இப்படி பதில் சொல்ரே..” என்றார் ஸ்டாலின் கடும் கோபமாக.
அவரது கோபத்தைப் பார்த்து நடுங்கிய இளைஞர், “ஐயோ.. நெசமாலுமே உங்க அண்ணா அழகிரி சார் ஒரு அறிஞர்ன்னு எனக்கு யாரும் சொல்லல.. அவுரு ஏதோ அடிதடி பண்ணுற ஆசாமின்னு கட்சில பேசிக்கிட்டாங்க. இப்ப அறிஞர் ஆயிட்டாருங்களா? என்றார் பரிதாபமாக.

வேறு வழியில்லாமல் இந்த இளைஞருக்கும் மதிப்பெண் போட்டு அனுப்பிய ஸ்டாலின், “தி.மு.க. ஆட்சி அமைக்கவும், இயக்கம் வளரவும் இளைஞர்களும், மாணவர்களும் தான் காரணம். கடந்த தேர்தலில் இளைஞர்கள் ஓட்டளிக்காததால், தி.மு.க. தோல்வியை சந்தித்தது. இப்போது நாம் இளைஞர் அணியில் இணைக்கும் புதிய உறுப்பினர்கள் அந்த இடைவெளியை சரி செய்து நம்ம கட்சிக்கு வெற்றியை தேடித் தருவார்கள் என்று நம்புகிறோம்” என்று கூறிவிட்டு சென்றார்.

இன்னும் நாலைந்து இடங்களில் நேர்காணல் நடத்தும் சோலி அவருக்கு உள்ளது.

தகவல் பகிர்வு - தமிழ் வாரஇதழ் செய்திகள்: ARRKAY BLOGSPOT: -:

நல்ல தேர்வு

ஒரே காமெடி போங்க